Génesis 15 - CHUYA QELLQA La Biblia en Quechua de Ayacucho 2012

Abramwan Dios pacto ruwasqanmanta

¹ Chaykunapa qepantam Abramman rikuriykuspan Tayta Dios nirqa: Abram, ama manchakuychu, ñoqam waqaychasqayki, llumpaytataqmi apuyachisqaykipas, nispan.

² Chaymi Abram nirqa: Dios Taytalláy, ¿imapaqtaq imatapas qowankiman mana churiyuq kachkaptiyqa? Wasiypiqa kachkan Damascomanta kaq mayordomoy Eliezerllam.

³ Churitapas manataq qowachkankichu, chaynaqa wasiypi naceq criadoy Eliezerchiki tukuy imaykunatapas chaskinqa, nispa.

⁴ Chaymi Tayta Dios nirqa: Manam paychu herenciayki chaskiqqa kanqa, aswanqa churikipunim, nispa.

⁵ Abramta Tayta Dios hawaman pusaruspan nirqa: Qaway cielopi chaskakunata, ¿yupayta atiwaqchu? Wakna mana yupay atinam miraynikikunapas kanqa, nispa.

⁶ Tayta Diosman iñisqanraykum Abramqa mana huchayuqpaqña chaskisqa karqa.

⁷ Chaymantam Tayta Dios nirqa: Ñoqam Tayta Diosqa kani. Ñoqam Caldea law Ur llaqtamanta hurqomurqayki kay allpata qanman herenciata qonaypaq, nispa.

⁸ Abramñataqmi nirqa: Dios Taytalláy, ¿imaynatataq yachasaq kay allpa herenciay kasqanta? nispa.

⁹ Chaymi Tayta Dios nirqa: Apamuway huk vaquillata, huk cabrata chaynataq huk carnerotapas kimsa watayuqtakama, apamuwaytaq huk kullkuta chaynataq huk mallqo palomatapas, nispa.

¹⁰ Chaymi Abramqa chay animalkunata apamuspan chawpimanta iskayman chitqarurqa, hinaspam sapakamata chimpapurata churarqa, palomatawan kullkutam ichaqa mana chitqarqachu.

¹¹ Chay nakasqan animalkunapa hawanman ullachkukuna tiyamuptinmi Abramñataq manchachirqa.

¹² Inti seqaykuytam Abramta sinchi puñuy aysaykurqa, hinaptinmi manchakuypaq tutayay intuykuptin anchata mancharikurqa.

¹³ Chaymi Abramta Tayta Dios nirqa: Miraynikikunaqa cheqaptapunim hukpa llaqtanpi yachanqaku, hinaspam chay runakunapa esclavon kaspanku tawa pachak wata ñakarichisqa kanqaku.

¹⁴ Ñoqañataqmi ñakarichiqninku nacionta ñakarichisaq, chaymantam miraynikikuna llumpay apu lloqsimunqaku.

¹⁵ Qamñataqmi hawkayaypi unay watakunata kawsakunki, yuyaqyaynikipiña wañukuspam ñawpaq taytay-kikunapa kasqanman rinki.

¹⁶ Tawa kaq miraynikikunam kay allpaman kutimunqaku, chaykamam Amor casta runakunata huchallapiña kachkaptinkupas manaraq chinkachisaqchu, nispa.

¹⁷ Inti seqaykuyta sinchita tutayaruptinmi rikurirurqa huk qosnichkaq hornowan lenwachkaq nina, hinaspam chitqasqa animalkunapa chawpinta pasarqa.

¹⁸ Diosmi Abramwan chay punchaw huk pactota ruwaspan nirqa: Miraynikikunamanmi kay allpata qosaq, Egipto mayumanta Eufrates hatun mayukama.

¹⁹ Qosaqtaqmi ceneokunapa, cenezeokunapa, cadmoneokunapa,

²⁰ heteokunapa, ferezeokunapa, refaitakunapa,

²¹ amorreokunapa, cananeokunapa, gergeseokunapa chaynataq jebuseokunapa allpantapas, nispa.