Génesis 12 - CHUYA QELLQA La Biblia en Quechua de Ayacucho 2012

Abramta Dios qayasqamanta

¹ Abramtam Tayta Dios nirqa: Llaqtaykimanta, aylluykimanta hinaspa taytaykipa wasinmanta lloqsiy, maymi ñoqapa qawachisqay allpaman rinaykipaq.

² Miraynikikunamantam hatun nacionta hatarichisaq, bendecisqaykim, ancha reqsisqatam ruwasqayki, qamraykum llapa runakunatapas bendecisaq.

³ Bendecisuqnikikunatam bendecisaq, ñakasuqnikikunatam ñakasaq. Qamraykum kay pachapi llapallan ayllukunatapas bendecisaq, nispa.

⁴ Chaymi Abramqa Tayta Diospa nisqanman hina lloqsirqa, Lotpas paywanmi rirqa. Abrammi qanchis chunka pichqayuq watanpi kachkaspan Harán llaqtamanta lloqsirqa.

⁵ Abrammi Canaán lawman rispan warmin Saraita pusarqa. Sobrinon Lotpas paywanmi rirqa. Aparqataqmi tukuy imankunatapas chaynataq Haranpi yachaspa animalkuna, runakuna rantisqantapas, hinaspam Canaanman chayarurqaku.

⁶ Chay allpanta pasaruspanmi Abram chayarurqa Siquem llaqtapi yupaychana sitiokama, chaymi tarikun More lawpi encina sachapa kasqanpi. Chaypiqa cananeokunam yacharqaku.

⁷ Chaypim Abramman Tayta Dios rikuriykuspan nirqa: Miraynikikunamanmi kay allpata qosaq, nispa. Hinaptinmi rikuriykuqnin Tayta Diosta yupaychananpaq huk altarta chaypi ruwarqa.

⁸ Chaymantam pasakurqa Bet-elpa waklawnin intipa qespimunan law orqoman, hinaspam carpanta chaypi hatarichirqa, chay kasqanmantam Bet-el llaqta rikukurqa intipa seqaykunan lawpi, Hai llaqtañataqmi intipa qespimunan lawpi. Chaypim Tayta Diospaq altarta ruwaspan payta hatuncharqa.

⁹ Abrammi chay sitiomanta lloqsispan kaypi chaypi samastin Neguev lawman chayarurqa.

Egipto nacionman Abram chayasqanmanta

¹⁰ Canaán allpapi yachachkaptinmi llumpay muchuy karqa, chayraykum Egipto nacionman Abram ripukurqa chaypiña yachananpaq.

¹¹ Egiptoman chayaykuchkaspanmi warmin Saraita nirqa: Qamqa kuyayllapaq warmim kanki.

¹² Chaynaqa, Egipto runakunam qawaykususpayki ninqaku “payqa warminmi” nispanku. Hinaspachá wañurachiwanqaku qamtañataqchá kawsachisunki.

¹³ Mana wañuchiwanankupaqyá paniy kasqaykita ninki, chaynapi qamrayku allin kanaypaq hinaspa kawsanaypaq, nispa.

¹⁴ Egipto nacionman Abram chayaruptinmi, Egipto runakuna qawarqaku Saraiqa kuyayllapaq warmi kasqanta.

¹⁵ Faraonta kamachikuyninpi yanapaqninkunapas kuyayllapaq warmi kasqanta qawaykuspankum palacioman pusarqaku.

¹⁶ Sarairayku allinta chaskiykuspankum Abramman qoykurqaku ovejankunata, vacankunata, asnonkunata, camellonkunata chaynataq criadonkunatawan criadankunatapas.

¹⁷ Tayta Diosñataqmi Abrampa warmin Sarairayku, Faraonta wasinpi kaqkunatawan hatun ñakariykunawan onqorachirqa.

¹⁸ Chaymi Abramta qayaspan Faraón nirqa: ¿Imatataq kayta ruwaruwanki? Saraqa warmikitaq kasqa ¿imanasqataq mana willawarqankichu?

¹⁹ ¿Imaynanpitaq paniymi nirqanki? Yaqallam paywan casarakuruni; chaynaqa kayqaya kay warmiki, pusaspa kaymanta ripuy, nispa.

²⁰ Chaymi runankunata Faraón kamachirqa Abramtawan warminta hinaspa tukuy kapuqnintinta pusaspa aviamunankupaq.