Gálatas 6 - CHUYA QELLQA La Biblia en Quechua de Ayacucho 2012

Yanapanakuymanta

¹ Wawqe-panillaykuna, pipas huchallikuruptinqa, Espirituman hina kawsaqkunayá Diosman kutirikunankupaq yanapaychik. Chaytaqa llampu sonqollawanyá ruwaychik, kikikitayá qawarikuy, yanqañataq qampas tentasqa kawaq.

² Ima sasachakuynikichik kaptinpas yanapanakuspayá, Jesucristopa kamachikuyninta ruwayman churaychik.

³ Sichum pipas mana imapas kachkaspa hatun tukuspanqa kikillantam engañakuchkan.

⁴ Sapakamam kikinpa vidanta qawakunan. Sichum allin kaspaqa kikillanpaqcha allin, manam hukpa vidanwanqa tupachikunmanchu.

⁵ Imaynam kawsasqanmantaqa sapakamam Diosman cuentata qonqa.

⁶ Diospa palabran chaskiqkunaqa yachachiqnintam imallawanpas yana-pananku.

⁷ Amayá qamkunaqa engañakuychik-chu, Diostaqa manam pipas burlakunmanchu, runaqa imapas tarpusqantam cosechanqa.

⁸ Aychapa munasqallan tarpuqqa aychaman hinallam wañuyta cosechanqa. Chuya Espirituman hina tarpuqmi ichaqa, Chuya Espirituman hina wiñay kawsayta cosechanqa.

⁹ Chaynaqa, imapas allin ruwaytaqa amayá amirusunchu, mana amiruspaqa tiempo chayaramuptinmi cosechata hina premiota chaskisunchik.

¹⁰ Chayraykum, kapuwasqanchikman hina lliwpaq allin kaqkunata ruwananchik, tukuymanta llalliriqtaqa iñiqmasinchikkunapaqyá ruwasunchik.

Pablopa kunasqankunamanta

¹¹ Qawaychikyá, mayna hatun letra-kunawanmi kikiypuni qellqamuch-kaykichik.

¹² Sichum pipas señalachi-kuychik nisuspaykichikqa, runakunawan allin lloqsiyta munaspam obligasuchkankichik, chaynapi Jesucristoqa cruzpi wañusqanmanta willakuspa mana qatikachasqa kanankupaqmi.

¹³ “Señalachikuychik” niqkunapas leypa lliw nisqankunataqa manam cumplinkuchu, señalachikunaykichiktaqa munachkanku cuerpoykichikpi kaq señalmanta alabakunankupaqmi.

¹⁴ Ñoqam ichaqa imamanta alabakuytapas mana munanichu, aswanqa Señorninchik Jesucristopa cruzpi wañusqallanmantam. Cruzpi Cristopa wañusqanraykum kay pachapi mana allin ruwaykunataqa wañusqata hinaña saqeruni, chayna-taqmi ñoqatapas kay pachapi mana allin ruwaykunaqa wañusqata hinaña saqeruwan.

¹⁵ Jesucristopiqa qari kayninpi señalasqa kaypas otaq mana señalasqa kaypas manam valenchu, musoq runaña kaymi valenqa.

¹⁶ Haykam yachachisqayman hina puriqkunatawan Diospa llaqtan Israel-tam nimuykichik: Diospa kuyapayakuyninwan hawkayayninyá qamkunapaq kachun.

¹⁷ Kunanmanta qepamanqa ama pipas sasachakuyta apamuwachunchu, ñoqaqa Señor Jesucristopa marcantam cuerpoypi apachkani.

¹⁸ Wawqe-panillaykuna, Señorninchik Jesucristoyá llapallaykichikman kuyakuyninta sonqoykichikman chaqchurimuchun. Amén.