Filipenses 4 - CHUYA QELLQA La Biblia en Quechua de Ayacucho 2012

Tukuy tiempo kusikunanchikmanta

¹ Kuyasqay wawqe-panillaykuna, Señorninchik Jesucristopiyá allinta takyaychik. Qamkuna qawaykuytam llumpayllataña munachkani, qamkunaqa huk hatun premiom ñoqapaq kankichik.

² Evodiatawan Sintiquetam ruegakuni, Señorninchikman iñiqkuna hina huk sonqolla kanankupaq.

³ Llamkaqmasilláy, qamtañataqmi valekuyki chay paninchikkunata yanapaykunaykipaq. Paykunapas yanapaykuwarqakum Cristomanta allin noticiata willakuptiy, yanapaykuwarqataqmi Clementewan wakin llam-kaqmasiykunapas. Paykunapa sutinqa wiñay kawsay libropi qellqasqañam kachkan.

⁴ Señorninchikwan huklla kaspayá tukuy tiempo kusikuychik, huktawanraqmi nikichik: Kusikuychikyá, nispa.

⁵ Lliw runakunawanyá reqsichikuychik kuyakuq sonqo kasqaykichikta. Señorninchikpa kutimunanqa hichpallañam kachkan.

⁶ Amayá imamantapas afanakuychikchu, aswanqa Diosta mañakuspayá payman lliwta willakuychik hinaspa graciasta qokuychik.

⁷ Diosninchikmi hawkayayta qosunkichik, chaytaqa manam runaqa entiendeyta atinchu, chay hawkayaymi sonqoykichiktawan yuyaymanaynikichikta Jesucristopi waqaychanqa.

Allin kaqkunapi yuyaymananamanta

⁸ Wawqe-panillaykuna, tukuykunay-paqmi nimuykichik, kaykunapiyá yuyaymanaychik: Cheqap kaqpi, respetanapaq kaqpi, allin ruwaypi, mana huchallikuypi, allin rimaypi, imapas allin alabanapaq kaqpi.

⁹ Imam yachachisqayta, chaskisqaykichikta, uyarisqaykichikta hinaspa ñoqapi rikusqaykichiktayá ruwaychik, hinaptinqa hawkayay qokuq Diosmi qamkunawan kanqa.

Filipo llaqtapi iñiqkunapa ofrendanmanta

¹⁰ Llumpayta kusikuspaymi Señorta yupaychachkani yanapawaspaykichik huktawan yuyariwasqaykichikmanta. Kaynata nispayqa piensachkani manam qonqaruwasqaykichiktañachu, aswanqa yanapaykuwanaykichikpaq mana ima ruway atisqaykichiktam.

¹¹ Manataqmi rimachkaniqa muchusqaymantachu, ñoqaqa imapas kapuwaqllaywanmi sonqoyta tiyachini.

¹² Yachanim wakcha kayta chaynataq llapa imayuq kaytapas. Yachanitaqmi saksasqa kaytapas otaq yarqaymanta kaytapas chaynataq tukuy imayuq kaytapas otaq mana imayuq kaytapas.

¹³ Kallpanchawaqniy Cristowanmi tukuy ima ruwayta atini.

¹⁴ Chaywanpas qamkunaqa allintam ruwarqankichik, sasachakuyniykunapi yanapawaspaykichik.

¹⁵ Yachasqaykichikpi hinapas Macedonia lawmanta lloqsispay Cristomanta allin noticiata chayraq willakuptiyqa Filipos llaqtapi yachaq iñiqmasiykunallam ofrendaykichikwan yanapaykuwarqankichik, chaytaqa ruwarqankichik willasqayman-ta graciasta qowaspaykichikmi.

¹⁶ Tesa-lónica llaqtapi kaptiypas iskay-kimsa kutitam imapas necesitasqaypaq ofren-daykichikta apachimuwarqankichik.

¹⁷ Chaynata nispayqa manam chaskiruyllatachu munachkani, aswanqa munachkani yanapawasqaykichikmanta qamkunamanpas Diosqa chaninninpi kutichipusunaykichiktam.

¹⁸ Ñoqaqa puchu-puchutaraqmi chaskiruni. Epafroditowan apachimuwasqaykichikwanmi achkaña kapuwachkan, apachimuwasqaykichikqa karqa Diospaq miski asnaq ofrenda hinam hinaspa paypa agradonpaq kañasqa animal hinam.

¹⁹ Diosniymi tukuy ima pisipususqaykichikta qosunkichik sinchi kapuqninman hina, Jesucristopi tukuy iman kapusqanman hina.

²⁰ ¡Dios Taytanchikyá wiña-wiñaypaq yupaychasqa kachun! Amén.

Cartapa tukuyninmanta

²¹ Jesucristopa sutinpiyá llapallan iñiqkunata rimaykapullawaychik. Ñoqawan kaq wawqe-paninchikkunapas rimaykamusunkichikmi.

²² Kay llaqtapi llapa iñiqkunapas rimaykamusunkichikmi, aswan mastaqa rey Cesarpa wasinpi serviqkunam rimaykamusunkichik.

²³ Señorninchik Jesucristopa kuyapayakuyninyá qamkunawan kachun. Amén.