Filipenses 3 - CHUYA QELLQA La Biblia en Quechua de Ayacucho 2012

Allin ruwaymanta

¹ Chaynaqa, wawqe-panillaykuna, Señorninchikpiyá kusikuychik. Ñoqapaqqa manam sasachu ñawpaq nimusqaykunata huktawan qellqa-muyniyqa.

² Cuidakuychikyá allqo hina kaw-saqkunamanta, mana allin obrerokunamanta hinaspa judío hina qari kayninpi señalakuqkunamanta.

³ Cheqap señalasqakunaqa ñoqanchikmi kanchik, Espiritunpa yanapasqanmi Diosninchikta yupaychanchik, hinaspam Jesucristopi iñispa salvasqa kasqanchikwan alabakunchik, aychapi señalachikuyman mana hapipakuspa.

⁴ Ñoqapas aychapi señalachikuypiqa hapipakuymanmi. Sichum pipas señalachikusqanpi hapipakuptinqa aswanraqchiki ñoqaqa chaykunapi hapipakuyman.

⁵ Nacesqaymanta pusaq punchawninmanmi qari kayniypi señalawarqaku, Benjamín ayllumanta kaq Israelpa castanmi kani, tayta-mamaymantapunim hebreo rimaq kani. Leyman hinañataqmi fariseo karqani.

⁶ Creesqaykuna cheqappuni kasqanta hapispaymi, Jesucristoman iñiqkunata ñakarichinaypaq qatikacharqani; leyta cumplispaymi mana huchayuq hina kawsarqani.

⁷ Kunanmi ichaqa ñawpaqpi allinpaq hapisqaykunatapas Cristorayku mana valeqpaqña hapini.

⁸ Manataqmi chayllachu, aswanqa Señor Jesucristota reqsinayraykum tukuy imata mana valeqpaqña hapini, pay kuyasqayraykutaqmi tukuy imatapas wischuruniña, hinaspam qopata hinaña hapini chaynapi Cristota chaskinaypaq,

⁹ chaynapi paywan hukllaña kanaypaq, manam ley cumplisqayraykuchu mana huchayuqpaqqa chaskisqa kasaq, aswanqa Cristoman iñikuptiymi mana huchayuqpaqña Dios chaskiwan.

¹⁰ Cristotam reqsiykuyta munachkani chaynataq kawsarimusqanpa atiynintapas, ñakarisqanman hina ñakarinaypaq, wañukuspaypas payman rikchakuq kanaypaq,

¹¹ chaynapi Dios munaptinqa ñoqapas wañusqakunapa kasqanmanta kawsarimunaypaq.

Kallpanchakuspa premio chaskinamanta

¹² Nichkaniqa manam tukuy imapas hayparusqaytañachu otaq qespisqaña karusqaytachu, aswanqa kallpanchakuchkanim salvawaqniy Cristopa munasqanman hina kanaypaq.

¹³ Wawqe-panillaykuna, manaraqmi ñoqapas haypaniraqchu aswanqa ñawpaq ruwasqaykunata qonqaruspaymi hamuq kaqkunata ruwanaypaq kallpanchakuchkani.

¹⁴ Maymi chayanaymanmi richkani llallinakuypi kallpachkaq hina, chaynapi Jesucristontakama Dios qayawaspan premio qowasqanta chaskinaypaq.

¹⁵ Chaynaqa, iñiypi haykam kallpayuq kaqkunaqa chay nisqaykunaman hinayá yuyaymanaychik. Imamantapas hukmanta piensaptikichikqa Diosninchikmi reqsichisunkichik.

¹⁶ Ichaqa sapakamayá Diospa palabran yachasqanchikman hina kawsasunchik.

¹⁷ Wawqe-panillaykuna, ñoqatayá qatipakuwaychik hinaspa wakiqnin ñoqa hina allinta kawsaqkunatapas qatipakuychik.

¹⁸ Ñam achka kutitaña nirqaykichik chaymi kunanpas waqaspay huktawan nimuykichik, achkaqmi Cristopa cruzpi wañusqanta despreciachkanku,

¹⁹ paykunapa tukupayninqa ñakariymi. Paykunaqa wiksallanku diosniyuqmi, ruwasqankumanta penqakunankupas kachkaptinmi aswanraq hatun tukunku kay pachapi kaqkunallamanta piensaspanku.

²⁰ Ñoqanchikmi ichaqa hanaq pacha llaqtayuq kanchik, chaynapim Señor Jesucristopa kutimunanta suyachkanchik.

²¹ Paymi kay ñakariq cuerponchikta musoqyachinqa suma-sumaq kanchariq cuerponman rikchakuqtaña, chaytaqa ruwanqa tukuy imapa hawanpi munaychakuq atiyninwanmi.