Ezequiel 8 - CHUYA QELLQA La Biblia en Quechua de Ayacucho 2012

Millakuypaq kaqkunata Ezequiel qawasqanmanta

¹ Soqta kaq watapa soqta kaq killanpa pichqa kaq punchawninpim, Judá nacionpa ancianonkunawan kuska wasiypi tiyachkarqani. Tayta Diosñataqmi qonqaymanta hapiykuwarqa.

² Hinaptinmi runaman rikchakuqta rikururqani; weqawmanta uraymanmi nina kasqa, weqawmanta hanaymanñataqmi llipipipichkaq bronce hina kancharisqa.

³ Chay runaman rikchakuqmi makita hina haywarimuspa chukchaymanta hapiruwarqa, hinaptinmi Diospa Espiritun altoman hoqariruwarqa, hinaspam visionpi Jerusalén llaqtaman aparuwaspan uku lawpi norteman qawaq punkupa ñawpaqninpi churaykuwarqa, chaypim Tayta Diosta piñachiq ídolo kachkasqa.

⁴ Chaypitaqmi Israelpa yupaychasqan Tayta Diospa kanchariyninpas kachkasqa, Quebar mayu patan pampapi rikusqay hinaraq.

⁵ Hinaptinmi Tayta Dios kaynata niwarqa: Runapa churin, norte lawman qawariy, nispa. Chaymi norte lawman qawarispay, chay norte lawpi altarman yaykuna punkupa waqtanpi, Diospa millakusqan idolota rikururqani.

⁶ Huktawanmi niwarqa: Runapa churin, ¿rikuchkankichu Israelpa mirayninkuna waknaña millakuypaq kaqkuna ruwasqankuta? Chaykunata ruwaspankum santuarioymanta karunchakurunku. Ichaqa hatun millakuypaq kaqkunataraqmi qawanki, nispa.

⁷ Chaymantam patiopa punkunman pusaruwarqa, hinaptinmi perqapi huk uchkuta rikurqani,

⁸ chaymi kaynata niwarqa: Runapa churin, chay uchkuta aswanraq hatunyachiy, nispa. Chaymi chay perqata aswanraq uch-kuruspay huk punkuta tarirurqani.

⁹ Chaymantam niwarqa: Yaykuspayki millakuypaq kaqkuna ruwasqankuta qawamuy, nispa.

¹⁰ Chaymi yaykuruspay perqapi dibujasqata rikururqani qasqonpa puriq urukunata, millakuypaq tukuy rikchaq urukunata hinaspa Israelpa yupaychasqan tukuy rikchaq idolokunatapas.

¹¹ Chay-kunapa ñawpaqninpim Israelpa mirayninmanta qanchis chunka ancianokuna kachkasqaku, paykunawantaqmi Safanpa churin Jaazaniaspas kachkasqa; pay-kunaqa sapakamam incienso qontichinayuqkama kachkasqaku, hinaptinmi miskillaña asnariq inciensopa qosnin altoman hoqarikuchkasqa.

¹² Hinaptinmi niwarqa: Runapa churin, ¿qawachkankichum Israelpa mirayninmanta kaq ancianonkunapa pakasqallapi imam ruwasqankuta? Sapakamam idolonkupa capillanpi chaykunata ruwachkanku. Paykunam ninku: “Tayta Diosqa manam rikuwanchikchu, llaqtanchiktapas payqa saqerunñam”, nispanku.

¹³ Chaymantam niwarqa: Chaykunamantapas aswan hatun millakuypaq ruwasqankutaraqmi qawanki, nispa.

¹⁴ Chaymantam Tayta Diospa templonpa norte law punkunman pusaruwarqa. Chaypim llapa warmikuna tiyachkasqaku Tamuz idolomanta waqaspanku.

¹⁵ Chaymi niwarqa: Runapa churin, ¿qawachkankichum? Chaykunamantapas aswan hatun millakuypaq kaqkunataraqmi qawanki, nispa.

¹⁶ Chaymantam Tayta Diospa templonpa uku law pationman aparuwarqa, chaymi pachakuna waqaychanamanta altarman rinapi, yaqa iskay chunka pichqayuq qarikuna kachkasqaku. Paykunam templota qepanchakuruspanku intipa qespimunan lawman pampakama pakchakuykuspanku intita yupaychachkasqaku.

¹⁷ Chaymi Tayta Dios kaynata niwarqa: Runapa churin, ¿qawachkankichum kaykunata? Judapa mirayninkunataqa manam imapas qokunchu kay millakuypaq kaqkuna ruwayninkuqa. Kay naciontapas mana allin ruwayninkuwanmi huntarachinku. Paykunaqa ñataq-ñataqmi piñachiwanku, millakuypaq ruwasqankupa asnaynintam senqayman chaya-chimunku.

¹⁸ Chayraykum ñoqapas paykunaman piñakuyniyta kachaykamusaq, manam paykunataqa llakipayasaqchu; qaparkachaspa qayakamuwaptinkupas manam uyarisaqchu, nispa.