Ezequiel 7 - CHUYA QELLQA La Biblia en Quechua de Ayacucho 2012

Israel nacionpa tukupaynin hichpamusqanmanta

¹ Tayta Diosmi kaynata niwarqa:

² Runapa churin, Israel nacionpi runakunatam ñoqa Tayta Dios kaynata nini: Tukupay punchawmi hichpamuchkanña, kay pachapa tawan lawninpa tukupayninmi chayamuchkanña.

³ Israel nación, tukunayki punchawmi chayamuchkanña, piñakuyniytam kacharimusqayki. Imaynam kawsasqaykiman hinam juzgasqayki, hinaspam millakuypaq kaqkuna ruwasqaykiman hina pagapusqayki.

⁴ Manam llakipayasqaykiñachu, aswanqa imaynam kawsasqaykimantam castigasqayki, hinaspam millakuypaq kaqkuna ruwasqaykimanta pagapusqayki. Chaynapim Tayta Dios kasqayta yachanki.

⁵ Ñoqa Tayta Diosmi kaynata nini: Sasachakuymi hukña-hukña hamuch-kan. Puchukanayki punchawmi chaya-muchkanña.

⁶ ¡Tukupaymi hamuchkan! ¡Contraykipim hatariramun! ¡Cheqap-tapunim puchukanayki punchaw chayamuchkanña!

⁷ Kay nacionpi yachaqkuna, purmachisqa kanaykichikmi chayamuchkanña. Muspaypi hinaña kanaykichik punchawmi chayamuchkanña, manañam orqokunapipas kusikuy kanqañachu.

⁸ Piñakuyniytam qanman kacharimusaq, sonqoypas tiyanankamam piñakuyniyta qampi cumplichisaq. Imaynam kawsasqaykiman hinam cuentata mañasqayki, hinaspam millakuypaq kaqkuna ruwasqaykiman hina pagapusqayki.

⁹ Manam llakipayasqaykiñachu, aswanqa castigasqaykipunim. Mana allin kawsasqaykimanta hinaspa millakuypaq kaqkuna ruwasqaykimantam pagapusqayki. Chaynapim Tayta Dios kasqayta yachanki.

¹⁰ Chay punchawmi chayaramunña. Cheqaptapunim chayaramunña. Mana allin ruwaymi tukuy hinastinpi llanllarikuchkan, hatun tukuymi waytarikuchkan.

¹¹ Mana allin ruwaymi mirakuchkan. Qamkunamantaqa manam chullapas puchunkichikchu, qori-qollqekichikwan tukuy ima kapuqnikichikpas manam puchunqachu. Qamkunamantaqa manam pipas waqanqachu.

¹² Tiempom chayaramunña, chay punchawmi hichparamunña. Imapas rantiqqa ama kusikuchunchu, rantikuqpas ama llakikuchunchu. Israelpa hatun tukuynintam piñakuyniywan castigasaq.

¹³ Imantapas rantikuq runaqa wañunankamam manaña imantapas kutichikunqachu. Paykunawan imam ruwanaytaqa ñam tantearuniña, chaytaqa manam imapas harkanqachu; aswanqa huchankumantam llapallanku wañunqaku.

¹⁴ Guerraman rinankupaqmi trompetata tocaspa tukuy imata alistanqaku, ichaqa manam pipas riq kanqachu, ñoqapa piñakuyniymi paykunapa hawanpi kachkan.

¹⁵ Hawapiqa wañuchinakuyllam kachkan, ukupiñataqmi peste onqoywan yarqay kakuchkan. Campopi kaqkunam espadapi wañunqaku, llaqta ukupi kaqkunañataqmi yarqaywan hinaspa peste onqoywan wañunqaku.

¹⁶ Wañuymanta lluptiqkunapas qechwa palomakuna hinam orqokunaman ayqenqaku, ichaqa huchankuraykum lliw wañunqaku.

¹⁷ Makinkupas mana kallpayuqmi rikurirunqa, moqonkupasmanchakuymantam katkatatanqa.

¹⁸ Llakimantam qachqa pachawan chura-kunqaku, manchakuymantam katkatatanqaku, uyankupas penqakuymantam pukayanqa, umankutapas kachiy-kachiytam rutukunqaku.

¹⁹ Qollqenkutapas callemanmi wis-chunqaku, qorinkutapas wanuta hinam wischunqaku. Tayta Diospa piñakuyninmantaqa manam qori-qollqenkupas librayta atinqachu. Mikuspapas manam saksanqakuchu, nitaqmi wiksankupas huntanqachu. Qorinkum paykunataqa mana allinman wichiykachirqa.

²⁰ Suma-sumaq alhajankuwanmi paykunaqa hatun tukuqllaña rikurirurqaku, chaykunawanmi millakuypaq idolokunata ruwakurqaku. Chayraykum chay alhajantaqa qopata hinaña ruwarusaq.

²¹ Chaykunataqa huklaw llaqtayuqkunawanmi suwarachisaq, kay pachapi mana allin ruwaq runakunawanmi qechurachisaq, paykunam millakuypaqtaña ruwarunqaku.

²² Kay llaqtata qepancharuptiymi temploytapas millakuypaqtaña ruwarunqaku. Salteaqkunam yaykuruspanku millakuypaqtaña ruwarunqaku.

²³ Huk cadenata ruway, kay llaqtapiqa wañuchinakuywan yawar chaqchuy hinaspa mana allin ruwanakuyllañam kakuchkan.

²⁴ Huklaw nacionkunamantam mana allin runakunata pusamusaq, hinaptinmi llaqtapi wasikunatapas paykunaña hapikuykunqaku. Chaynatam atiyniyuqkunapa hatun tukuyninta tukusaq, santuarionkupas millakuypaq ruwasqam kanqa.

²⁵ Paykunapiqa manchakuymi munaychakunqa, hawkayayta maskaspankupas manam tarinqakuchu.

²⁶ Paykunamanqa sasachakuymi manaña tukuyta chayamunqa, mana allin willakuykunam ñataq-ñataq chayamunqa. Yanqapaqmi profetatapas maskanqaku Diospa kaqta imallatapas willananpaq, yachachikuq sacerdotekunapas manañam kanqachu, allin consejakuq ancianokunapas manañam kanqachu.

²⁷ Reypas sinchi llakipim tarikunqa, kamachikuqpas pasaypaqtam hukmanyarunqa, llapa runakunapa makinkupas katkatatanqam. Paykunataqa imaynam kawsasqankuman hinam ñakarichisaq, imaynam juzgasqankuman hinataqmi ñoqapas juzgasaq. Chaynapim Tayta Dios kasqayta yachanqaku, nispa.