Ezequiel 5 - CHUYA QELLQA La Biblia en Quechua de Ayacucho 2012

¹ Chaymantam niwarqa: Runapa churin, ñawchiyachisqa cuchillota hapispa chukchaykita rutukuspa barbaykitapas siksikuy; hinaspa balanzapi chay chukchaykita kimsaman rakiy.

² Llaqta atacayta tukuruspaykim huknin rakisqayki chukchaykita llaqta chawpinpi kañanki. Chaymantam huknin rakisqayki chukchaykita llaqtapa muyuriqninpi kuchupanki. Huknin rakisqayki chukchaykitañataqmi wayrawan apachinki. Ñoqam espada makintin paykunata qatikachasaq.

³ Rutukusqayki chukchaykimantam aschallata hapiykuspa pachaykipa patanman watanki.

⁴ Chay aslla chukchamantapas wakintam ninapi kañanki. Chaymantam Israelpa miraykunapa contranpi nina lloqsinqa.

⁵ Ñoqa Tayta Diosmi kaynata nini: Kaymi Jerusalén llaqta. Jerusalentaqa llaqtakunapa hinaspa nacionkunapa chawpinpim churarqani.

⁶ Jerusalenmi ichaqa kamachikuyniykunata chaynataq decretoykunatapas mana kasukurqachu. Payqa lliw nacionkunamantapas chaynataq muyuriqninpi llaqtakunamantapas aswan mana allinraqmi rikurirurqa, kamachikuyniykunatapas qepancharuspanmi mana decretoykunaman hinachu kawsarqa, nispa.

⁷ Chayraykum ñoqa Tayta Dios kaynata nini: Qamkunaqa muyuriqnikichikpi nacionkunamantapas pasaypaq mana kasukuqmi kankichik, manam kamachikuyniykunaman hinachu kawsarqankichik. Manataqmi muyuriqnikichikpi nacionkunapa kamachikuyninman hinallapas kawsarqankichikchu, nispa.

⁸ Chayraykum ñoqa Tayta Dios kaynata nini: Ñoqapas qampa contraykipi sayarispaymi wakin nacionkuna qawachkaptin sentenciaspay castigasqayki.

⁹ Qamtaqa ruwasqayki mana haykapipas ruwasqayta hinam, manataqmi chaynataqa huktawanqa ruwasaqñachu. ¡Mayna millakuypaqmi ruwasqaykikunaqa!

¹⁰ Chayraykum chawpikipiqa tayta-mamakunapas wawa-churinkuta mikunqaku, wawa-churinkunapas tayta-mamankutam mikunqaku. Ñoqam qamta juzgasqayki, hinaspam haykam puchuqkunatañataq tukuy hinastinman cheqerachisaq, nispa.

¹¹ Ñoqa Tayta Diosmi kikiyrayku jurani: Qamkunam cheqnisqay idolokunawan temployta millakuypaqta ruwarqankichik, chayraykum qamkunatapas mana llakipayarispay ñakarichisqaykichik, manañam kuyapayasqaykichikñachu.

¹² Qamkuna-manta kimsaman rakisqapa hukninmi peste onqoywan hinaspa yarqaywan llaqta ukupi wañunqaku. Huknin rakiñataqmi espadawan llaqtapa muyuriqninpi wañuchisqa kanqaku. Chaymanta puchuqkunatañataqmi tukuy hinastinman cheqerachisaq. Ñoqaqa espada makintinmi paykunata qatikachasaq.

¹³ Chaynapim ñoqapa piñakuyniy cum-plikunqa, contraykichikpi piñakuyniy taniruptinmi sonqoypas tiyarunqa. Paykunapa contranpi piñakuyniyta kachariptiymi yachankichik, piñakuyniypi ñoqa Tayta Dios rimasqayta.

¹⁴ Jerusalén llaqta, pasaypaqtam purmachisqayki, muyuriqniki nacionkunapa chawpinpim penqayman churasqayki, chaynapi chayninta puriqkunapas qawanankupaq.

¹⁵ Llumpay piñakuyniywan chaynataq rabiakuyniywan hinaspa hatunmanta qaqchaspay castigaptiymi, burlakuspa asipayasqa kanki; qamta imam ruwasqayta qawaspankum muyuriqnikipi nacionkunapas manchakuwayta yachan-qaku. Ñoqa Tayta Diosmi chaynata nini.

¹⁶ Contraykichikpim wañuchikuq flechay-kunata hinaraq yarqayta kacharimusaq, yarqaytawan puchukayta hinaspa muchuytam kachaykamusqaykichik.

¹⁷ Cheqaptapunim yarqayta, onqoyta, purun animalkunata hinaspa wañuyta qamkunaman apachimusqaykichik hinaptinmi mana wawa-churiyuqtaña saqerusunkichik. Qamkunamantam wakiqnikichikta guerrapi wañuchisqaykichik. Ñoqa Tayta Diosmi chaynata nini.