Ezequiel 45 - CHUYA QELLQA La Biblia en Quechua de Ayacucho 2012

Tayta Diosllapaqña sapaqchasqa sitiomanta

¹ Sapa aylluman herencia qonaykichikpaq allpata sorteaspaykichikqa, ñoqa Tayta Diosmanpas qowankichikmi; chay allpayqa kanqa chunka iskayniyuq kilómetro parten largoyuqmi, anchonñataqmi kanqa chunka kilómetro. Chaytam ñoqapaq sapaqchankichik.

² Chay allpaymantam temploypaq allpata sapaqchankichik; chay allpaqa tawan lawninmanmi iskay pachak pichqa chunka metroyuqkama kanqa. Chay allpapa muyuriqninpim iskay chunka pichqayuq metro anchoyuq libre allpata puchunkichik.

³ Ñoqa Tayta Diospaq sapaqchasqaykichik allpapim chunka iskayniyuq kilómetro parten largoyuq chaynataq pichqa kilómetro anchoyuq allpata rakinkichik. Chay allpaqa ñoqallapaqña sapaqchasqam kanqa, chaypim temploy ruwasqa kanqa.

⁴ Chay sapaqchasqa allpam kanqa temploypi ñoqa Tayta Diosta serviwaqniy sacerdotekunapaq, chaypim wasinkuta hatarichispa yachanqaku. Chay allpaqa kanqa temploypaq sapaqchasqam.

⁵ Sapaqchankichiktaqmi chunka iskayniyuq kilómetro largoyuq chaynataq pichqa kilómetro anchoyuq allpatapas. Chay allpam kanqa temploypi servikuq levitakunapaq, chaypim wasinkuta hatarichinqaku.

⁶ Llaqtapaqpas rakinkichiktaqmi, chay allpapa largonmi kanqa chunka iskayniyuq kilómetro parten, anchonñataqmi kanqa iskay kilómetro parten. Chay allpaqa kanqa sapaqchapuwasqaykichik allpapa waqtanpim, chay allpam Israelpa llapallan mirayninkunapaq kanqa.

Kamachikuqpa allpanmanta

⁷ Allpataqa rakinkichiktaqmi kamachikuqmanpas. Chayqa kanqa ñoqapaq sapaqchasqa allpaykunapa hinaspa llaqtapaq rakisqa allpapa iskay law waqtanpim; hukninmi kanqa intipa seqaykunan lawpi, hukninñataqmi kanqa intipa qespimunan lawpi. Chay allpapa sayayninmi kanqa hukkaqnin aylluman qosqaykichik allpa hina sayayniyuq.

⁸ Chay allpam kanqa Israelpi kama-chikuqpaq, chaynapim kamachikuqkunaqa Israel runaykunata manaña ñakarichinqakuñachu, aswanqa Israelpa mirayninkunamanmi ayllunkuman hina yachananku allpata qonqaku.

Kamachikuqpaq leykunamanta

⁹ Ñoqa Tayta Diosmi kaynata nini: Israel nacionpi kamachikuqkuna, amaña llaqtayta ñakarichiychikchu, nitaq allpankutapas qechuychikchu. Qamkunaqa ama pimanpas sayapakuspa allin arreglota ruwaychik. Amaña llaqtaypa allpanta suwakuychikchu. Ñoqa Tayta Diosmi chaynata nini.

¹⁰ Tupuykichikwan balanzaykichikpas ama suwakuqyá kachun.

¹¹ Kawsaykuna tupunawan tomanapaq kaqkuna tupunaqa iguallam kanqa; iskay pachak iskay chunka litro yaykuq homermi kanqa tukuy ima tupukunapa maman. Tomanapaq kaqkuna tupuna batom kanqa iskay chunka iskayniyuq litro yaykuq. Harinakuna tupuna efam kanqa iskay chunka iskayniyuq kilo yaykuq.

¹² Llasaqkunata pesanankupas kaynam kanqa: Iskay chunka gera sutiyuq tupunam kanqa huk siclo, huk siclom llasanqa chunka hukniyuq gramota, soqta chunka siclom kanqa huk mina.

¹³ Qowanaykichik ofrendakunapas kaynam kanqa: Trigota otaq cebadata cosecharuspapas soqta montonmanmi iguallatakama rakinkichik, hinaspam huknin montonta apamuwankichik.

¹⁴ Aceite hurqosqaykichiktapas pachakman iguallatakama rakiruspam hukninta ñoqaman apamuwankichik.

¹⁵ Israel nacionpi allinnin pastokunata mikuq ovejakunatapas iskay pachakmantam hukta rakipuwankichik. Chay ovejam kanqa kawsaykunamanta ofrendakunapaq, lliw kañana sacrificiopaq, ñoqawan allinlla kasqaykichikmanta ofrendapaq, hucha pampachana ofrendapaq. Ñoqa Tayta Diosmi chaynata nini.

¹⁶ Chay ofrendakunataqa Israel nacionpi llapallan runakunam chay nacionpi kamachikuqman qonqaku.

¹⁷ Chay kamachikuqñataqmi musoq killa fiestapi, samana punchawkunapi chaynataq Israelpa hatun fiestankunapi lliw kañana sacrificiotapas animalkunata qonqa, kawsaykunamanta ofrendapaq hinaspa tallinanku vinotapas. Paytaqmi hucharayku sacrificiotapas, kawsaykunamanta ofrendatapas, ñoqawan allinlla kasqaykichikmanta ofrendatapas hinaspa lliw kañana sacrificiota ofrecewanqa, chaynapi Israelpa huchankuna pampachasqa kananpaq.

Pascua fiestamanta

¹⁸ Ñoqa Tayta Diosmi kaynata nini: Punta kaq killapa punta kaq punchawninpim, templota chuyanchanaykichikpaq allin sano malta torillota ofrecemuwankichik.

¹⁹ Sacerdotem hucharayku ofrecewasqaykichik animalpa yawarninta chaskiykunqa, hinaspam templopa punkunpi pilarkunaman llusinqa, llusinqataqmi altarpa tawan esquinankunamanpas chaynataq templopa uku law pationpa punkunpa pilarninkunamanpas.

²⁰ Chaynallatataqmi ruwanqa chay killapa qanchis kaq punchawninpipas, chaytaqa ruwanqa pantaruq hinaspa mana yachastin imawanpas huchallikuruq runakunaraykum, chaynatam templota chuyanchanqa.

²¹ Chay punta kaq killapa chunka tawayuq punchawninpim Pascua fiesta ruwayta qallarinkichik, hinaspam qanchis punchawpuni mana levadurayuq tantata mikunkichik.

²² Chay punchawpim, chay kamachikuq kikinpa huchanmantawan llapallan runakunapa huchanmanta huk malta torota ofrecewanqa.

²³ Chay qanchis punchaw fiestapim, qanchis malta torokunatawan qanchis carnerokunata sapa punchaw ofrecewanqa, chaykunaqa kanqa sanokamam. Hucharayku ofrendapaqpas sapa pun-chawtaqmi huk chivatota ofrecewanqa.

²⁴ Sapa malta torota chaynataq huk carnerota ofrecewasqankumanmi yapan-qaku iskay chunka kilo kawsaytawan kimsa litro parten aceiteta.

Ramada fiestamanta

²⁵ Qanchis kaq killapa chunka pichqayuq punchawninpi ramada fiesta qallaykusqanmantam, qanchisnintin punchawpuni chay kamachikuq ofrecewanqa hucharayku ofrendakunata, lliw kañana sacrificiokunata, kawsaykunamanta ofrendakunata hinaspa aceitemanta ofrendakunatapas.