Ezequiel 43 - CHUYA QELLQA La Biblia en Quechua de Ayacucho 2012

Temploman Diospa kanchariynin huntaykusqanmanta

¹ Chaymantam chay runaqa intipa qespimunan lawpi punkuman pusaruwarqa.

² Hinaptinmi rikurqani Israelpa yupaychasqan Tayta Diospa kanchariynin intipa qespimunan lawmanta hamuchkaqta. Qapariyninpas lloqllapa qapariynin hinaraqmi uyarikurqa, chaymi kanchariyninwan kay pachapas sumaqllataña achkirirqa.

³ Chay visionpi rikusqayqa karqa Jerusalén llaqtata Tayta Dios tuñichinanpaq hamusqanta rikusqay hinaraqmi chaynataq Quebar mayupa patanpi qawasqay hinaraqmi. Chaymi pampaman kumuykurqani.

⁴ Tayta Diospa kanchariyninmi chay temploman intipa qespimunan law punkunta yaykumurqa.

⁵ Diospa Espiritunñataqmi hoqariruwaspan templopa uku law pationman aparuwarqa, hinaptinmi rikurqani chay temploman Tayta Diospa kanchariynin huntaykusqanta.

⁶ Chay runam waqtaypi sayaykurqa, hinaptinmi templomanta Tayta Diospa rimapayamuwasqanta uyarirqani.

⁷ Paymi kaynata nimuwarqa: Runapa churin, kay sitioqa tiyanaypa kanan hinaspa chakiykunapa sarupakunan sitiom, kaypim Israelpa mirayninkunapa chawpinpi wiñaypaq yachasaq. Israelpa mirayninkunawan reyninkupas manañam chuya sutiytaqa penqayman churanqakuñachu, nitaqmi wañusqa reyninkutapas yupaychanqakuñachu.

⁸ Manañataqmi palacionkupa punkuntapas temploypa punkunmanta huk perqallapa rakiykusqantaqa hatarichinqakuñachu. Paykunam millakusqay kaqkunata ruwaspanku chuya sutiyta penqayman churarqaku; chayraykum ñoqapas paykunapa contranpi piñakuspay wañurachirqani.

⁹ Kunanyá qepanchawayninkuta saqespa wañusqa reyninku yupaychayta saqechunku, hinaptinmi paykunapa chawpinpi wiñaypaq kawsasaq.

¹⁰ Chaynaqa, runapa churin, Israelpa mirayninkunaman kay templopa imaynam kasqanmanta, planonkunamanta hinaspa sayayninkunamanta willay, chaynapi mana allin ruwasqankumanta penqakunankupaq.

¹¹ Sichum tukuy mana allinkuna ruwasqankumanta penqarikuptinkuqa, imaynam kay templo ruwasqa kananta willay, willaytaq maypim tukuy imankuna tarikunanta, maypim yaykuna punkun hinaspa lloqsina punkun kananta, imaynam chay templo kananta hinaspa ruwayman churananku kamachikuykunatapas. Dibujaspayki kaykunata qawachiy chayman hina ruwanankupaq. Kamachikuykunatapas qellqaytaq ruwayman churanankupaq.

¹² Templomanta kamachikuyqa kaymi: Moqopa hawanpi tarikuq templopa muyuriqninmi Diosllapaqña sapaqchasqa kanqa.

Altarmanta

¹³ Altarpa sayayninta tupuruptinkum kayna kasqa: Muyuriqninpim kasqa huk yarqa, parte metro masnin ukuyuq hinaspa parte metro anchoyuq; chay yarqapa muyuriqninpi patakninñataqmi kasqa iskay chunka pichqayuq centímetro. Chay altarpa tiyananñataqmi kayna kasqa:

¹⁴ Yarqapa uku pampanmanta cimiento patankamam kasqa huk metro sayayniyuq, anchonñataqmi kasqa parten metro. Chay altarpa chawpinmi kasqa iskay metro sayayniyuq, anchonñataqmi kasqa parten metro.

¹⁵ Altarpi ninapa kanan otaq sacrificio kañananku patakpa sayayninmi kasqa iskay metro, tawan esquinanpiñataqmi kasqa tawa waqrakuna.

¹⁶ Chay ninapa kananpas tawan lawmi kasqa chay sayayniyuqkamalla, sapakamam kasqa soqta metroyuqkama.

¹⁷ Chay altarpa iskay kaq patakninpas tawan lawninmi kasqa chay sayayniyuqkamalla, sapakamam kasqa qanchis metroyuqkama; muyuriqninpi patakñataqmi kasqa iskay chunka pichqayuq centímetro. Altarpa muyuriqninpi yarqam kasqa parten metro anchoyuq. Chay altarman seqaq gradasñataqmi intipa qespimunan lawman qawasqa.

¹⁸ Chaymantam niwarqa: Runapa churin, ñoqa Tayta Diosmi kaynata niki: Altar ruwananku tiempo chayaramuptinmi kay kamachikuyman hina ruwanqaku: Altarpa hawanpim lliw kañanapaq huk animalta ofrecewanqaku, hinaspam kay altarta yawarwan challanqaku.

¹⁹ Leví casta Sadocpa mirayninmanta kaq sacerdotekunamanmi huk torillota qonki, wañuchispanku hucharayku ofrendata ofrecemuwanankupaq, paykunallam serviwanankupaqqa asuykamuwanqaku. Ñoqa Tayta Diosmi chaynata nini.

²⁰ Chaymantam yawarninta asniqta hapiykuspa altarpa tawan waqrankunaman llusinki; llusinkitaqmi iskay kaq patakninpa tawan esquinankunamanpas hinaspa muyuriqnin patanmanpas; chaynatam chay altarta llapa runakunapa huchanmanta chuyanchanki.

²¹ Chay hucharayku sacrificiota hapiykuspaykim, templomanta hawaman hurqospa, chaypaq akllasqa sitiopi kañanki.

²² Paqarinnintin punchawñataqmi, hucharayku ofrenda kananpaq huk sano allin chivatota ofrecemuwanki; llapa sacerdotekunañataqmi imaynam malta torillowan ruwasqankuta hina ruwaspanku altarta chuyanchanqaku.

²³ Chuyanchayta tukuruspaykim, sano malta torotawan sano carnerota ofrecemuwanki.

²⁴ Chay animalkunatam ñoqa Tayta Diosman ofrecemuwanki. Llapa sacerdotekunam kachiwan kachichaykuspanku lliw kañana sacrificiota ofrecemuwanqaku.

²⁵ Qanchis punchawnintinmi hucharayku ofrendapaq huk chivatota, malta torota hinaspa carnerota wañuchinki; chaykunaqa sanokamam kanqa.

²⁶ Qanchis punchawpunim llapa sacerdotekuna chay altarta runakunapa huchanmanta chuyanchanqaku, chaynapim ñoqallapaqña sapaqchanqaku.

²⁷ Chay qanchisnintin punchawkuna tukuruptinmi, pusaq kaq punchawmanta qepaman llapa sacerdotekuna qallaykunqaku lliw kañana sacrificiokunatawan ñoqa Tayta Dioswan allinlla kasqaykichikmanta sacrificiokuna ofreceyta; hinaptinmi chaskisqaykichik. Ñoqa Tayta Diosmi chaynata nini.