Ezequiel 4 - CHUYA QELLQA La Biblia en Quechua de Ayacucho 2012

Jerusalén llaqta atacasqa kananmanta

¹ Chaynaqa, runapa churin, huk adobeta hapispa ñawpaqnikiman churay hinaspa chaypa hawanpi Jerusalén llaqtata dibujay.

² Chay llaqtapa muyuriqnintam ama ayqenankupaq hina perqarunki. Murallankunapa qepanpiñataqmi rampata ruwarunki. Llaqtapa muyuriqninpim tuñichinapaq machu-machu takaq qerukunata churarunki.

³ Chaymantam qamtawan llaqtata rakinananpaq fierromanta planchata hapispa murallata hina sayachinki, hinaspam llaqtapa ñawpaqninpi atacanaykipaq hina churakunki. Chaymi Israelpa mirayninkunapaq huk señal kanqa.

⁴ Ichoq lawman waqtapaspaykim Israelpa mirayninkunapa huchanta qepikunki. Hayka punchawpas chaylawman waqtapasqaykiman hinam Israelpa huchankunata apanki.

⁵ Kimsa pachak isqon chunka punchawmi ichoq lawman waqtaparayanki, kimsa pachak isqon chunka watam Israelpa mirayninkunapas contraypi huchallikurqaku.

⁶ Chayna punchawkunata cumpliruspaykiñataqmi alleq lawmanña waqtapanki, chaynata ruwaspam Judá nacionpa huchankunata tawa chunka punchaw apanki. Huk watapi hucha ruwasqantam huk punchaw apanki.

⁷ Hinaspam enemigonkunapa muyurusqan Jerusalén lawman muyurispa, brazoykita qempikuspa chay llaqtapa contranpi ñoqapa rantiypi profetizanki.

⁸ Kunanmi waskakunawan watarusqayki chaynapi mana maylawmanpas muyuyta atinaykipaq. Chaynam kanki atacasqayki punchaw tukunankama.

⁹ Trigota, cebadata, habasta, lentejata, mijota hinaspa avenata apamuy. Chaykunata huk mankallapi chaqruspa tantakunata ruway. Hinaspam chay kimsa pachak isqon chunka punchaw ichoq lawman waqtapaspayki mikunki.

¹⁰ Sapa punchawmi horallanpi cuarto kilollata mikunki.

¹¹ Yakutapas tupusqallatam horallanpi tomanki. Huk punchawmi medio litrollata tomanki.

¹² Mikunaykipaqmi cebadamanta tantata ruwanki. Chaytaqa runapa chakisqa ispayninwanmi kankanki. Kankankiqa llapa runapa rikusqantam, nispan.

¹³ Tayta Diosqa niwarqataqmi: Israelpa mirayninkunata huklaw nacionkunaman presota apachiptiymi kayna qacha tantakunata mikunqaku, nispa.

¹⁴ Chaymi ñoqañataq nirqani: Dios Taytalláy, ñoqaqa manam haykapipas kayna millakuypaq kaqkunataqa mikurqanichu. Kikillanmanta wañuq animalpa aychantawan purun animalpa tisapasqan aychata hinaspa millakuypaq aychakunataqa manam haykapipas mikurqanichu, warma kasqaymantapas manam simiymanqa chayarqachu, nispay.

¹⁵ Hinaptinmi payñataq niwarqa: Chaynaqa, tantaykita runapa chakisqa ispayninwan ruwanaykimantaqa animalpa karkanwanñayá ruwakuy, nispa.

¹⁶ Chaymantam niwarqa: Runapa churin, ñoqam Jerusalén llaqtapi mikuykunata chinkarachisaq. Paykunaqa tantatapas tupusqallatañam llakillawanña mikunqaku, yakutapas tupusqallatañam manchakuyllawanña tomanqaku.

¹⁷ Chaynapim tantankupas yakunkupas pisiptin mancharisqallaña qawanakunqaku. Paykunaqa mana allin ruwasqankuraykum ismuchkaq hina tukurunqaku, nispa.