Ezequiel 34 - CHUYA QELLQA La Biblia en Quechua de Ayacucho 2012

Israelpa mana allin michiqninkunamanta

¹ Tayta Diosmi rimapayawaspan kaynata niwarqa:

² Runapa churin, Israelpa michiqninkunapa contranpi ñoqa Tayta Diospa nisqayta kaynata niy: ¡Israelpa michiqninkuna, kikillaykichikta michikuqkuna, imallapiraq rikukunkichik! Michiqkunaqa ovejakunatam michinanku.

³ Ovejakunapa lechentam tomakunkichik, millwanmantam pachata ruwakunkichik, poqosqan kaqkunatañataqmi nakakuykuspa mikukunkichik, ovejakunamantam ichaqa mana imapas qokusunkichikchu.

⁴ Eqoyaruq ovejakunatapas manam kallpanchankichikchu, onqoruqtapas manam hampiykunkichikchu, chakin pakikuruqtapas manam wataykunkichikchu, chullaruqkunatapas manam kutiykachinki-chikchu, chinkaruqkunatapas manam mas-kamunkichikchu, aswanqa maqa-maqaris-pam paykunapi munaychakunkichik.

⁵ Chayray-kum llapa ovejakunaqa cheqesqa mana mi-chiqniyuq kachkanku.

⁶ Orqokunapim, alto mo-qokunapim cheqeruspa llutanpi purillachkanku, tukuy hinastinman cheqesqam kach-kanku, manam pipas maskaqninku kanchu, nitaqmi tapuyllapas tapukunkuchu.

⁷ Chaynaqa, llapa michiqkuna, ñoqa Tayta Diospa nisqayta uyariychik:

⁸ Sutiyraykum kaynata nini: Mana michiqniyuq kasqankuraykum ovejaykunata tukuy rikchaq purun animalkuna hapiruspa mikukurunku. Ovejay michiqkunapas manam maskamunkuchu; kikillanku michikuspankum ovejaykunataqa mana michinkuchu

⁹ Chaynaqa, llapa michiqkuna nisqayta uyariychik.

¹⁰ Ñoqa Tayta Diosmi kaynata nikichik: Michiqkuna, contraykichikpim kachkani, qamkunamantam ovejaykunata mañasqaykichik; manaña michiqnin kanaykichikpaqmi qarqorusqaykichik, chaynapim manaña kikillaykichiktaqa michikunkichikñachu. Ovejaykunatam simikichikmanta qechurusqaykichik, chaynapi manaña mikunaykichikpaq.

Allin michiqmanta

¹¹ Ñoqa Tayta Diosmi kaynata nini: Kikiyñam ovejaykunata maskamuspay nanachikusaq.

¹² Imaynam huk michiq ovejankuna cheqeruptin maskamun, chaynam ñoqapas ovejaykunata maskamusaq; hinaspaymi tutayaq yana puyupa tapaykusqan punchawpi tukuy hinastinman cheqerusqankumanta libramusaq.

¹³ Huklaw nacionniyuq runakunapa chawpinmantam huñumusaq, hinaspam kikinkupa allpanman pusamuspay Israel law orqokunapi, yaku patan wayqokunapi, runapa yachanan pampakunapi michisaq.

¹⁴ Suma-sumaq pastokunapi michiptiymi kanchankupas kanqa Israel law orqonkunapi; chaypim sumaq kanchakunapi samaspanku Israel orqokunapi wiñaq sumaq pastokunata mikunqaku.

¹⁵ Kikiyñam ovejaykunata michisaq, kikiytaqmi samanankumanpas qatisaq. Ñoqa Tayta Diosmi chaynata nini.

¹⁶ Chinkasqa ovejakunatam maskamusaq, chullaruqtam kutichimusaq, chakin pakisqakunatam wataykusaq, eqoyasqakunatam marqarikusaq. Poqosqakunatawan kallpasapankunatam ichaqa puchukarachisaq, imam kaqman hinam michisaq.

¹⁷ Ovejallaykuna, qamkunatam ichaqa ñoqa Tayta Dios kaynata nikichik: Ñoqaqa allin arregloman hinam juzgasqaykichik carnerokunatapas chaynataq chivatokunatapas.

¹⁸ ¿Allinpaqchu hapinkichik allinnin pastota mikukuruchkaspa puchuqnintañataq saruparuyta? ¿Allinpaqchu hapinkichik chuya yakuta tomakuruchkaspa puchuqnintañataq putkacharuyta?

¹⁹ Chaynapim ovejaykunaqa qamkunapa sarupasqaykichikta mikuspanku putkacharusqaykichik yakutaña tomanku.

²⁰ Chayraykum ñoqa Tayta Dios kaynata nikichik: Ñoqam wira ovejakunatawan tulluyasqa ovejakunata allin arreglota ruwasaq.

²¹ Qamkunam eqoyasqa ovejakunatapas hombroykichikwan tanqaykarinkichik hinaspam waqrapaspaykichik kayman chayman cheqerachinkichik.

²² Ichaqa kikiymi ovejaykunata libramusaq, manañam pipas suwanqañachu. Ñoqam ovejapurata allin arreglota ruwasaq.

²³ Ñoqam ovejaykuna michiqta hatarichisaq, payñam ovejaykunata michinqa. Payqa serviqniy Davidmi, payñam michiqninku kaspa ovejaykunata nanachikunqa.

²⁴ Ñoqa Tayta Diosmi paykunapa Diosnin kasaq, serviqniy Davidñataqmi kamachiqninku kanqa. Ñoqa Tayta Diosmi chaynata nini.

²⁵ Ovejaykunawanmi hawkaña kawsakunankupaq huk pactota ruwasaq. Mikukuq purun animalkunata nacionninkumanta chinkarachiptiymi chunniqpipas hawkaña kawsakunqaku, montekunapipas hawkañam puñukunqaku.

²⁶ Akllakusqay orqopa muyuriqninpi paykunata churaykuspaymi bendeciykusaq, paratapas tiempollanpim chaya-chimusaq, chay paraqa hatun bendicionmi kanqa.

²⁷ Campopi sachakunapas sumaqllatañam rurunqa, chakrapas achkanpim rurunqa, hinaptinmi paykunaqa chakrankupiña hawka kawsakunqaku. Servichikuqninku nacionkunapa yugo churasqanta pakiruspa libraykuptiymi Tayta Dios kasqayta yachanqaku.

²⁸ Huklaw nacionniyuq runakuna-pas manañam paykunapiqa munaychakunqañachu, nitaqmi purun animalkunapas mikunqañachu. Manaña pipapas manchachisqanmi hawkaña kawsakunqaku.

²⁹ Ancha ruruq allpata paykunaman qoykuptiymi yarqaymantaqa manaña ñakarinqakuñachu, nitaqmi huklaw nacionkunapas paykunataqa asipayanqakuñachu.

³⁰ Chaynapim yachanqaku ñoqa Tayta Dios paykunawan kasqayta; paykunam llaqtay kanqaku ñoqañataqmi Diosninku kasaq. Ñoqa Tayta Diosmi chaynata nini.

³¹ Runaykunaqa ovejaykunam kankichik, michinay pampapi kaq ovejaykunam kankichik, ñoqañataqmi Diosnikichik kani. Ñoqa Tayta Diosmi chaynata nini.