Ezequiel 31 - CHUYA QELLQA La Biblia en Quechua de Ayacucho 2012

Rey Faraonqa sachaman tupachisqa kasqanmanta

¹ Chunka hukniyuq watapa kimsa kaq killanpa punta kaq punchawninpim Tayta Dios rimapayawaspan kaynata niwarqa:

² Runapa churin, Egipto nacionpa reynin Faraonta llapallan runankunatawan kaynata niy: ¿Pimantaq hatun tukuq kayniki tupachisqa kanman?

³ Líbano lawpi cedro sacha kaqlla Asiria nacionta qawariy. Chay sachaqa sumaq kallmasapallañam karqa, kallmasapa hatun sacham karqa, kallmankunapas puyukamaraqmi hayparqa.

⁴ Para yakum chay sachata wiñachirqa, allpa ukupi yakukunam hatunyachirqa, mayunkunapas sapinpa muyuriqnintam kallparqa, yakunkunapas chay allpapi sachakunatam parqorqa.

⁵ Chayraykum chay sachaqa montepi wakin sachakunamantapas aswan hatuntaraq wiñarurqa, kallmankunapas miraruspanmi llumpayta mastarikurqa.

⁶ Kallmankunapipas tukuy rikchaq alton pawaq urpikunam qesachakurqaku, llantuyninpipas tukuy rikchaq purun animalkunam wachakurqaku. Llantuyninpiqa achkallaña nacionkunam yachakurqaku.

⁷ Hatu-hatun kasqanraykum chay sachaqa sumaqllaña karqa, kallmankunapas hatunmi karqa. Sapinkuna achkallaña yakuman haypasqanraykum chaynaqa karqa.

⁸ Diospa huertanpi cedro sachakunapas manam chay sacha hinachu karqa, ciprés sachakunapa kallmanpas manam chay sachapa kallman hinachu karqa. Diospa huertanpi suma-sumaq sachakunapas manam chay sachamanqa rikchakurqachu.

⁹ Ñoqam chay sachataqa suma-sumaq kallmasapata ruwarqani, Edén lawpi Diospa huertanpi sachakunapas envidiakurqakum paymantaqa, nispa.

¹⁰ Ñoqa Tayta Diosmi kaynata nini: Chay sacham llumpayta wiñarurqa, puntankunapas puyukamaraqmi cha-yarqa, sayayninman hinam hatuncha-kuyta qallaykurqa.

¹¹ Chayraykum huklaw nacionpa kamachiqninman qoykusaq, chaynapim paytapas mana allin ruwasqanmanta chay reyqa ñakarichinqa. Ñoqaqa ñam wischuruniña.

¹² Pasaypaq mana llakipayakuq huklaw nacionniyuq runakunam paytaqa kuchuruspanku saqerunqaku. Kallmankunapas orqokunapi, qechwakunapi, wayqokunapi hinaspa pampakunapim wischusqa kanqa. Llantuyninpi yachaq nacionkunapas ayqekuspankum saqerunqaku.

¹³ Alton pawaq tukuy rikchaq animalkunam chay wichiykuq sachapiqa yachanqaku, kallmankunapiñataqmi tukuy rikchaq purun animalkuna yachanqaku.

¹⁴ Manañam ima sachapas maynaña yakupa hawanpi kaspapas hatu-hatuntaqa wiñanqachu, maynaña parqosqa kaspapas manañam alto-altota wiñaspa puyukamaqa chayanqañachu. Llapallankum wañunankupaq sentenciasqa kachkanku, uku pachaman chayaspa wañuqkunawan huñunakunankupaq citasqam kachkanku, nispa.

¹⁵ Ñoqa Tayta Diosmi kaynata nini: Wañuqkunapa kasqanman uraykuptinmi ukupi lamar qochapa yakunkunatapas chakirachisaq, kallpaq yakukunatapas sayarachisaqmi. Payraykum Líbano orqotapas llakiwan pampaykusaq, tukuy hinastinpi sachakunapas llakimantam chakirunqaku.

¹⁶ Wañuqkunawanña kananpaq wañusqakunapa kasqanman uraykachiptiymi, qaparillawanña wichiykuptinmi llapa nacionkuna katkatatanqaku. Hinaptinmi Edén lawpi kaq suma-sumaq sachakunawan Líbano lawpi suma-sumaq sachakuna, yakuta tomaq sachakuna, allpa ukupi kusikunqaku.

¹⁷ Llapallan yanapaqnikikunapas, yanapakuyniki maskaqkunapas, wañuspankum qanwan kuska uku pachaman uraykunqaku imaynam guerrapi wañuqkuna hina.

¹⁸ Edén lawpi sachakunapas manam kuyayllapaq kaynikimanwan sayaynikimanqa rikchakurqakuchu; ichaqa Edén lawpi wakin sachakunatawan kuskatam uku pachaman uraykachirqayki, chaynapi Diosta mana reqsiqkunawan chaynataq guerrapi wañuqkunawan kuska yachanaykipaq. Chay sachaqa rey Faraonwan runankunam. Ñoqa Tayta Diosmi chaynata nini.