Ezequiel 28 - CHUYA QELLQA La Biblia en Quechua de Ayacucho 2012

Tiro llaqtapa reyninpa contranpi profetizasqanmanta

¹ Tayta Diosmi rimapayawaspan kaynata niwarqa:

² Runapa churin, ñoqa Tayta Diospa nisqayta Tiro llaqtapa reyninman kaynata nimuy: Sonqoykipi hatunchakuspam kaynata nirqanki: “Ñoqaqa diosmi kani, diospa trononpim tiyachkani lamar qochapa chawpinpim tiyachkani”, nispayki. Qamqa manam dioschu kanki, diospaq hapikuspaykipas runallam kanki.

³ ¿Danielmantapas aswan yachayniyuqchu kanki? ¿Tukuy pakasqa kaqkuna reqsiqchu kanki?

⁴ Qamqa yachaynikiwanmi tukuy imata huñukurunki, yuyaynikiwanmi qori-qollqeta montokurunki.

⁵ Negocio ruwayta yachaynikiwanmi tukuy imaykitapas mirarachinki, ichaqa tukuy imayuq karuspaykim hatun tukuq rikurirunki.

⁶ Chayraykum ñoqa Tayta Dios kaynata nini: Qamqa diospa yachayninwan huntasqapaqmi hapikurqanki.

⁷ Chayraykum huklaw nacionniyuq pasaypaq mana llakipayakuq runakunata contraykipi pusamuchkani, paykunam yachayniyuq kachkaptikipas wañuchisunaykipaq espadankuta hurqonqaku, hinaspankum sumaqllaña kaynikitapas millakuypaqtaña ruwarunqaku.

⁸ Wañusqakunapa kasqanman wischuykusuptikim lamar qochapa chawpinpi qonqaymanta wañurunki.

⁹ ¿Hinaraqchu wañuchiqnikikunapa makinpi kaspa Diospaq hapikunki? Wañuchiqnikipa makinpiqa wañuq runallam kanki manam dioschu.

¹⁰ Diosta mana reqsiq runakuna hinam huklaw nacionniyuq runakunapa makinpi wañunki. Ñoqa Tayta Diosmi chaynata nini, ñoqa Tayta Diospa nisqayqa chaynam kanqa.

Tiro llaqtapi reymanta aya taki

¹¹ Tayta Diosmi rimapayawaspan kaynata niwarqa:

¹² Runapa churin, qamyá ñoqa Tayta Diospa nisqayman hina kay aya takita Tiro llaqtapa reyninman kaynata niy: Qamqa suma-sumaqmi karqanki, llumpay yachaypa huntasqanmi karqanki, ancha kuyayllapaqmi karqanki.

¹³ Qamqa Edén lawpi Diospa huertanpim karqanki, tukuy rikchaq alhaja rumikunawan pachasqam karqanki: Cornerinawan, topaciowan, jaspewan, crisolitowan, berilowan, onicewan, zafirowan, carbunclowan, esmeraldawan hinaspa qoriwan. Tukuy kaykunaqa unanchasqa kasqayki punchawmantaraqmi alistasqaña karqa.

¹⁴ Qampaqa huk querubinmi waqaychaqnikipas karqa, Diospa chuya orqonpim churarqayki, chipipipiq rumikunapa chawpinpim purirqanki.

¹⁵ Qamqa unanchasqa kasqaykimantapunim mana pantayniyuq karqanki, chaynaqa karqanki qampi mana allin rikurirunankamam.

¹⁶ Qamqa llapa negocio ruwasqaykiwanmi mana allin ruwaykunawan chaynataq huchawan huntarachikurqanki. Chayraykum qayllaymanta wischururqayki, Diospa chuya orqonmantam qarqorurqayki, waqaychasuqniki querubinpas llipipipiq rumikunapa chawpinmantam wischurusurqanki.

¹⁷ Kuyayllapaq kasqaykiraykum sonqoykipi hatun tukuq rikurirurqanki, suma-sumaq kasqaykiraykum yachaynikitapas yanqacharurqanki. Chayraykum pampaman wischururqayki, reykunapa ñawpaqninpim penqayman churarurqayki.

¹⁸ Qamqa mana allin negocio ruwasqaykiwanmi llumpa-llumpayta huchallikururqanki, chaynata ruwaspam temploykitapas millakuypaqta ruwarurqanki. Chayraykum chawpikimanta ninata ratarirachispay kañarurqayki, kunanqa llapallan runa qawasunaykipaqmi uchpaman tikrasqaña kachkanki.

¹⁹ Reqsisuqniki nacionkunam qawasuspayki mancharikunku; qamqa pasaypaq manchakuypaqñam rikurirunki, wiña-wiñaypaqñam puchukarunki, nispayki.

Sidón llaqtapa contranpi profetizasqanmanta

²⁰ Tayta Diosmi rimapayawaspan kaynata niwarqa:

²¹ Runapa churin, Sidón llaqtata qawarispa paypa contranpi profetizay.

²² Ñoqa Tayta Diospa nisqayta kaynata niy: Sidón llaqta contraykipim kachkani, qampa chawpikipim hatunchasqa kasaq. Contraykipi sentenciaspa castigaptiymi chuya kasqayta reqsiwanki. Chaynapim Tayta Dios kasqayta yachanqaku.

²³ Qanmanmi peste onqoyta kachaykamusaq, callekikunapipas yawarmi kallpanqa; runaykikunapas wañuchisqam kanqaku, tukuy hinastinmantam atacasqa kanqaku. Chaynapim Tayta Dios kasqayta yachanqaku.

²⁴ Israel nacionqa manañam haykapipas muyuriqninpi nacionkunapa cheqnikuyninkuta chaskinqañachu, chay cheqnikuyninkum kichka hina tuksirqa, puyapa tuksisqan hinam nanakurqa. Chaynapim Tayta Dios kasqayta yachanqaku, nispayki.

²⁵ Ñoqa Tayta Diosmi kaynata nini: Cheqechisqa kasqanku nacionkunamanta Israelpa mirayninkunata huñumuspaymi, nacionkunapa qawasqanta chuya kasqayta paykunaman qawachikusaq, chaynapim Israelpa mirayninkunaqa serviqniy Jacobman qosqay allpapi yachanqaku.

²⁶ Chay allpapiqa hawkam yachakunqaku, wasikunata hatarichispankum uvastapas plantanqaku. Chaynaqa, kanqaku muyuriqninkupi cheqniqninku nacionkunata sentenciaspay castigaptiymi, chaynapim Israelpa yupaychasqan Tayta Dios kasqayta yachanqaku.