Ezequiel 24 - CHUYA QELLQA La Biblia en Quechua de Ayacucho 2012

Timpuchkaq mankawan rikchanachiymanta

¹ Isqon kaq watapa chunka kaq killanpa chunka kaq punchawninpim Tayta Dios kaynata niwarqa:

² Runapa churin, ima punchawmi kunan punchaw kasqanta qellqay. Kunan punchawmi Babilonia nacionpa reynin Jerusalén llaqtata muyurirun.

³ Ñoqa Tayta Diospa nisqayta kay mana kasukuq runakunaman kaynata rikchanachispa willay: Tullpaman mankata churkuspayki chay mankaman yakuta talliy.

⁴ Hinaytaq allinnin aychata, allinnin piernata, lomota chaynataq allinnin tullukunatapas.

⁵ Wiran ovejatapas hapiy, allinta timpunanpaq yantawan kunyay, tullunkuna allin yanusqa kanankama.

⁶ Ñoqa Tayta Diosmi kaynata nini: ¡Imallapiraq rikukunqa runa wañuchiq llaqta! Chay llaqtaqa akasqa manka hinam, akarusqanqa manaña siksiy atinam. Chay mankamanta chulla-chullamanta llapallan aychata hurqoy.

⁷ Chay llaqtam yawarwan huntasqa kachkan, lluchka rumipa hawanpim yawarta chaqchurqa, manam allpapa hawanpichu chaynapi allpa tapaykunanpaq.

⁸ Chay yawartaqa lluchka rumipa hawanpim saqerusaq, mana imapas tapananpaqmi hinallapi saqerusaq; chaynapim piñakuywan chay yawarmanta vengakusaq.

⁹ Ñoqa Tayta Diosmi kaynata nini: ¡Imallapiraq rikukunqa runa wañuchiq llaqtaqa! Kikiypunim paytaqa kañaykusaq.

¹⁰ Qamyá achka yantawan wichirinankama yanuy, caldonpas chakiptin tullukunapas kañakunankama.

¹¹ Chay mana imayuq cobre mankata huktawan sansaman tiyachiy, chay manka pukay-pukay kanankama, ukunpi qachankunapas chinkanankama, akarusqanpas chinkanankama.

¹² Ichaqa yanqapaqmi chay ruwasqaykipas, chay mankapa akarusqanqa manam ninawanpas lloqsinmanchu.

¹³ Jerusalén llaqta, munasqaykipi purispa qachachakusqaykitam mayllaykuyta munarqayki, qanmi ichaqa mayllachikuyta mana munarqankichu. Mayllasqaqa kanki sinchi piñakuyniyta qanman kachaykamuptiyñam.

¹⁴ Ñoqa Tayta Diosmi chaynata nini, hinaptinqa chaynapunim kanqa. Mana qepaman kutirispam chaynata ruwasaq. Mana llakipayarispam cumplisaq, imaynam kawsasqaykimantawan imam ruwasqaykimantam castigasqayki. Ñoqa Tayta Diosmi chaynata nini.

Ezequielpa warmin wañukusqanmanta

¹⁵ Tayta Diosmi kaynata niwarqa:

¹⁶ Runapa churin, ancha kuyasqayki warmikitam qonqayllamanta qechurusqayki, paymantaqa amam llakikunkichu nitaq waqankichu, amataqmi weqekipas sutunqachu.

¹⁷ Llakispaqa-llakikuy upallallamanta, paymantaqa ama lutokuychu. Uma wataykitapas ama hurqokuychu, amataq qala chakipas puriychu. Uyaykitapas ama tapakuychu, chayna punchawkunapi mikuna mikuytapas ama mikuychu, nispa.

¹⁸ Tutapaytam runakunawan rimarqani, tardeykuytañataqmi warmiy wañukurqa, chaymi paqarinnintinta Tayta Diospa kamachiwasqanman hina ruwarqani.

¹⁹ Hinaptinmi llapa runakuna tapuwarqaku: ¿Manachu niykuwankikuman ima ninanmi kay ruwasqaykikuna kasqanta? nispanku.

²⁰ Chaymi paykunaman kaynata nirqani: Tayta Diosmi rimapayawaspan kaynata niwarqa:

²¹ Israelpa mirayninkunata kaynata niy: Ñoqa Tayta Diosmi kaynata nini: Qamkunapa anchallaña kuyasqaykichik hinaspa qawapayanaykichik temploytam millakuypaqta ruwarusaq. Chay templom qamkunapa kallpaykichik hinaspa hatunchakunaykichik karqa. Jerusalenpi saqemusqaykichik wawa-churikichikpas wañuchisqam kanqaku.

²² Hinaptinmi qamkunapas ñoqapa ruwasqayta hina ruwankichik: Llakimantaqa manam uyaykichiktapas tapakunkichikchu, nitaqmi chayna punchawkunapi mikuytapas mikunkichikchu.

²³ Uma wataykichiktapas, usutaykichiktapas manam hurqokunkichikchu, manam qaparinkichikchu nitaqmi waqankichikpaschu. Aswanqa huchaykichikrayku ñakarispam manaña kallpayuq huknikichikmanta huknikichikkama waqachinakunkichik.

²⁴ Ezequielmi qamkunapaq huk señal kanqa, paypa tukuy ima ruwasqantam ruwankichik. Chaykuna pasakuptinmi Tayta Dios kasqayta yachankichik, nispa.

²⁵ Runapa churin, Israelpa mirayninkunamantam temployta qechurusaq, chay templopa sumaq kayninwanmi anchata kusikuqku, paykunaqa qawapayaytam gustaqku hinaspam llumpayta kuyaqku. Wawa-churinkutapas qechusaqmi.

²⁶ Chay punchawpim pipas guerramanta ayqemuq huk willakuyta apamusunki.

²⁷ Chay punchawpim mana rimaq kayniki tukunqa, hinaptinmi guerramanta ayqekamuq runawan rimanki. Qanmi paykunapaq señal kanki, chaynapim Tayta Dios kasqayta yachanqaku.