Ezequiel 23 - CHUYA QELLQA La Biblia en Quechua de Ayacucho 2012

Samariawan Jerusalenqa huchapakuq warmikuna hina kasqankumanta

¹ Tayta Diosmi kaynata niwarqa:

² Runapa churin, iskay warmikunam karqa huk mamapa wawallan.

³ Paykunam Egipto nacionpi sipasllaraq kachkaspanku chuchumika kayman qokururqaku, chaypim ñuñunkuta mullkachikuyta qallaykurqaku, chaypitaqmi manaraq qari reqsiq kayninkutapas pierderurqaku.

⁴ Mayorninpa sutinmi karqa Ahola (chayqa Samaria llaqtam), sullkanpa sutinñataqmi karqa Aholiba (chayqa Jerusalén llaqtam). Paykunam warmiykuna karqaku, hinaspam churiykunata qaritapas warmitapas wachakurqaku.

⁵ Aholam ñoqawan kachkaspan hukwan-hukwan kakuyta qallaykurqa, Asiria nacionniyuq tropakunata kuyaruspanmi paykunawan pierdekururqa.

⁶ Chay tropakunaqa karqa moradonkama kuyayllapaq pachasqam, llapallankum karqaku kamachikuqkuna hinaspa capitankuna, paykunaqa kuyayllapaq jovenkunam karqaku, sapakamam caballopi sillakuqkuna karqaku.

⁷ Aholaqa Asiria nacionniyuq allinnin runakunawanmi pierdekururqa, chay pierdekurusqan runakunapa llapallan idolonkunawanmi millakuypaqta qachachakurqa.

⁸ Payqa Egipto nacionpi kasqanmantaraqmi chuchumika kayninta mana saqerqachu, achkaqmi paywanqa sipas kayllanpiraq puñukurqaku. Paykunam warma ñuñunkutapas mullkapayaspanku chuchumikayarachirqaku.

⁹ Chayraykum ñoqapas anchata kuyarusqan Asiria nacionniyuq kuyaqninkunaman qoykuni.

¹⁰ Paykunam pachankunatapas llatanarurqaku, wawankunatapas qechuruspankum paytapas espadawan wañurachirqaku. Chayna castigasqa kasqanwanmi llapa warmikunapa rimakunan karqa.

¹¹ Chaytam ñañan Aholiba qawarqa, ichaqa ñañanmantapas astawanraqmi huchapakurqa.

¹² Aholibapas Asiria runakunawanmi huchapakuyta qallaykurqa. Chay runakunam karqaku kamachikuqkuna, capitankuna, sumaq pachasqa guerrapi peleaqkuna, caballopi sillakuqkuna hinaspa kuyayllapaq jovenkuna.

¹³ Qawarqanim imaynam chay warmipas huchaman wichiykusqanta; paypas ñañanpa ruwasqankunatam ruwarqa.

¹⁴ Ichaqa kay warmim aswan huchapakuqraq rikurirurqa. Paymi perqakunapi rikururqa Babilonia runakunapa rikchayninta pukawan pintasqata,

¹⁵ weqawninkupas allin watasqata, hatun uma watayuqtakama. Chay qawasqankunaqa kasqa capitankunapa ayrin-ayriyuqmi, Caldea lawpi Babilonia runakunamanmi rikchakusqa.

¹⁶ Chaynapim chay warmiqa paykunata kuyaruspa Babilonia nacionman willakuqkunata kacharqa.

¹⁷ Chaymi Babilonia runakuna hamuruspanku paywan puñukuspa millakuypaqta ruwarurqaku. Chay warmipas paykunawanmi qachachakurqa, millakuypaq kaqkunata ruwaruspanmi paykunata millakururqa.

¹⁸ Hinaspanmi llapa runakunapa ri-kusqanta chuchumika kayman wischu-kuykurqa, qalalla kaytapas manañam penqakurqakuchu. Chaymi ñoqapas ñañanta hinaña millakururqani.

¹⁹ Payqa aswanraqmi hukninwan-hukninwan qanrakurqa, Egipto nacionpi sipas kayninpi chuchumika kayninta yuyarispanmi

²⁰ Egipto nacionpi waynankunata anchata kuyarurqa. Chay runakunapa qari kayninqa rikchakun asnokunapaman otaq caballokunapamanraqmi.

²¹ Yaw Aholiba, sipas kaynikipi huchapakuynikitaraqmi yuyarirunki, Egipto runakuna sipas ñuñuykita mullkapayasqankutaraqmi yuyarirunki.

²² Chayraykum ñoqa Tayta Dios kaynata nini: Kunan millakurusqayki waynaykikunatam enemigoykimanña tikrarusaq, tukuy hinastinmantam paykunata contraykipi pusamusaq.

²³ Paykunam Babiloniamanta, Caldeamanta, Pecodmanta, Soamanta hinaspa Coamanta hamunqaku, paykunawantaqmi hamunqa Asiria runakunapas. Paykunaqa kuyayllapaq jovenkunam, llapallankum kamachikuqkuna hinaspa capitankuna, ancha reqsisqa runakuna, llapallankum caballopi kallpaqkuna.

²⁴ Paykunaqa contraykipim hamun-qaku achkallaña carretayuqkama chaynataq nana-nanaq tropayuqkama. Cascokunawan escudokunawan armasqakamam tukuy hinastinmanta muyurusunki. Paykunamanmi qoykusqayki kamachikuyninkuman hina juzgasunaykipaq.

²⁵ Piñakuyniytam qampa hawaykiman kachaykamusaq, hinaptinmi paykunaqa piñakuyllawanña tukuy imata ruwasunki. Senqaykitawan rinrikitapas kuchurunqakum, wañuymanta lluptiqkunatañataqmi espadawan wañurachinqaku. Wawaykikunatapas qarita-warmitam qechusunki, puchuqkunañataqmi ninawan tukusqa kanqaku.

²⁶ Paykunaqa pachaykitapas chusturususpaykim sumaq alhajaykikunatapas qechusunki.

²⁷ Chaynatam Egipto nacionpi kaspa huchapakuynikitawan hukwan-hukwan qanrakuynikita puchukachisaq, chaynapim Egipto naciontaqa manaña rikunkichu nitaqmi runankunatapas yuyarinkiñachu.

²⁸ Ñoqa Tayta Diosmi kaynata nini: Ñoqam cheqnisqayki hinaspa millakusqayki runakunapa makinman kachaykusqayki.

²⁹ Paykunam cheqnikuyllawanña tukuy imata ruwasunki, llamkaspa ganakusqaykitapas qechususpaykim qalallataña saqerusunki. Chuchumika kaynikipi hukwan-hukwan kakusqayki cuerpoykitam llapallanman qawachinqaku. Huchapakuspa hukwan-hukwan qanrakusqaykimantam

³⁰ tukuy kaykunaqa chayaramusunki. Qamqa huklaw nacionniyuq runakunawan huchapakuspaykim idolonkunata yupaychaspayki qachachakurqanki.

³¹ Ñañaykipa kawsasqanman hinam kawsarqanki, chaymi payta imaynam castigasqayta hina castigasqayki, nispa.

³² Ñoqa Tayta Diosmi kaynata nini: Ñañaykipa upyasqan llimparichkaq hatun vasomantam qamtapas upyachisqayki, chay vasom nacionkunapa burlakuyninwan hinaspa asipayakuyninwan llimparichkan.

³³ Tuñichisqa hinaspa purmachisqa kaypa huntasqan vasowanmi pasaypaq machasqa hinaspa nanaypa huntasqan kanki, chay vasoqa ñañayki Samariapa vasonmi.

³⁴ Chay vasomantam tukunaykikama tomanki, hinaspam vasotapas pasaypaqta ñutupanki, ñuñuykitapas pasaypaqtam aspipakunki. Ñoqa Tayta Diosmi chaynata nini.

³⁵ Chaynaqa, ñoqa Tayta Diosmi kaynata nini: Qonqaruwaspa, qepanchakuruwaspayki, munasqaykipi purispa hukwan-hukwan qanrakusqaykimantam castigota ñakarinki, nispa.

³⁶ Chaymantam Tayta Dios kaynata niwarqa: Runapa churin ¿Manachu Aholatawan Aholibata juzganki? Chaynaqa, millakuypaq kaqkuna ruwasqankuta uyankupi niy.

³⁷ Paykunaqa pierdekuspam huchallikurqaku, runa wañuchisqankumantam yawar makintin kachkanku. Paykunaqa qepancharuwaspankum idolokunataña yupaycharqaku. Ñoqapaq wachakusqanku wawankunatapas idolokunamanñam ofrecespanku kañapurqaku.

³⁸ Chaywanpas kaytawanraqmi paykunaqa ruwarqaku: Temploytapas qa-chachaspankum samana punchawniykunatapas pasaypaqta sarutyarqaku.

³⁹ Idolokunapaq wawankuta wañuchisqanku punchawllapim hamuruspanku santuarioytapas millakuypaqtaña ruwarurqaku. Temploypipunim chaytaqa ruwarqaku.

⁴⁰ Willakuqkunata kamachispankum karumantaraq runakunata qayachimurqaku. Paykuna hamuruptinkum bañakuspanku ñawinkutapas pintapakuspa alhajakunawan churapakuruspanku chaskirqaku.

⁴¹ Mesata allicharuspankum sumaqllaña camapiraq tiyaykurqaku, chay mesapa hawanpim ñoqapaq sapaqchasqanku inciensotawan miski asnaq aceiteta churaykurqaku.

⁴² Chaypim llapa runakunapa fiestapi qayay-kachakusqanku uyarikurqa, paykunaqa karqaku chunniq lawmanta hamuq qarikunam. Paykunam chay warmikunata sumaqllataña adornaspanku makinkumanpas brazaletekunataraq churarqaku, umanku-manpas sumaq coronakunatam churarqaku.

⁴³ Chaymi kaynata nirqani: Kay runakunaqa chay chuchumikakunawanmi puñukurqaku, paykunaqa pasaypaqtañam payayarunku, chuchumika kanankupaqpas manañam valenkuñachu, nispay.

⁴⁴ Chuchumika warmiman hinaraqmi, hukwan-hukwan kakuq Aholaman hinaspa Aholibaman hamurqaku millay warmikuna.

⁴⁵ Ichaqa allin ruwaq runakunam, waqllikuqkunata hinaspa runa wañuchiqkunata juzganankupaq kamachikuyman hina juzganqaku. Chaynataqa juzganqaku waqllikuruq hinaspa runa wañuchiq kasqankumantam.

⁴⁶ Tayta Diosmi kaynata nin: Llapa runakuna paykunapa contranpi huñunakuchun, manchakuywan huntarachispa tukuy imankutapas suwachunku.

⁴⁷ Llapallan runakuna rumiwan choqapaspa wañuchichunku, espadanwan kuchupachunku. Wawankutapas wañuchispa wasinkutapas kañachunku.

⁴⁸ Ñoqam kay nacionmanta chay millakuypaq huchakunata chinkachisaq, chaynapim llapa warmikunaqa chayta yachaspanku manaña qamkuna hina millakuypaqtaqa ruwanqakuchu.

⁴⁹ Ahola hinaspa Aholiba, millakuypaq huchata ruwaspa idolokunata yupaychasqaykichikmantam castigasqa kankichik. Chaynapim Israelpa yupaychasqan ñoqa Tayta Dios kasqayta yachankichik.