Ezequiel 22 - CHUYA QELLQA La Biblia en Quechua de Ayacucho 2012

Jerusalén llaqtapa huchanmanta

¹ Tayta Diosmi kaynata niwarqa:

² Runapa churin, runa wañuchiq llaqtata sentenciay. Millakuypaq kaqkuna ruwasqanta qawachimuy.

³ Ñoqa Tayta Diospa nisqayta kaynata nimuy: Runakunapa yawarnin chaqchuna llaqta, castigasqa kanayki punchawmi chayaramunña. Qachachakunaykipaqmi millakuypaq idolokunata ruwakurqanki. Tuñichisqa kanayki punchawmi chaya-muchkanña.

⁴ Yawar chaqchusqaykiwanmi huchallikurunki, idolokuna ruwasqaykiwanmi qachachakurunki; castigasqa kanayki punchawtam hichparachimunki, tukunayki watamanmi chayarunki. Chayraykum nacionkunapa insultaspa burlakunanta ruwasqayki.

⁵ Hichpapi kaqkunawan karupi kaqkunam qanmanta asikunqaku, mana allin runakunapa kanan, idolokunapa huntasqan llaqta nispam sutichasqa kanki.

⁶ Chaypim Israelpa kamachiqninku-napas yachanku, paykunam atiyninkuman hina yawar chaqchuyllapiña kallpakachanku.

⁷ Jerusalén llaqta, runaykikunaqa taytankutawan mamankutapas mana kaqpaqmi hapinku, huklaw llaqtayuqkunatawan mana tayta-mamayuqkunata hinaspa viudakunatapas ñakarichinkum.

⁸ Santuarioykunatawan samana punchawniykunatapas pasaypaqtam sarutyarunku.

⁹ Runaykikunaqa yanqakunamanta tumpaspam runata wañuchinku; paykunaqa idolokunata yupaychanankupaq orqokunapi convido ruwasqankuman rispam, pasaypaq millakuypaq kaqkunata ruwamunku.

¹⁰ Taytankupa warmillanwanmi qachakunku, killanwan onqoq warmikunatam abusanku.

¹¹ Runamasinkupa warminkuwanmi waqllikunku, llumchuyllankuwanmi qanrakunku, taytankupa churillantam abusanku.

¹² Runamasinkuta wañuchinankupaqmi qollqeta chaskikunku. Qollqetapas mirayniyuqllapaqmi prestanku; runamasinkutam ñakarichinku; tukuy chaykunata ruwaspankum qonqaruwanku. Ñoqa Tayta Diosmi chaynata nini.

¹³ Jerusalén llaqta, runakunata ñaka-richisqaykimantawan runakunata wañuchisqaykimantam piñasqa kachkani.

¹⁴ Castigasqay punchawqa manam imayna kutipawaytapas atinkichu. Ñoqa Tayta Diosqa imam rimasqaytaqa cumplisaqpunim.

¹⁵ Chaynaqa, Jerusalén llaqta, huklaw nacionkunamanmi cheqerachisqayki, huklaw llaqtakunamanmi cheqerachisqayki, chaynatam millakuypaq kaynikikunata chuyanchasaq.

¹⁶ Qampa huchaykimantam llapa nacionkuna contraypi rimanku, ichaqa ñoqa Tayta Dios kasqaytam yachanki, nispa.

¹⁷ Tayta Diosmi kaynata niwarqa:

¹⁸ Runapa churin, Israel runakunaqa mana imapaqpas valeqmi rikurirunku; hornopi cobreta, estañota, fierrota, titita hinaspa qollqeta chulluchiptinku wichiruq qachan hinam rikurirunku.

¹⁹ Chayraykum ñoqa Tayta Dios kay-nata nini: Llapallaykichik mana ima-paqpas valeq rikurirusqaykichikraykum, Jerusalén llaqtapa chawpinman huñurusqaykichik.

²⁰ Imaynam qollqeta, cobreta, fierrota, titita hinaspa estañota hornopi ninawan chulluchinku, chaynatam ñoqapas qamkunata huñuruspay piñakuyniywan chulluchisqaykichik.

²¹ Arí, qamkunataqa huñuruspaymi, piñakuyniywan llaqtapa chawpinpi chulluchisqaykichik.

²² Chaynaqa, hornopa chawpinpi qollqe chulluchisqa hinam qamkunapas llaqtapa chawpinpi chullunkichik. Chaynapim yachankichik ñoqa Tayta Dios piñakuywan castigasqayta, nispa.

²³ Tayta Diosmi kaynata niwarqa:

²⁴ Runapa churin, Israel nacionta kaynata niy: Qamqa mana para chayananpaq nitaq yakupas kananpaq ñakasqam kachkanki.

²⁵ Profetaykikunapas yarqasqa leonkuna hinañam qaparillawanña runata hapiruspa wañurachinku. Llaqtankupim runa-kunata wañuchispa qori-qollqenkutawan tukuy imankuta suwaruspa viudakunallataña saqerunku.

²⁶ Sacerdotekunapas kamachikuyniykunatam qewirunku, ñoqapaq sapaqchasqa kaqkunatapas millakuypaqtañam ruwarunku, manam yachankuñachu mayqanmi ñoqapaq sapaqchasqa kasqanta otaq millakuypaq kasqantapas; manataqmi yachachinkuchu mayqanmi allin otaq mana allin kasqantapas. Samana punchawniykunatapas qepancharunkum, manañam ñoqataqa hatunchawankuñachu.

²⁷ Kamachiqninkunapas imapas hapis-qankuta tisaparuq atoqkuna hinañam rikurirunku, paykunaqa chayllam kachkanku runakunata wañuchispa tukuy imankuta hapikuykunankupaq.

²⁸ Profetankunapas estucowan perqata laqachkaq hinaraqmi cheqap kaqta pakarunku; visionta qawaq tukuspankum yanqakunallata profetizanku; paykunaqa mana kamachichkaptiymi: “Tayta Diosmi kaynata nin” nisparaq rimankupas.

²⁹ Kay nacionpi runakunaqa mana allin ruwaypi hinaspa suwakuyllapim kachkanku; wakchakunatawan mana piniyuqkunata chaynataq huklaw llaqtayuqkunatam ñakarichinku.

³⁰ Paykuna ukupim huk runata maskarqani, kay nacionpa rantinpi perqa hina sayaykuspa qayllaypi mañakuwaptin mana tuñirachinaypaq, ichaqa manam tarirqanichu.

³¹ Chayraykum ñoqaqa llumpay piñakuywan paykunata castigaspay tukurusaq, mana allinkuna ruwasqankutapas kikillankumanmi kutichisaq. Ñoqa Tayta Diosmi chaynata nini.