Ezequiel 21 - CHUYA QELLQA La Biblia en Quechua de Ayacucho 2012

Diospa espadanmanta

¹ Tayta Diosmi kaynata niwarqa:

² Runapa churin, Jerusalén lawman qawarispa llapa santuarionkunapa contranpi chaynataq Israel allpapa contranpi profetizay.

³ Ñoqa Tayta Diospa nisqayta paykunaman kaynata niy: Ñoqaqa qampa contraykipim kachkani, chayraykum vainanmanta espadayta hurqoykuspay, allin ruwaq runakunata chaynataq mana allin ruwaq runakunatapas wañurachisaq.

⁴ Ñoqaqa llapallaykichikpa contraykichikpi espadayta vainanmanta hurqoykuspaymi, allin ruwaqtapas chaynataq mana allin ruwaqtapas lliwta wañurachisqaykichik, sur lawmanta qallaykuspa norte lawkama.

⁵ Chaynapim llapa runakuna ñoqa Tayta Diosqa espadayta vainanmanta hurqosqayta yachanqaku. Manam vainanmanqa kutiykachisaqchu.

⁶ Chaynaqa, runapa churin, llapa runakunapa qayllanpi waqay sonqoykipas nananankama.

⁷ Sichum pipas tapusunki: “¿Imanasqataq kaynatañaqa waqachkanki?” nispa hinaptinqa kaynatam ninki: Ñoqaqa waqachkani imam pasakunanmanta willakuy uyarisqaywanmi. Chaykuna chayamuptinqa llapa runakunam hukmanyanqaku, manam ima ruwakuytapas atinqakuñachu, muspaypi hinam rikurirunqaku, manchakuymantam moqonkupas katkatatanqa. Ñam chayaykamuchkanña, chaynapunim kanqa. Ñoqa Tayta Diosmi chaynata nini.

⁸ Tayta Diosmi kaynata niwarqa:

⁹ Runapa churin, ñoqa Tayta Diospa nisqayta kaynata niy: Espadaqa ñawchiyachisqañam kachkan, espadaqa ñawchiyachisqañam kachkan.

¹⁰ Ñawchiyachisqaqa kachkan wañuchinanpaqmi, ñawchiyachisqaqa kachkan llipya hina llipityananpaqmi.

¹¹ Espadaqa ñawchiyachisqa kachkan hukkaqnin hapinanpaqmi, ñawchiyachisqaqa kachkan runa wañuchiqman qoykunanpaqmi.

¹² Chaynaqa, runapa churin, waqaspa qaparkachay. Chay espadaqa kachkan Israel runaykunapa contranpim, Israelpa kamachiqninkunapa contranpim. Paykunam llaqtaywan kuska espadawan wañuchisqa kanqaku. Chayraykuyá qasqoykita takakuy.

¹³ Kayqa huk pruebam. Ichaqa ¿yaqachu huk espada cetrota uchuychanman? Payqa manam masyanmanchu. Ñoqa Tayta Diosmi chaynata nini.

¹⁴ Runapa churin, profetizaspayki makikita taqllakuy, wañuchiq espadapa piñakuynin iskaykama kimsakama mirachun. Chayqa wañuchikuq espadam, chay espadam llapallanta wañuchinqa.

¹⁵ Chay espadam paykunaman manchakuyta huntaykunqa, achkallatañam wañuchinqa. Llapallan wasikunamanmi wañuchikuq espadata kachaykuni, chay espadaqa llipityananpaq ñawchiyachisqam kachkan, wañuchinanpaq ñawchiyachisqam kachkan.

¹⁶ Ñawchiyachisqa espada: Alleq lawman, ichoq lawman kuchuy, maylawmanpas muyusqaykiman kuchuy.

¹⁷ Ñoqapas taqllakuspayraqmi piñakuyniyta tanichisaq. Ñoqa Tayta Diosmi chaynata nini.

¹⁸ Tayta Diosmi kaynata niwarqa:

¹⁹ Runapa churin, iskay ñankuna-ta señalay Babiloniapa reynin chayninta espadantin pasananpaq. Chay iskay ñankunam huk nacionllamanta lloqsinan, chay ñankunapa qallariyninpim may llaqtamanmi risqan letrerota churanki.

²⁰ Huk ñanta kichay Amón nacionpi Rabá llaqtaman espada chayananpaq, huktañataq Judá nacionpi murallasqa Jerusalén llaqtaman chayananpaq.

²¹ Babilonia nacionpa reyninmi chay iskay ñankunapa qallariyninpi sayaykuspan suerteta chamqachkan, flechankunatam taspichkan, idolonkunatam tapukuchkan, animalkunapa kichpannintam qawachkan.

²² Alleq makinpi flecham Jerusalén llaqtaman toqpiykun, chaypa ninanqa kaykunam: Guerrapaq tukuy rikchaq armakunawan atacamuy, llaqtapi runakunata wañuchimuy, guerrapaq qapariy, punkunkunata tuñichiy, rampakunata ruwachiy, atacanaykipaq torrekunata hatarichiy ninanmi.

²³ Jerusalén llaqtayuq runakunam ichaqa, paykunawan contratokunata ruwarusqankurayku kay profeciatapas llullapaq hapinku; chay reymi ichaqa mana allinkuna ruwasqankuta yuyarichispa paykunata presocharunqa.

²⁴ Chayraykum ñoqa Tayta Dios kaynata nini: Mana allinta ruwaspa mana kasukusqaykichikmi sutilla kachkan, sutillataqmi kachkan mana allinkunata ruwaspa huchallikusqaykichikpas. Chayraykum qamkunaqa presochasqa kankichik.

²⁵ Israel nacionpa reynin, qamqa kanki pasaypaq mana allinkunalla ruwaq runam, castigasqa kanayki punchawmi hichpamuchkanña.

²⁶ Ñoqa Tayta Diosmi kaynata nini: Chay uma wankinaykita hurqokuy, hurqokuytaq chay coronaykitapas, tukuy imapas manam ñawpaqta hinañachu kanqa. Pampapi kaqmi altoman churasqa kanqa, altopi kaqñataqmi pampaman uchuychasqa kanqa.

²⁷ Ñoqaqa imatañapas pasaypaqtam purmachisaq. Chaykunaqa pasakunqa kamachisqayman hina Babilonia nacionpa reynin chayamuptinmi, nispa.

Amón nación castigasqa kanankumanta

²⁸ Runapa churin, ñoqa Tayta Diospa nisqayta, Israel nacionta insultaq Amón nacionpi yachaqkunapa contranpi kaynata nimuy: Espadaqa wañuchinanpaqmi vainanmanta hurqosqaña kachkan, llipityasparaq wañuchinanpaqmi ñawchiyachisqaña kachkan.

²⁹ Paykunaqa revelacionta qawaspapas yanqakunallatam willakunku, profetizaspankupas llullatam rimanku. Chay millakuypaq mana allin runakunataqa espadam wañuchinqa, castigasqa kananku punchawmi hichpamuchkanña.

³⁰ Espada, vainaykiman kutiykuy. Maymi nacesqayki allpapim juzgasqayki, maymi yachasqayki allpapim juzgasqayki.

³¹ Qampa hawaykimanmi piñakuyniyta kachaykamusaq, hawaykipim piñakuyniyta ninata hinaraq ratarirachisaq; mana allinkuna ruwaq runakunapa makinmanmi qoykusqayki, chinkachikuq runakunapa makinmanmi qoykusqayki.

³² Kañasqa kaspam chinkachisqa kanki, yawarnikipas allpapi chaqchusqam kanqa, qanmantaqa manam pipas watukunqachu. Ñoqa Tayta Diosmi chaynata nini.