Ezequiel 16 - CHUYA QELLQA La Biblia en Quechua de Ayacucho 2012Jerusalenpi runakuna mana kasukuq kasqankumanta 1 Tayta Diosmi rimapayawaspan kaynata niwarqa: 2 Runapa churin, Jerusalenpi yachaq-kunaman millakuypaq ruwasqankuta willamuy. 3 Ñoqa Tayta Diosmi Jerusalén llaqtapa contranpi kaynata nini: Canaán allpapim qamqa nacerqanki, taytaykipas Amor casta runam karqa, mamaykiñataqmi Het castamanta. 4 Naceruptikiqa manam pupuykitapas kuchurqachu, manam kachiwanpas qaqosurqankichu, nitaqmi pipas qellpusurqankichu. 5 Manam pipas llakipayasurqankichu, manataqmi chaykuna ruwaykusuqnikipas karqachu, aswanqa qanmanta millakuspankum nacesqayki punchaw hawaman wischurusurqanki. 6 Ichaqa chayninta pasachkaspaymi yawarnikipa chawpinpi qochpachkaqta rikurqayki, chaymi yawarnikipa hawanpi rikuruspay nirqayki: ¡Kawsakuy! nispa. 7 Purunpi sachata hinam wiñachirqayki, hatunyaruspaykim kuyayllapaq warmiña rikurirurqanki. Ñuñuykikunawan chukchaykipas wiñarurqam, ichaqa pasaypaq qalallam karqanki. 8 Huktawan chayninta pasachkaspaymi, casarakunaykipaq hina tiempoykipiña kasqaykita qawaykurqani. Chaymi capayta mastarispay qalalla cuerpoykita tapaykurqani; hinaspam ñoqapaña kanaykipaq qanwan pactota ruwarqani; chaymantam ñoqapaña karqanki. Ñoqa Tayta Diosmi chaynata nini. 9 Hawaykipi kaq yawartapas yakuwan mayllaykuspaymi miski asnaq aceitewan llusiykurqayki. 10 Sumaq bordasqa pachawanmi pachaykachirqayki, fino qalaskunamanta usutawanmi churaykachirqayki, linomanta chumpiwanmi weqawnikitapas wataykurqayki, seda pachakunawanmi pachaykachirqayki. 11 Alhajakunawanmi churaykurqayki, makikikunamanpas brazaletekunatam churaykurqayki, kunkaykimanpas collartam churaykurqayki. 12 Senqaykimanpas huk anillotam churaykurqayki, rinriki-manpas aretekunatam churaykurqayki, umaykimanpas huk coronatam churay-kurqayki. 13 Chaynatam qori-qollqewan adornarqayki, pachaykipas fino linomanta hinaspa sedamanta sumaq bordasqam karqa. Mikunaykipas allinnin tantawan, miel hinaspa olivos sachapa aceitenmi karqa. Kuyayllapaq rikuriruspaykim reinaña karqanki. 14 Kuyayllapaq kasqaykiraykum huklaw nacionkunapa ancha reqsisqanña rikurirurqanki, suma-sumaqta adornaykuptiymi ancha kuyayllapaq karqanki. Ñoqa tayta Diosmi chaynata nini. 15 Ichaqa kuyayllapaq kaynikimanmi hapipakururqanki, hinaspam ancha reqsisqa kasqaykirayku chuchumika hinaña rikurirurqanki, llapallan chayninta puriqkunawanmi qanrakurqanki. 16 Chay pachaykikunawanmi ídolo yupaychanayki carpakunata moqokunapi ruwakururqanki, chaykunapim hukwan-hukwan qanrakurqanki. Chaynakuna ruwayqa manam haykapipas karqachu, nitaqmi kanqachu. 17 Qamqa qorimanta qollqemanta alhajakuna qosqaywanpas qariman rikchakuq idolokunatam ruwakururqanki, hinaspam chaykunawan qanrakururqanki. 18 Sumaq bordasqa pachaykiwanmi chaykunata pachachirqanki, hinaspam miski asnaq aceiteytawan inciensoytaraq payku-naman ofrecerqanki. 19 Mikunaykipaq qosqay trigo harinatawan aceiteta hinaspa abejapa miskintapas paykunamanmi qoykurqanki, miski asnaq ofrendata hinaraqmi paykunaman ofrecerqanki. Ñoqa Tayta Diosmi chaynata nini. 20 Wawaykikunatapas qarita-warmitam mikuyta hinaraq chay idolokunaman ofrecerqanki. ¿Asllapaqchu hapirqanki chuchumikaman tikrakurusqaykita? 21 ¿Chaychum wawaykikunataraq kañaspa chay idolokunaman ofrecerqanki? 22 Qamqa millakuypaq kaqkunata ruwaspam chaynataq hukwan-hukwan qanrakuspam imaynam wawa kaspayki qalalla kasqaykitawan yawarnikipi qochpasqaykitapas manaña yuyankiñachu. 23 Chayraykum ñoqa Tayta Dios kay-nata nini: ¡Ay, imaynaraq kanki chay millakuypaq mana allin kaqkuna ruwasqaykimanta! 24 Plazakunapi, esquinakunapi callekunapi idoloykikunapaqmi capillakunata ruwarqanki, hinaspam chaypi qanrakurqanki. 25 Ñanpa hawankunapim capillakunata hatarichirqanki, chaykunapim kuyayllapaq kaynikita qachacharqanki. Chayninta puriqmanqa lliwmanmi cuerpoykita qorqanki. Hukwan-hukwanmi qanrakurqanki. 26 Vecinoyki Egipto runakunawanmi qanrakurqanki, chuchumika kaynikipi millakuypaq kaqkunata ruwaspam piñachiwarqanki. 27 Chayraykum qamta castigaspay mikunaykitapas asllayachirqani, hinaspam cheqnisuqniki filisteokunaman qoykurqayki munasqankuta ruwasunaykipaq; chay millakuypaq kaqkuna ruwasqaykimantaqa paykunaraqmi penqakunkupas. 28 Chaywanpas mana wanaspam Asiria runakunawanpas qanrakurqanki, ichaqa manam chaywanpas contentarqankichu. 29 Chaynallataqmi Babilonia nacionpi negociante runakunawanpas aswan-aswanraq huchapakurqanki. Aswanqa manam chaywanpas hawkachu karqanki. 30 Ñoqa Tayta Diosmi kaynata nini: Sonqoykiqa pimanpas chaylla wayllukuykuqmi karqa; millakuypaq kaqkunata ruwachkaspapas chuchumika warmimantapas aswan mana penqakuqraqmi rikurirurqanki. 31 Ñanpa hawankunapim, lliw plazakunapim idoloykikunata yupaychanaykipaq altarkunata hatarichirqanki; chaykunapim tukuy rikchaq qarikunawan qanrakurqanki. Ichaqa manam chuchumika hinachu ruwarqanki, qamqa manam pimantapas cobrarqankichu. 32 Qosayuq kachkaspa pierdekuq warmi hinam qamqa mana reqsisqaykikunawan kakurqanki. 33 Llapa chuchumikaqa piwan karuspapas cobranmi, qanmi ichaqa qanrakusqayki runakunamanpas rega-lokunataraq pagarqanki. Tukuy hinas-tinmanta hamuspanku qanwan huchallikunankupaqmi regalokunataraq qorqanki. 34 Qamqa manam wakin warmikuna hinachu ruwarqanki, huchallikunankupaqqa manam pipas maskasunkichu, nitaqmi pagasunkichu, aswanqa qamraqmi paykunamanqa pagankipas. Chayna kaynikiwanmi mana wakin warmikunamanqa rikchakunkichu. 35 Chaynaqa, yaw chuchumika warmi, ñoqa Tayta Diospa nisqayta uyariy. 36 Ñoqa Tayta Diosmi kaynata niki: Qamqa mana penqakuspam qalalla cuerpoykita tukuy rikchaq runakunaman hinaspa millakuypaq idoloykikunaman qoykurqanki; chay idolokunaman ofrecenaykipaqmi wawaykikunata nakarqanki. 37 Chayraykum qanrakusqayki waynaykikunata llapallanta huñurusaq, huñurusaqtaqmi kuyasqayki kaqkunatapas chaynataq cheqnisqayki kaqkunatapas. Muyuriqnikiman huñuruspaymi qayllankupi llatanarusqayki, hinaptinmi llapallanku qalalla cuerpoykita qawanqaku. 38 Qosayuq kachkaspa pierdekuq warmita hinam chaynataq runa wañuchiqta hinam juzgasqayki, hinaspaymi sinchi piñakuyniypi chaynataq celoso kayniypi wañuyman qoykusqayki. 39 Paykunaman qoykuptiymi idoloykikunata yupaychanaykipaq capillakuna ruwasqaykitapas tuñichinqaku. Paykunam pachaykita chusturususpayki sumaq alhajaykikunatapas apakunqaku, hinaspam pasaypaq qalallata saqerusunki. 40 Contraykipim llaqtakunata hatarichimunqaku, paykunam rumiwan choqaparususpayki espadawan wañuchisunki. 41 Wasikitapas kañaspankum llapa warmikunapa qayllanpi juzgasunki. Chaynapim hukwan-hukwan qanrakuynikita puchukarachisaq, hinaptinmi waynaykikunamanpas manaña pagankiñachu. 42 Chaynatam contraykipi piñakuyniyta tanichisaq, celoso kayniypas tukunqam, hawkayaspaymi manaña mastaqa piñakusaqchu. 43 Qanmi sipas kaspa imaynam kasqaykita qonqarurqanki, hinaspam tukuy chay mana allinkunata ruwaspa piñachiwarqanki; chayraykum imaynam kawsasqaykimanta castigasqayki. Ñoqa Tayta Diosmi chaynata nini. Jerusalenqa paqway huchasapa kasqanmanta 44 Rikchanachiy rimaq runakunam qanmanta kaynata rimanqaku: “Imaynam maman karqa chaynallam wawanpas kanqa”, nispanku. 45 Qamqa kanki qosantapas wawan-kunatapas cheqniq warmipa wawanmi. Chaynallam ñañaykikunapas qosankutawan wawankuta cheqnirqaku. Het casta warmim mamaykichikpas karqa, taytaykichikñataqmi Amor casta runa karqa. 46 Mayor ñañaykim Samaria, paymi wawankunapiwan norte lawnikipi yachachkanku; Sodomañataqmi sullka ñañayki, paypas wawankunapiwanmi sur lawnikipi yachachkanku. 47 Qampas paykunapa imaynam kawsasqankutam qatipakurqanki, hinaspam millakuypaq ruwasqankuta ruwarqanki, ichaqa chaykunawanpas mana contentaspam paykunamantapas aswan millakuypaq kaqkunataraq ruwarqanki. 48 Chayraykum ñoqa Tayta Dios kay-nata nini: Ñañayki Sodomawan wawan-kunapas manam qanwan wawaykiku-napa ruwasqaykichikta hinaqa ruwarqakuchu. 49 Ñañayki Sodomapa mana allinkuna ruwasqanqa kaymi karqa: Payqa wawankunapiwanmi, achkallaña mikunayuq kasqankurayku, tukuy imayuq kaspa hawka kawsakusqankurayku hatun tukuqllaña karqaku. Ichaqa manam wakchakunatawan mana imayuqkunatapas yanapaykurqakuchu. 50 Hatun tukuqllaña rikuriruspankum millakuypaq kaqkunataña qayllaypi ruwarqaku, chayraykum qawasqaykipi hinapas chinkarachirqani. 51 Samariam ichaqa tukuy millakuypaq kaqkuna ruwasqaykipa partellantapas mana huchallikurqachu. Qamqa paykunamantapas paqway millakuypaq kaqkunatam ruwarqanki; qanwan rikchanachisqaqa paykunaqa mana huchayuqmanraqmi rikchakunkupas. 52 Qamqa ñañaykikunamantapas aswan millakuypaqtaraq huchallikuspam paykunataqa mana huchayuqpaq hina qawasqataraq rikurirachinki, chaynaqa penqakuymanta kukurayay, penqaypi kasqaykita aguantay, qamqa ñañaykikunatam mana huchayuqta hina ruwarunki. 53 Sodomatawan Samariatam wawan-tintakama preso apasqa kasqankumanta kutichimusaq, qamtapas preso risqaykimantam kutichimusqayki, 54 chaynapim sasachakuynikikunata qepikuykuspa tukuy ima ruwasqaykimanta penqakunki. Chayna kasqaykim paykunapa sonqonta tiyachinqa. 55 Ñañayki Sodomawan ñañayki Samaria wawantinkama ñawpaqta hina kaptinkum, qampas wawaykikunapiwan imaynam ñawpaqta kasqaykichikpi hina kankichik. 56 Hatun tukuq kaynikipim ñañayki Sodoma castigasqa kaptin burlakurqanki, 57 millakuypaq kaqkuna ruwasqaykipas manaraq rikukuchkaptin. Kunanmi ichaqa Edom lawpi llaqtakunapas, filisteokunapas chaynataq llapallan muyuriqnikipi yachaqkunapas millakuywan qawasunki. 58 Chaynaqa, millakuypaq kaqkuna ruwasqaykimanta castigoykitam aguantanki. Ñoqa Tayta Diosmi chaynata nini. 59 Ñoqa Tayta Diosmi kaynata nini: Juramentowan pacto ruwasqanchikta mana kasukusqaykimantam merecesqaykiman hina castigasqayki. 60 Ñoqam ichaqa warma kaptikiraq pacto ruwasqayta yuyarisaq, hinaspaymi wiñaypaq pactota qanwan ruwasaq. 61 Mana pacto ruwasqanchikpa parten kachkaptinpas, mayor ñañaykitawan sullka ñañaykita wawaykipaq hina qoykuptiymi, ñawpaqta millakuypaq kaqkuna ruwasqaykita yuyarispa penqakuymanta ñakakunki. 62 Huktawanmi pactota qanwan ruwasaq, hinaptinmi Tayta Dios kasqayta yachanki. 63 Mana allin ruwasqaykikunamanta pampachaykuptiymi chaykunata yuyarispa penqakuymanta simikitapas manaña kicharinkichu. Ñoqa Tayta Dios chaynata nini. |
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012
Peruvian Bible Society