Ezequiel 15 - CHUYA QELLQA La Biblia en Quechua de Ayacucho 2012Israel runakunata mana valeq uvas plantawan rikchanachisqanmanta 1 Tayta Diosmi rimapayawaspan kaynata niwarqa: 2 Runapa churin, ¿imapitaq uvaspa kaspin wakin sachakunapa kullunmanta aswan allin? 3 ¡Uvaspa kaspinqa manam imapaqpas servinchu! ¡Manam ima warkukunallapaqpas servikunchu! 4 Uvas kaspiqa yantallapaqmi servikun, sichum puntankunata nina ruparuptin chawpinñataq carbonyarunman hinaspaqa, ¿yaqachu imallapipas servikunmanraq? 5 Sichum manaraq ruparuchkaspa mana imapaqpas servikuchkaspaqa aswanchiki carbonyaruspaqa manaña imapaqpas valenqachu, nispa. 6 Chayraykum ñoqa Tayta Dios kaynata nini: Imaynam uvaspa kaspinta rupananpaq ninaman wischuykunku, chaynatam Jerusalenpi yachaqkunatapas ninaman wischuykusaq. 7 Paykunapa contranpim ñoqaqa sayarisaq, ninapa rupayninmantaña ayqeruptinkupas hina ninam paykunataqa kañanqa. Paykunapa contranpi hatariptiymi Tayta Dios kasqayta yachankichik. 8 Contraypi hatarisqankumantam nacionninkutapas pasaypaqta chunnichisaq. Ñoqa Tayta Diosmi chaynata nini. |
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012
Peruvian Bible Society