Ezequiel 14 - CHUYA QELLQA La Biblia en Quechua de Ayacucho 2012

Idolokuna yupaychaqkunaqa castigasqa kanankumanta

¹ Israelmantam wakin ancianonkuna hamuspanku ñawpaqniypi tiyaykurqaku.

² Hinaptinmi Tayta Dios kaynata niwarqa:

³ Runapa churin, kay runakunaqa tukuy sonqonkumantam idolokuna yupaychayman qokurunku, huchallichiqninkupim hapipakurunku. ¿Chaychum tapuwanankutaraq saqeyman?

⁴ Chaynaqa, ñoqa Tayta Diospa nisqayta paykunaman kaynata niy: Israelmanta pipas idolokuna yupaychayman qokuruspa huchallichiqninkupi hapipakuchkaspa profetaymanraq tapukuq hamuqkunataqa, tukuy rikchaq idolonkunaman hinam contestasaq, nispayki.

⁵ Icharaqpas chaynata ruwaptiy tukuy rikchaq idolokunata qatispa qepanchawasqankumanta wanakunmanku.

⁶ Chaynaqa, ñoqa Tayta Diospa nisqayta Israelpa mirayninkunaman kaynata niy: Millakuypaq idoloykichikkunatawan mana allin ruwaynikichikta saqespa ñoqaman kutirikamuwaychik.

⁷ Sichum Israelpi yachaqkunamanta, Israelpa miraynin kaspapas otaq huklaw llaqtayuq kaspapas, ñoqamanta karunchakuruspa idolokuna yupaychayman qokuruspa huchallichiqninkupi hapipakuchkaspa profetaymanraq tapukunanpaq hamuqtaqa ñoqa Tayta Diosmi contestasaq.

⁸ Chay runapa contranpi hatarispaymi, wakin runakunapas manchakuyta yachanankupaq castigaruspay llaqtaypa chawpinmanta chinkarachisaq. Chaynapim Tayta Dios kasqayta yachankichik.

⁹ Sichum hukkaqnin profeta engañarachikuspa llullata rimaptinqa, paytaqa ñoqam pantarachini; chaynaqa castigaspaymi paytapas llaqtaypa chawpinmanta chinkarachisaq.

¹⁰ Hinaptinmi tapukuqpas chaynataq llulla profetapas iskayninku huchankumanta castigasqa kanqaku.

¹¹ Chaynapim Israel llaqtaqa manaña ñoqamanta karunchakunqañachu, nitaqmi millakuypaq kaqkunatapas ruwanqañachu. Paykunam llaqtay kanqaku, ñoqañataqmi Diosninku kasaq. Ñoqa Tayta Diosmi chaynata nini.

Jerusalén llaqta castigasqa kananmanta

¹² Tayta Diosmi kaynata niwarqa:

¹³ Runapa churin, sichum hukkaqnin nación huchallikuspan ñoqamanta karunchakuruptinqa castiganaypaqmi makiyta hoqarisaq, hinaspaymi mikunankutapas chinkarachisaq, yarqayta kachaykuptiymi runakunapas hinaspa animalkunapas wañunqaku.

¹⁴ Sichum chay nacionpa chawpinpi tarikunmanku Noeywan, Daniel chaynataq Job, hinaspaqa allin ruwaq kasqankuraykum kay kimsallanku salvakunmanku. Ñoqa Tayta Diosmi chaynata nini.

¹⁵ Sichum runa mikuq animalkunata chay nacionman kachaykuptiy llapa runakunata mikuruspa chunnirachinman, chay animalkunata manchakusqankurayku manaña pipas chayninta pasanankama,

¹⁶ sichum chay kimsa runakunaña chay nacionpi yachaspanpas manam churinkutawanpas salvaytaqa atinmankuchu, aswanqa kikillankum salvakunmanku hinaptinchá chay nacionqa purmarunman.

¹⁷ Sichum chay nacionman guerrata kachaykuptiy runakunapas animalpas wañurunman,

¹⁸ chay kimsa runakunaña chay nacionpi yachaspanqa manam churinkutawanpas salvaytaqa atinman-kuchu, aswanqa kikillankum salva-kunmanku.

¹⁹ Sichum chay nacionman peste onqoyta kachaykuptiy runakunatawan animalkunata tukurunman,

²⁰ ichaqa Noeywan, Daniel hinaspa Job chay nacionpi yachaspankuqa manam churinkutawanpas salvaytaqa atinmankuchu, aswanqa kikillankum allin ruwaq kasqankurayku salvakunmanku.

²¹ Chayraykum ñoqa Tayta Dios kaynata nini: Aswanraqmi kanqa Jerusalén llaqtaman manchakuypaq tawa castigoykunata kachaykamuptiyqa. Kay tawa castigoykunam kaykuna: Guerra, yarqay, runa mikuq animalkuna hinaspa peste onqoy. Chaykunam runakunata hinaspa animalkunatapas wañuchinqaku.

²² Aswanqa asllañam puchurunqaku, paykunam qari churinkuwan warmi churinkuwan chaymanta lloqsinqaku, hinaspam qamkunapa kasqaykichikman hamunqaku, qamkunañataqmi imaynam kawsasqankutawan imakunam ruwasqankuta qawaykuspa Jerusalén llaqtata castigasqaymanta sonqoykichikta tiyachinkichik.

²³ Imaynam kawsasqankutawan imakunam ruwas-qankuta qawaspam sonqoykichikta tiyachinkichik, chaynapim yachankichik Jerusalén llaqtataqa mana yanqamantachu castigasqayta. Ñoqa Tayta Diosmi chaynata nini.