Ezequiel 11 - CHUYA QELLQA La Biblia en Quechua de Ayacucho 2012

Jerusalén llaqta castigasqa kananmanta

¹ Tayta Diospa Espiritunmi hoqariruwaspan templopa intipa qespimunan law punkunman aparuwarqa, chay punkupa ñawpaqninpim iskay chunka pichqayuq runakuna kachkasqaku, paykunawanmi Azurpa churin Jaazaniaswan Benaiapa churin Pelatiaspas kachkasqaku, paykunaqa iskayninkum runakunapa kamachiqnin karqaku.

² Chaymantam Tayta Dios kaynata niwarqa: Runapa churin, kay runakunam pasaypaq mana allinkunallata tanteachkanku, kay llaqtapi runakunatapas mana allinkunallatam umachachkanku,

³ paykunam nichkanku: “Manapas unaypim ñoqanchikqa wasinchikta perqarusun. Mankapi aycha hinam hawka kakusunchik”, nispanku.

⁴ Chaynaqa, runapa churin, paykunapa contranpi profetizamuy, nispa.

⁵ Tayta Diospa Espiritunmi huntaykuwaspan kaynata kamachiwarqa: Tayta Diosmi kaynata nin: Israelpa mirayninkuna, chaykunatam rimarqan-kichik, chaywanpas imam tanteasqaykichiktaqa yachanim.

⁶ Qamkunaqa kay llaqtapim runakunata achkallataña wañurachinkichik, callenkunatapas ayakunawanmi huntarachinkichik.

⁷ Chayraykum ñoqa Tayta Dios kaynata nini: Jerusalén llaqtaqa manka hinam kanqa, chay mankapa ukunpi aychaqa manam qamkunachu kankichik, aswanqa wañuchisqaykichik runakunapa ayanmi, ichaqa ñoqam chay mankamanta hurqosqaykichik.

⁸ Qamkunaqa guerratam manchakurqankichik, chaynaqa guerratam qamkunaman kacharimusqaykichik. Ñoqa tayta Diosmi chaynata nini.

⁹ Qamkunataqa llaqtamantam qarqosqaykichik hinaspam huklaw llaqtayuq runakunamanña qoykusqaykichik, chaynatam castigasqaykichik.

¹⁰ Qamkunaqa guerrapim wañunkichik, Israel nacionpa linderonpim juzgasqaykichik, chaynapim Tayta Dios kasqayta yachankichik.

¹¹ Llaqtaqa manam manka hinachu qamkunapaq kanqa, nitaqmi qamkunapas aycha hinachu kankichik, qamkunataqa Israel nacionpa linderonkunapim juzgasqaykichik.

¹² Chaynapim Tayta Dios kasqayta reqsinkichik. Qamkunaqa manam kamachikuyniyman hinachu kawsarqankichik, manataqmi decretoykunatapas ruwayman-qa churarqankichikchu, aswanqa muyu-riqnikichikpi nacionkunapa costumbreman hinam kawsarqankichik, nispa.

¹³ Profetizachkaptiymi Benaiapa churin Pelatías qonqayta wañururqa; ñoqaña-taqmi pampaman kumuykuspay kaynata qaparirqani: ¡Ay, Dios Taytalláy! ¿Israelpa mirayninkunamanta puchuqkunatapas lliwtachu wañurachinki? nispay.

Musoq pactota Tayta Dios ruwananmanta

¹⁴ Tayta Diosmi kaynata niwarqa:

¹⁵ Runapa churin, Jerusalén llaqtapi yachaq-kunam Israelpa mirayninkunamanta kaynata rimachkanku: “Paykunaqa Tayta Diosmantam karunchakurunku, ñoqanchikmanmi ichaqa kay nacionta qoykuwanchik”, nispanku.

¹⁶ Chaynaqa, ñoqa Tayta Diospa nisqayta paykunaman kaynata nimuy: Paykunatam kay nacionmanta qarqoruspay tukuy hinastinman cheqerachirqani, ichaqa manam unaypaqchu. Chaywanpas maypiña kaptinkupas ñoqam paykunapa santuarion kasaq.

¹⁷ Chayraykum ñoqa Tayta Dios kaynata nini: Ñoqam paykunataqa cheqechisqay nacionkunamanta kutichimusaq, chay nacionkunamanta huñumuspaymi kay Israel allpata paykunaman qosaq.

¹⁸ Paykunam llaqtankuman kutispanku llapallan cheqnisqay kaqkunata hinaspa llapallan millakuypaq kaqkunata chinkachinqaku.

¹⁹ Chaynapim rumi hina sonqonkuta qechusaq, hinaspaymi musoq sonqotawan musoq espiritutaña paykunaman qosaq.

²⁰ Hinaptinmi kamachikuyniykunaman hina decretoykunaman hina kawsaspanku ruwayman churanqaku. Paykunam llaqtay kanqa, ñoqañataqmi Diosninku kasaq.

²¹ Cheqnisqay idolokunata qatispa millakuypaq kaqkuna ruwaqkunatam ichaqa, imaynam kawsasqankumanta cuentata mañasaq. Ñoqa Tayta Diosmi chaynata nini.

Jerusalenmanta Tayta Diospa kanchariynin chinkarusqanmanta

²² Chay querubinkunam raprankuta kicharispa pawarqaku, paykunawantaqmi waqtankupi ruedakunapas hoqarikururqaku. Israelpa yupaychasqan Tayta Diospa kanchariyninñataqmi paykunapa hawanpi karqa.

²³ Tayta Diospa kanchariyninmi llaqtapa chawpinmanta hoqarikuruspan huk orqopa hawanpi sayaykurqa, chay orqoqa kachkan llaqtamanta intipa qespimunan lawninpim.

²⁴ Chaymantam Diospa Espiritunñataq chay visionpi hoqariruwaspan Babilonia nacionman kutirachiwarqa, preso apasqakunapa kasqanman. Chaynatam Tayta Diospa visión qawachiwasqan chinkarurqa.

²⁵ Hinaptinmi preso apasqa kaqkunaman Tayta Diospa tukuy ima qawachiwasqanta willarqani.