Éxodo 39 - CHUYA QELLQA La Biblia en Quechua de Ayacucho 2012

Sacerdotekunapaq pachakuna ruwasqankumanta

¹ Santuariopi servikunanpaqmi bordasqa pachakunata morado qaytumanta, grosella qaytumanta hinaspa guindo qaytumanta ruwarqaku. Ruwarqakutaqmi Aaronpa santuariopi servikunan pachankunatapas; chaykunataqa ruwarqaku imaynam Moisesman Tayta Diospa kamachisqanman hinam.

² Efodtam qorimanta, morado qaytumanta, grosella qaytumanta, guindo qaytumanta hinaspa kawpusqa linomanta ruwarqaku.

³ Qorita llaspayachispam qaytuta hurqorqaku hinaspam morado qaytuwan, grosella qaytuwan, guindo qaytuwan hinaspa llañu lino qaytuwan kuruyuqta awarqaku.

⁴ Efodpa iskaynin hombronkunapim tirantenkunata huñunaspa hapinanpaq ruwarqaku.

⁵ Efodpa hawanpi watakupas huk piezallamantam karqa: Qorimanta, morado qaytumanta, grosella qaytumanta, guindo qaytumanta hinaspa kawpusqa linomanta. Chaykunataqa Moisesman Tayta Diospa kamachisqanman hinam ruwarqaku.

⁶ Ónice alhaja rumikunata labraspam Israelpa churinkunapa sutinta sellowan churachkaq hina qellqarqaku, hinaspam chay alhaja rumikunata qorimanta ganchoman hapichirqaku.

⁷ Chay rumikunatam efodpa hombronman churarqaku, chaykunataqa churarqaku Israelpa mirayninkunata yuyarinankupaqmi. Moisesman Tayta Diospa kamachisqanman hinam ruwarqaku.

⁸ Efodta ruwasqankuta hinam pectoraltapas ruwarqaku. Chaytaqa qorimanta, morado qaytumanta, grosella qaytumanta, guindo qaytumanta hinaspa kawpusqa linomantam ruwarqaku.

⁹ Chay pectoralqa karqa cuadradom chawpinmanta iskayman patarasqa, tawan waqtankunam cuarto metrokama karqa.

¹⁰ Chay pectoralpa hawanmanmi alhaja rumikunata tawa seqeta hapichirqaku. Punta kaq seqepim sardio, topacio hinaspa carbunclo alhaja rumikuna karqa.

¹¹ Iskay kaq seqepim esmeralda, zafiro hinaspa diamante alhaja rumikuna karqa.

¹² Kimsa kaq seqepim jacinto, ágata hinaspa amatista alhaja rumikuna karqa.

¹³ Tawa kaq seqepiñataqmi berilo, ónice hinaspa jaspe alhaja rumikuna karqa. Chay alhaja rumikunam sapakama qorimanta corcheteman hapichisqa karqa.

¹⁴ Israelpa chunka iskayniyuq churinkunapa sutinman hinam alhaja rumikunapas chunka iskayniyuq karqa. Sellowan churasqa hinam sapa ayllupa sutin huk rumipi qellqasqa karqa.

¹⁵ Pectoralpa hawanpim qorimanta cadenakunata cordonta hina ruwar-qaku.

¹⁶ Ruwarqakutaqmi qorimanta iskay anillokunatawan iskay ganchonkunatapas, chay anillokunatam pectoralpa hanay patanpa esquinankunaman churarqaku.

¹⁷ Hinaspam chay anillokunaman qorimanta iskay cadenakunata churarqaku.

¹⁸ Iskaynin qori cordonkunapa puntantam efodpa tirantenkunapa ñawpaqninpi iskay ganchokunaman hapichirqaku.

¹⁹ Qorimanta iskay anillokunatapas ruwarqakutaqmi, hinaspam pectoralpa iskaynin uran kaq esquinankunaman churarqaku, efodwan tupanakuq ukun law patanman.

²⁰ Ruwarqakutaqmi qorimanta iskay anillokunatapas, chaykunatam efodpa iskaynin tirantenkunapa ñawpaqninpi, uran kaq costurapa hichpanpi hinaspa efodpa watakunpa hananpi churarqaku.

²¹ Hinaspam morado qaytumanta cordonwan pectoralpa anillonkunamanta efodpa anillonkunaman hapichirqaku, chaynapi pectoralqa efodpa watakunpa hawanpi kananpaq hinaspa efodmanta mana rakikunanpaq; chaynataqa ruwarqaku imaynam Moisesman Tayta Diospa kamachisqanman hina.

²² Efodpa ukunpi kaq tunicatapas morado qaytumantam awarqaku;

²³ uma ustuchinapaq chawpinpi uchkuyuqta, mana llikikunanpaqñataqmi ribetesqa karqa.

²⁴ Chay tunicapa muyuriq patanpim granadaman rikchakuq adornokunata churarqaku. Chaykunataqa morado qaytumanta, grosella qaytumanta, guindo qaytumanta hinaspa kawpusqa linomantam ruwarqaku.

²⁵ Ruwarqakutaqmi qorimanta campanillakunatapas, hinaspam tunicapa patan muyuriqninpi churarqaku granadawan chawpichasqata.

²⁶ Servicio ruwanapaq tunicapa lliw patanmanmi huk granadata churarqaku qepanmanñataqmi huk campanillata, chaypa qepanmanñataqmi granadata, chayna qatinastam lliw muyuriqninpi churarqaku, imaynam Moisesman Tayta Diospa kamachisqanman hina.

²⁷ Aaronpaqwan churinkunapaqmi llañu lino qaytumanta tunicakunata awarqaku.

²⁸ Mitratapas, uma watakunatapas hinaspa calzoncillokunatapas kawpusqa linomantam ruwarqaku;

²⁹ chumpitapas sumaq kuruyuqta, kawpusqa linomanta, morado qaytumanta, grosella qaytumanta hinaspa guindo qaytumantam ruwarqaku, imaynam Moisesman Tayta Diospa kamachisqanman hina.

³⁰ Ruwarqataqmi sacerdoteta sapaqchananpaq qorimanta letrerotapas. Chay letreropim sellowan hina qellqarqaku “Tayta Diospaq sapaqchasqa”, niqta.

³¹ Hinaspam morado qaytumanta huk cordonta churarqaku chaywan mitrapa hawanman watanankupaq, imaynam Moisesman Tayta Diospa kamachisqanman hina.

Santuario ruwayta tukusqankumanta

³² Israelpa mirayninkunam santuario ruwayta tukururqaku, imaynam Moisesman Tayta Diospa kamachisqanman hina.

³³ Ruwayta tukuruspankum Moisesman entregarqaku: Santuariota, servicionkunata, corchetenkunata, tablankunata, listonninkunata, pilarninkunata, toqoyuq tiyanankunata,

³⁴ carneropa pukaman teñisqa qalasninmanta qatanta, fino qalaskunamanta qatanta, “Chuyay-chuyay” lugarmanta “Chuya” lugarta rakinaq velota,

³⁵ Diospa pacto ruwasqan Arcata, varillankunata, Arcapa tapanta,

³⁶ mesata servicionkunatawan, Diosman ofrecesqa tantata,

³⁷ qorimanta candelabrota seqella mecheronkunatawan, llapallan servicionkunata, achkipaq aceiteta,

³⁸ qorimanta altarta, Diospaq sapaqchaspa tallinapaq kaq aceiteta, miski asnaq inciensota, santuariopa punkunpaq cortinata,

³⁹ broncemanta altarta, broncemanta rejillanta, varillankunata, llapallan servicionkunata, lavatoriota, lavatoriopa tiyananta,

⁴⁰ patiopa cortinankunata, pilarninkunata, toqoyuq tiyanankunata, patiopa punkunpaq cortinata, waskakunata, estacankunata hinaspa Diosman asuykuna carpapi servichikunapaq llapallan serviciokunata.

⁴¹ Qorqakutaqmi santuariopi servikunanpaq awasqanku pachakunatapas. Sacerdote Aaronpa chuya pachankunatawan churinkunapa pachankunatapas.

⁴² Tukuy chaykunatam Israelpa mirayninkuna ruwarqaku imaynam Moisesman Tayta Diospa kamachisqanman hina.

⁴³ Tukuy chaykunata, Tayta Diospa kamachisqanman hina ruwarusqankuta qawaykuspanmi Moisés bendeciykurqa.