Éxodo 30 - CHUYA QELLQA La Biblia en Quechua de Ayacucho 2012

Incienso kañana altarmanta

¹ Incienso kañana altartam acacia tablamanta ruwanki.

² Chay altarqa cuadradom kanqa, tawan lawninpa medidanmi yaqa parte metrokama kanqa, sayayninñataqmi yaqa huk metro kanqa, altarwan tawan esquinanpi waqrachankunapas huk piezallamantam kanqa.

³ Hawanta, muyuriqnin waqtankunata hinaspa waqrachankunatapas qoriwanmi llusinki, muyuriqninpiñataqmi qorimanta moldurata churanki.

⁴ Qorimanta tawa anillokunata ruwaspam chay moldurapa urayninpi churanki, kaylawninpi iskayta waklawninpiñataq iskayta, chaynapi varillakunata anillokunaman ustuchispa chaywan altarta apanankupaq.

⁵ Chay varillakunataqa acacia sutiyuq kaspimantam ruwanki, hinaspam qoriwan llusinki.

⁶ Chay altartam velopa qepanpi, pacto ruwasqay Arcapa waqtanpi churanki, tapapa ñawpaqninpi, chaypim qanwan tupasaq.

⁷ Sapa tutapaytam mecherokuna alistana horapi, chay altarpa hawanpi miskillaña asnariq inciensota Aarón kañapuwanqa.

⁸ Tutaykuqtañataqmi me-cherokuna ratachina horata, ñoqa Tayta Diospa ñawpaqniypim inciensota Aarón kañapuwanqa. Qamkunapas miraynikikunapas mana tipiytam wiñaypaq chaynata ruwankichik.

⁹ Chay altarpa hawanpiqa amam huk rikchaq inciensotaqa kañankichu, nitaq animaltapas, kawsaymanta ofrendatapas. Amataqmi vino ofrendatapas tallinkichu.

¹⁰ Aaronmi watapi huk kutita altarpa tawan esquinanpi waqrachankunata yawarwan llusinqa. Chaynataqa ruwanqa hucha pampachanapaq wañuchisqanku animalpa yawarninwanmi; chay altarqa ñoqallapaqña sapaqchasqam kanqa.

Vidankupa rantinpi ofrenda qonankumanta

¹¹ Moisestam Tayta Dios nirqa:

¹² Israelpa mirayninkuna sapakama censasqa kaspankuqa vidankupa rantinpim ñoqa Tayta Diosman apamuwanqaku, chaynapim yupachikusqankumanta mana ima onqoytapas kacharimusaqchu.

¹³ Censopi pipas yupachikuqqa ñoqa Tayta Diosmanmi pichqa gramo qollqeta qowanqa santuariopi kaq pesoman hina. Pichqa gramo qollqem ñoqapaq ofrenda kanqa.

¹⁴ Pipas iskay chunka watayuqmanta hanayman yupasqa kaqmi ñoqa Tayta Diosman pagawanqa.

¹⁵ Vidaykichikpa rantinpi ofrendata qowaspaykichikqa apupas wakchapas pichqa gramo qollqellatam qowankichik, mana masyachispa nitaq menosyachispa.

¹⁶ Chaynaqa, Israelpa mirayninkuna vidankupa rantinpi qollqe qosqankuta chaskispam ñoqaman asuykuna carpapi imakunapas ruwachinapaq qonki. Chaynapim Israelpa mirayninkunata yuyaspay mana qonqasaqchu kikinkupa rantinpi ofrenda qowasqankutapas.

Santuariopa ñawpaqninpi mayllakunapaq lavatoriomanta

¹⁷ Chaymantam Moisesta Tayta Dios nirqa:

¹⁸ Broncemanta lavatoriotam mayllakunapaq ruwanki, chay lavatorioqa broncemanta tiyanayuqmi kanqa, chaytaqa Diosman asuykuna carpamanta altarman rinapim churanki, chay lavatorioqa yakuyuqmi kanqa.

¹⁹ Chay yakuwanmi Aaronpas hinaspa churinkunapas makin-kutawan chakinkuta mayllakunqaku.

²⁰ Ñoqaman asuykuna carpaman yaykuspanku mana wañurunankupaqmi mayllakunqaku, mayllakunqakutaqmi ñoqapaq ofrendata kañapuwanankupaq altarman asuykuspankupas.

²¹ Mana wañurunankupaqmi makinkutawan chakinkuta mayllakunqaku. Kay decretom Aaronpaqwan mirayninkunapaq wiñaypaq kanqa, nispa.

Diospaq imatapas sapaqchanapaq aceitemanta

²² Kaqllamantam Moisesta Tayta Dios nirqa:

²³ Kay miski asnaq qorakunatam huñunki: Mirra sachapa weqenmanta yaqa soqta kilota, canelamanta yaqa kimsa kilota, cálamo sutiyuq plantamantañataq yaqa kimsa kilota,

²⁴ casiamanta yaqa soqta kilota, huñunkitaqmi aceitunasmanta kimsa litro parten aceitetapas, chaykunataqa huñunki santuariopi pesoman hinam.

²⁵ Chay miski asnaq qorakunamantam ñoqapaq sapaqchana aceiteta ruwanki, chaytaqa ruwanki perfumekuna ruwaqpa ruwasqanta hinam. Chaymi ñoqallapaqña sapaqchanapaq tallina aceite kanqa.

²⁶ Chay aceitewanmi ñoqaman asuykuwananku carpaman, pacto ruwasqay Arcaman tallinki.

²⁷ Tallinkitaqmi mesamanpas tukuy servicionkunamanwan candeleromanpas, lliw servicionkunamanwan chaynataq kañapuwananku altarmanpas.

²⁸ Tallinkitaqmi lliw kañana altarpa hawanmanpas, llapallan servicionkunamanwan lavatoriopa tiya-nanmanpas.

²⁹ Tukuy chaykunata sapaqchaptikim ñoqallapaqña sapaqchasqa kanqa. Chaykunata imapas tupaykuqqa ñoqapaq sapaqchasqañam kanqa.

³⁰ Aaronmanpas hinaspa churinkunamanpas chay aceitetam tallinki, chaynatam paykunata sacerdoteykuna kananpaq sapaqchanki.

³¹ Ñoqa Tayta Diospa nisqaytayá Israelpa mirayninkunaman kaynata nimuy: “Kaymi ñoqata serviwanaykichikpaq tallina aceite lliw miraynikichikpi kanqa.

³² Huk rikchaq runakunamanqa amam tallinkichikchu, amataqmi chayman rikchakuq huk aceitetaqa ruwankichikchu. Chay sapaqchasqa aceiteqa ñoqa serviwanallaykichikpaqmi kanqa.

³³ Pipas chayman rikchakuq aceiteta ruwaqqa otaq mana sacerdote kaqman talliqqa ayllunmanta chinkachisqam kanqa”, nispa.

Inciensota imaynam preparanankumanta

³⁴ Moisestam Tayta Dios nirqa: Kay miski asnaq qorakunapa weqentapas huñunkitaqmi: Estacte plantapa weqenta, uña olorosa sutiyuq plantapa weqenta, incienso sachapa chuya weqenta hinaspa gálbano plantapa weqentapas, kaykunaqa chaynakamallam kanqa.

³⁵ Tukuy chaykunawanmi perfumekunata ruwaqpa ruwasqanta hina miski asnaq inciensota ruwanki, hinaspam kachita yapanki, chaynapim ñoqallapaqña sapaqchasqa kanqa.

³⁶ Wakintam ñutuy-ñutuyta kutaruspa ñoqaman asuykuna carpapi pacto ruwasqay Arcapa ñawpaqninman churanki, chaypim qanwan tupasun, chay inciensoqa ñoqallapaqña sapaqchasqam kanqa.

³⁷ Kayna inciensotaqa amam pipas ruwakunqachu, chay inciensoqa ñoqa Tayta Diosllapaqña sapaqchasqa kasqanrayku.

³⁸ Pipas muskikunanpaq chayna perfumeta ruwaqqa ayllunmanta chinkachisqam kanqa, nispa.