Éxodo 27 - CHUYA QELLQA La Biblia en Quechua de Ayacucho 2012

Ofrendakunata kañanapaq bronce altarmanta

¹ Huk cuadrado altartam acacia tablamanta ruwanki, largonpas anchonpas iskay metro cuartonmi kanqa, sayayninñataqmi huk metro cuarton.

² Chay altarpa tawan esquinanpim waqrachakunata ruwanki; altarwan waqrachakunaqa huk piezallamantam kanqa. Chay altartam broncewan llusinki.

³ Ruwankitaqmi uchpa hoqarina mankankunatapas, palankunatapas, tazonninkunatapas, trinchenkunatapas hinaspa ninapaq kallanankunatapas. Chay serviciokunaqa lliwmi broncemanta kanqa.

⁴ Ruwankitaqmi broncemanta rejillan-tapas, chay rejillapa tawan patanpim broncemanta tawa anillokunata ru-wanki.

⁵ Chay rejillatam altar ukupi chakanki, chaynapim chay rejillaqa altarpa chawpinpi chakarayanqa.

⁶ Chay altarpaqmi acacia kaspimanta tawa varillakunata ruwanki, chaykunatam broncewan llusinki.

⁷ Chay varillakunatam altarpa iskay lawninpi anillokunapa chawpinta pasachinki, hinaptinmi chaykunaqa kanqa apanankupaq.

⁸ Altarpa ukunqa uchkum kanqa, waqtankunañataqmi tablamanta. Imaynam orqopi qawachisqayman hinam ruwanki.

Carpapa muyuriqninpi patiomanta

⁹ Ruwankitaqmi carpapa pationtapas. Chay patiopa alleq lawninpi cortinankunam kawpusqa linomanta kanqa, tawa chunka pichqayuq metro largoyuq.

¹⁰ Iskay chunka pilarninkunawan iskay chunka tiyanankunaqa broncemantam kanqa. Pilarkunapa ganchonkunawan varillankunañataqmi qollqemanta kanqa.

¹¹ Patiopa ichoq lawninpi cortinakunapa largonmi tawa chunka pichqayuq metro kanqa. Iskay chunka pilarninkunawan iskay chunka tiyanankunapas broncemantam kanqa; pilarkunapa ganchonkunawan varillankunapas qollqemantam kanqa.

¹² Carpapa qepa lawnin otaq intipa seqaykunan law pationmi kanqa iskay chunka iskayniyuq metro parten anchoyuq, chayna medidayuqllam cortinankunapas kanqa; pilarninkunapas kanqa chunkam, chaykunam toqoyuq chunka tiyanankunapi tiyanqa.

¹³ Carpapa ñawpaqnin otaq intipa qespimunan law patiopa anchonpas iskay chunka iskayniyuq metro partenmi kanqa.

¹⁴ Punkupa huknin waqtanmi yaqa qanchis metro cortinayuq hinaspa kimsa pilarniyuq kanqa, chay kimsa pilarninkunam kimsa tiyanakunapi tiyanqa.

¹⁵ Punkupa huklawnin waqtanpas qanchis metro cortinayuq hinaspa kimsa pilarniyuqmi kanqa, chay kimsa pilarninkunapas toqoyuq kimsa tiyanakunapim tiyanqa.

¹⁶ Patioman yaykunapim huk cortina isqon metro largoyuq kanqa, chay cortinaqa morado qaytumanta, grosella qaytumanta hinaspa guindo qaytumantam kanqa hinaspa kawpusqa linomanta suma-sumaq bordasqam kanqa. Pilarninkunawan tiyanan toqokunapas tawam kanqa.

¹⁷ Patiopa muyuriqninpi llapallan pilarkunapa anillonkunawan ganchonkunam qollqemanta kanqa, toqoyuq tiyanankunañataqmi broncemanta kanqa.

¹⁸ Patiopa largonmi tawa chunka pichqayuq metro kanqa, anchonñataqmi iskay chunka iskayniyuq metro parten kanqa, sayayninmi iskay metro cuarton kanqa; cortinankunapas kawpusqa linomantam kanqa, toqoyuq tiyanankunañataqmi broncemanta kanqa.

¹⁹ Carpapi servikunanpaq llapallan serviciokunaqa broncemantam kanqa, carpapa llapallan estacankunawan patiopa llapallan estacankunapas broncemantam kanqa.

Mecherokunapaq aceitemanta

²⁰ Israelpa mirayninkunata kamachiy achkikunapaq fino aceiteta apamunankupaq, chayqa kutasqa aceitunasmanta preparasqam kanqa, chaynapim mecheroqa mana tukuyta ratanqa.

²¹ Aaronwan churinkunam mecherokunata allichanqaku ñoqapa ñawpaqniypi tukuy tuta ratananpaq. Chaytaqa ruwanqa pacto ruwasqay Arcata harkaq velopa ñawpaqninpim. Kaymi kanqa wiñaypaq decretoy llapallan Israel castakunapaq chaynataq mirayninkunapaqpas.