Éxodo 17 - CHUYA QELLQA La Biblia en Quechua de Ayacucho 2012

Qaqamanta yaku lloqsimusqanmanta

¹ Israelpa mirayninkunam Tayta Diospa kamachisqanman hina, Sin sutiyuq chunniqpi samasqankumanta pasarqaku, hinaspam Refidim lawman chayaruspanku carpankuta chaypi sayachirqaku, ichaqa manam chaypipas yaku karqachu runakuna tomanankupaq.

² Chaymi runakunañataq Moiseswan atipanakuspa nirqaku: ¡Yakuta tomanaykupaq qowayku! nispanku. Hinaptinmi paykunata Moisés nirqa: ¿Imanasqataq ñoqata mañapayawankichik? ¿Imanasqataq Tayta Diosta tentaspa pruebankichik? nispa.

³ Ichaqa runakunam yakumanta kaspanku Moisespa contranpi kaynata nirqaku: ¿Imapaqtaq Egipto nacionmanta hur-qomuwarqankiku, churiykutawan ani-malniykutapas yakumanta wañuchiwanaykikupaq? nispanku.

⁴ Chaymi Tayta Diosta qayakuspan Moisés nirqa: ¿Imatataq kay runakunawan ruwasaq? Kunanmanta asllatawanqa rumiwanchá tukuruwanqaku, nispa.

⁵ Hinaptinmi Moisesta Tayta Dios nirqa: Runakunapa ñawpaqninman riy, pusay-taq Israelpa ancianonkunata. Nilo mayuta waqtasqayki tawnaykitapas apaspa utqayman riy.

⁶ Horeb orqopim rumi hawanpi ñawpaqnikipi sayasaq, chaymi chay rumita waqtaptiki llapa runakuna tomanankupaq yaku lloqsimunqa, nispa. Moisesmi Israel casta ancianokuna qawachkaptin chaynata ruwarqa.

⁷ Chay sitiotam “Meriba” nispa suticharqaku, Israelpa mirayninkuna chaypi atipanakusqankurayku. Suticharqakutaqmi “Masah” nispapas, Tayta Diosta chaypi tentasqankurayku. Paykunam nirqaku: “¿Ñoqanchikwanchu Tayta Dios kachkan icha manachu?” nispanku.

Amalec castakunawan Israelpa mirayninkuna peleasqankumanta

⁸ Amalec castakunam Refidim lawman rirqaku Israelpa mirayninkunawan peleanankupaq.

⁹ Chaymi Josueyta Moisés nirqa: Ñoqanchikmanta qarikunata akllay hinaspa Amalec runakunawan peleanaykipaq lloqsiy. Paqarinmi Diospa tawnanta hapiykuspay orqopa puntanpi kasaq, nispa.

¹⁰ Hinaptinmi Moisespa kamachisqanman hina Josué ruwaspa Amalec castakunawan peleananpaq lloqsirqa. Moisesñataqmi Aaronwan hinaspa Hurwan orqopa puntanman qespirqaku.

¹¹ Chaymi Moisesqa makinta altoman hoqariq hinaptinmi Israel runakuna venceqku, makinta uraykachiptinñataqmi Amalec castakuna venceqku.

¹² Moisespa makinkuna utirusqanraykum huk rumita churarurqaku, hinaptinmi Moisés chaypi tiyaykuptin, Aaronwan Hurñataq kay-lawninmanta waklawninmanta intipa seqaykunankama makinkunata takyachirqaku.

¹³ Hinaptinmi guerrapi peleaspa Amalec castakunata Josué vencerurqa.

¹⁴ Chaymi Moisesta Tayta Dios nirqa: Ama qonqarunaykichikpaq huk libropi kayta qellqay hinaspa Josueyta niy: “Amalec castakunatam kay pachamanta chinkachisaqpuni”, nispa.

¹⁵ Hinaptinmi huk altarta Moisés perqarqa, hinaspam suticharqa “Tayta Diosmi banderay”, nispa.

¹⁶ Chaymi nirqa: Tayta Diospa banderanta hapiy, Tayta Diospa contranpi Amalec hatarisqanraykum amalecwan Tayta Dios wiñaypaq guerrapi kanqa, nispa.