Éxodo 16 - CHUYA QELLQA La Biblia en Quechua de Ayacucho 2012

Cielomanta hamuq mikuymanta

¹ Israelpa mirayninkunam Elim-manta lloqsispanku Sin sutiyuq chunniqman chayarurqaku, chay chunniqqa kachkan Elimmanta Sinaiman rinapim. Chaymanqa chayarqaku, Egipto nacionmanta huk killa lloqsisqanku hawañam, iskay kaq killapa chunka pichqayuq punchawninpi.

² Chay chunniqpim Israelpa mirayninkuna Moisespa chaynataq Aaronpa contranpi rimarqaku.

³ Hinaspam nirqaku: Allinchá kanman karqa Egipto na-cionpi Tayta Dios wañurachiwaptin-kuqa, chay nacionpiqa aychayuq man-kakunapa ladonpim tiyarqaniku, tantatapas saksanaykukamam mikuq kaniku; kunanñataqmi kay chunniqman pusaramuwankiku yarqaymanta wañuchiwanaykikupaq, nispanku.

⁴ Chaymi Moisesta Tayta Dios nirqa: Ñoqam parata hina cielomanta mikuyta chayachimusaq. Runakunañataqmi lloqsispanku, huk punchaw mikunankupaq kamaqllata sapa punchaw huñunqaku, chaynapim yachasaq yachachikuyniyman hina kawsasqankuta otaq mana chayna kawsasqankutapas.

⁵ Soqta kaq punchawpim ichaqa, iskay punchawpaq hoqarinqaku, manam sapa punchawpaq huñusqankuta hinallañachu, nispa.

⁶ Chaymi Israelpa mirayninkunata Moiseswan Aarón nirqaku: Tardemanmi yachankichik Egipto llaqtamanta Tayta Dios hurqomususqaykichikta.

⁷ Paqarin tutapaytañataqmi Tayta Diospa atiyninta qawankichik, paymi contranpi rimasqaykichikta uyarirun. Ñoqaykuqa, ¿pitaq kaniku contraykupi rimanaykichikpaqqa? nispanku.

⁸ Moisesqa nirqataqmi: Tardemanmi Tayta Dios aychata qosunkichik mikunaykichikpaq, paqarin tutapaytañataqmi saksanaykichikkama tantata qosunkichik. Tayta Diosmi uyarirun paypa contranpi rimasqaykichikta. Ñoqaykuqa, ¿pitaq kaniku? Rimasqaykichikqa manam ñoqaykupa contraykupichu, aswanqa Tayta Diospa contranpim, nispa.

⁹ Hinaptinmi Aaronta Moisés nirqa: Israelpa mirayninkunata huñunaspa niy: “Tayta Diospa qayllanman asuykamuychik, paymi contranpi rimasqaykichikta uyarirun”, nispa.

¹⁰ Israelpa mirayninkunata Aarón rima-payachkaptinmi chunniq lawta qawarirqaku, hinaptinmi Tayta Diospa kanchaynin puyupi kachkasqa.

¹¹ Chaymi Moisesta Tayta Dios rimapayarqa:

¹² Ñoqam uyarirqani Israelpa mirayninkunapa rimasqanta, paykunata niy: “Chisinkuytam aychata mikunkichik, tutapaytañataqmi tantawan saksankichik, chaynapim yachankichik ñoqaqa Tayta Dios kasqayta”, nispa.

¹³ Tardeykuytam codornizkuna hamu-ruspa campamentoman huntaykamurqa, paqarinnintin tutapaytañataqmi campa-mentopa muyuriqninman sullaramur-qa.

¹⁴ Chay sulla waspiruptinmi allpapa hawanpi lasta hina qeparurqa.

¹⁵ Chayta rikuruspankum Israelpa mirayninkuna, mana ima kasqanta yachaspanku ninakurqaku: “¿Imataq kayqa?” nispanku. Chaymi Moisés nirqa: Kayqa Tayta Diospa mikuy qosusqaykichikmi, nispa

¹⁶ Kaymi Tayta Diospa kamachikuynin: Sapakama mikunaykichikpaq kamaqta huñuychik. Carpapi haykam kasqaykichikman hinam, sapa punchaw iskay kilotakama sapakamapaq hoqarinkichik, nispa.

¹⁷ Chaynatam Israelpa mirayninkuna ruwarqaku, wakinmi huñurqa achkata wakinñataqmi asllata.

¹⁸ Huñuruspa tupunpi rakinakuptinkum, achka huñuqpapas mana puchurqachu, nitaq aslla huñuqpaqpas pisirqachu. Sapakamam mikunankupaq kamaqllata huñurqaku.

¹⁹ Chaymi Moisés nirqa: Paqarinnintinkamaqa amam mayqannikichikpas puchuchinkichikchu, nispa.

²⁰ Aswanqa wakiqninkum Moisespa kamachisqanta mana kasukuspanku paqarinnintinkama puchururqaku, chay puchusqankutam urururqa llumpayta asnarinankama, chaynapim Moisesñataq paykunapa contranpi piñakururqa.

²¹ Sapa tutapaytam mikunankupaq kamaqta sapakama huñuqku, puchuqñataqmi intipa rupayninwan chulluruq.

²² Soqta kaq punchawpim ichaqa huk chaynatawan huñuqku. Sapakamapaqmi tawa kilota huñuqku, hinaptinmi llaqtapi kamachikuqkuna Moisesman willanankupaq hamurqaku.

²³ Chaymi paykunata Moisés nirqa: Kaymi Tayta Diospa nisqan: “Paqarinmi ñoqa Tayta Diospaq sapaqchasqa samana punchaw. Yanunayki-chiktapas kunan yanuychik, timpuchinaykichiktapas kunan timpuchiy-chik, puchuqtañataq paqarinpaq waqay-chaychik”, nispa.

²⁴ Moisespa kamachisqanman hinam paqarinnintinkama waqaycharqaku, manam urururqachu nitaqmi asnarirqachu.

²⁵ Chaymi Moisés nirqa: Tayta Diospaq samana punchaw kasqanrayku kunan mikuychik, campopiqa manam imatapas kunanqa tarinkichikchu.

²⁶ Soqtantin punchawmi huñunkichik. Qanchis kaq punchawqa samana punchawmi, chaymi imapas mana kanqachu.

²⁷ Wakin runakunam qanchis kaq punchawpi huñuq lloqsirqaku, ichaqa manam imatapas tarirqakuchu.

²⁸ Chaymi Moisesta Tayta Dios nirqa: ¿Haykapikamataq kamachikuyniykunatapas chaynataq yachachikuyniykunatapas mana kasukunkichikchu?

²⁹ Amam qon-qankichikchu, ñoqam qoykichik samana punchawta, chayraykum soqta kaq pun-chawpiqa mikuytapas iskay punchawpaq qoykichik. Qanchis kaq punchawpiqa, sapakamam hinallapi kankichik, amam pipas maymi kasqanmanta lloqsinqachu, nispa.

³⁰ Chaymi runakuna qanchis kaq punchawpi samarqaku.

³¹ Chay hoqarisqankutam Israel runakuna suticharqaku “maná” nispa, chayqa karqa yuraqmi, culantropa muhun hina, gustonñataqmi karqa mielniyuq galleta hina.

³² Chaymantam Moisés nirqa: Kaymi Tayta Diospa kamachikuynin, chay mikuymanta iskay kilota miraynikichikpaq waqaychaychik. Chaynapim paykuna qawanqaku Egipto nacionmanta hurqomuspa mikuy qosqayta, nispa.

³³ Hinaptinmi Aaronta Moisés nirqa: Huk mankata hapispa chay mikuymanta iskay kilota Tayta Diospa ñawpaqninpi churamuy, chaynapi miraynikichikkunapaq waqaychasqa kananpaq, nispa.

³⁴ Chaymi Moisesta Tayta Diospa kamachisqanman hina, Aaronqa Diospa Arcanpa ñawpaqninpi churarqa.

³⁵ Chaynatam Israelpa mirayninkuna chay maná sutiyuq mikuyta tawa chunka watantin mikurqaku, mikurqakuqa runakunapa yachanan allpaman chayanankukamam, otaq Canaán allpaman yaykunankukamam.

³⁶ Iskay kilo tupum hebreo simipi gomer.