Éxodo 12 - CHUYA QELLQA La Biblia en Quechua de Ayacucho 2012

Pascua fiestamanta

¹ Moisestawan Aarontam Egipto nacionpi Tayta Dios nirqa:

² Kay killam qamkunapaq allinnin kanqa, chay killaqa watapa qallariyninmi kanqa.

³ Chaynaqa, Israelpa lliw mirayninkunata kaynata nimuychik: Kay killapa chunka kaq punchawninpim, sapa ayllu haykam kasqankuman hina, huk malta carnerota otaq malta chivatota hapinqa. Sapa ayllupaqmi huk animal kanqa.

⁴ Sichum huk ayllu aslla kaspa chay carnerota mikuspa mana tukunanpaq hina kaspaqa, vecinonta qayaspam haykam kasqankuman hina, huk carnerota hapinqaku, hinaspam sapakamapa mikusqanman hina rakinakunqaku.

⁵ Chay animalqa carnero kaspapas otaq chivato kaspapas, huk watayuq orqo sano animalmi kanqa.

⁶ Chay animaltaqa kay killapa chunka tawayuq punchawninkamam waqaychankichik, chay punchawmi inti seqaykuyta Israel runakuna sapakama nakanqaku.

⁷ Hinaspam yawarninta chaskispa, pascua carnerota mikunanku wasipa pilarninkunaman llusinqaku.

⁸ Chay tutam, chay aychata ninapi kankasqata, mana levadurayuq tantatawan qatqe qorayuqkunata mikunqaku.

⁹ Chawa aychatawan yakupi yanusqataqa amam mikunkichikchu. Chay animaltaqa, umantapas, piernankunatapas hinaspa ukunninkunatapas lliwtam ninapi kankasqata mikunkichik.

¹⁰ Paqarinnintinkamaqa amam imallantapas puchunkichikchu, puchuruptinqa kañarunkichikmi.

¹¹ Kaynam mikunkichikqa: Weqawnikichik allin watasqa, usutaykichikpas allin watasqa, hinaspa tawnaykichikta aptarisqa; chaynam utqayllamanña mikunkichik. Chayqa Tayta Diospa Pascuanmi.

¹² Chay tutam Egipto nacionninta pasasaq, hinaspam runapa piwi churinkunata, animalkunapa piwi wawankunata wañuchisaq; Egiptopa diosninkunatam juzgasaq. Ñoqa Tayta Diosmi chaynata nini.

¹³ Chay yawarmi señal kanqa maymi yachasqaykichik wasipi, chay yawarta qawaspaymi hawallanta pasarusaq, chaynapim Egipto runakunata wañuchiptiy, qamkunamantaqa mana chullallapas wañunqachu.

¹⁴ Chay punchawqa yuyarinaykichik punchawmi kanqa, chaynapim ñoqa Tayta Diosta yupaychawanaykichikpaq hatun fiestata ruwankichik. Chaymi miraynikichikkunapaq huk decreto wiña-wiñaypaq kanqa.

¹⁵ Qanchis punchawmi mana levadurayuq tantata mikunkichik. Qallariynin punchawpim levadurata wasikichikmanta wischunkichik, chay punchawkunapi pipas levadurayuqta mikuqqa, Israelmanta wischusqam kanqa.

¹⁶ Qallariy punchawwan qanchis kaq punchawmi ñoqapaq hatun huñunakuy kanqa, chay punchawkunapiqa amam llamkankichikchu. Ruwaspaqa ruwankichik mikunallaykichiktam.

¹⁷ Mana levadurayuq tanta fiestatam ruwankichik, chay punchawpi Egipto nacionmanta hurqosqayta yuyarinaykichikpaq. Chay punchawtam huk decretota hina wiñaypaq yuyarispanku miraynikichikkunapas ruwanqaku.

¹⁸ Qallariy killapa chunka tawayuq pun-chawpa tardenmanta qallarispam, iskay chunka hukniyuq punchawpa tardenkama mana levadurayuq tantata mikunkichik.

¹⁹ Qanchis punchawmi wasikichikpi levadura mana kanqachu, pipas levadurayuqta mikuqqa, huklaw llaqtayuq kaspapas otaq castamasikichik kaspapas Israelmanta wischusqam kanqa.

²⁰ Levadurayuqtaqa amam imatapas mikunkichikchu, maypiña yachaspapas mana levadurayuq tantatam mikunkichik, nispa.

²¹ Israelpi llapallan ancianokunata qayachimuspam Moisés nirqa: Carnerota otaq chivatota aylluykichikpaq hapimuychik hinaspa wañuchiychik Pascua fiestata ruwanaykichikpaq.

²² Hapiychiktaq hisopo sachapa kallmantapas hinaspa tazonpi yawarman challpuspa punkupa pilarninman llusiy-chik. Achikyanankamam wasikichik-manta ama lloqsinkichikchu.

²³ Tayta Diosmi Egipto runakunapa piwi churinta wañuchistin pasanqa, punkupa chakanpi hinaspa pilarninkunapi yawarta qawaykuspanmi ichaqa karullanta pasarunqa, chaynapim Tayta Dios chay wañuchikuqta wasikichikman mana yaykuchinqachu.

²⁴ Kay nisqaykunatam huk decretota hina churikichikkunapiwan wiñaypaq kasukunkichik.

²⁵ Tayta Diospa qosusqaykichik allpaman yaykuspaqa, kay Pascua fiestatam ruwankichik.

²⁶ Sichum churikichik tapusunkichik: “¿Ima ninantaq kay fiesta ruwasqaykichikqa?” nispa,

²⁷ hinaptinqa kaynatam ninkichik: “Tayta Diospaq Pascuapi wañuchina animalmi kayqa. Paymi Egipto nacionpi Israelpa mirayninkunapa wasinpa hawallanta pasaspa aylluykuta libraykurqa, Egipto runakunatam ichaqa wañurachirqa”, nispa. Chaykunata Moisés rimayta tukurup-tinmi, Israelpa mirayninkuna qonqora-kuykuspa Tayta Diosta yupaycharqaku.

²⁸ Chaymi Israelpa mirayninkuna ru-warqaku Moisesmanwan Aaronman Tayta Diospa kamachisqanman hina.

Piwikunapa wañusqanmanta

²⁹ Chawpi tutatam Egipto nacionpi llapallan piwikunata Tayta Dios wañu-rachirqa, palaciopi tiyaq Faraonpa piwinmanta qallarispa carcelpi kaq presopa piwinkama, llapa animalkunapa piwintapas wañurachirqam.

³⁰ Chay tutam Faraonwan serviqninkuna chaynataq Egipto runakunapas hatarispanku qapariywan waqarqaku; manam huk wasipas wañuymantaqa escaparqachu.

³¹ Chay tutam Moisestawan Aaronta qayachispan Faraón nirqa: Qamkunapas chaynataq Israelpa mirayninkunapas runaykunapa chawpinmanta lloqsiychik hinaspa nis-qaykichikpi hina Tayta Diosta yupay-chamuychik.

³² Ovejaykichiktapas, vacaykichiktapas qatiychik. Hinaspa ñoqapaqpas Diosta mañakamuychik, nispa.

³³ Egipto runakunam hikutarqaku Israelpa mirayninkunata Egiptomanta lloqsinankupaq, llapallanku wañuruyta piensasqankurayku.

³⁴ Chaymi Israelpa mirayninkuna, tanta masankupas manaraq poqochkaptin, artesata pachankuwan wankuykuspa hombronkupi aparqaku.

³⁵ Moisespa kamachisqanman hinam Israelpa mirayninkunaqa Egipto runakunamanta qorimanta qollqemanta alhajakunata hinaspa pachakunata mañakururqaku.

³⁶ Tayta Diosmi Egipto runakunawan favorecechirqa, chaymi Israelpa mirayninkunapa tukuy ima mañakusqankuta qorqaku, chaynatam paykuna Egipto runakunapa tukuy imanta qechururqaku.

Israelpa mirayninkuna lloqsisqanmanta

³⁷ Chaymi Israelpa mirayninkuna Ramsés llaqtamanta Sucot lawman pasakurqaku. Chakiwan riq qarikunallam yaqa soqta pachak waranqa karqaku, wawakunawan warmikunaqa manam yupasqachu karqaku.

³⁸ Paykunawantaqmi lloqsirqa nana-nanaq tukuy rikchaq runakunapas chaynataq achka-achka ovejakunawan vacakunapas.

³⁹ Egiptomanta mana levadurayuq masa apamusqankumantam tortillakunata ruwarqaku, Egiptomanta qarqomuptinkum mana tiemponku karqachu qoqawllapas ruwakunankupaq.

⁴⁰ Israelpa mirayninkunaqa tawa pachak kimsa chunka watam Egipto nacionpi yacharqaku.

⁴¹ Tawa pachak kimsa chunka wata pasaruptinmi, Tayta Diospa llapallan tropankuna Egipto nacionmanta lloqsirqaku.

⁴² Chay tutam Egipto nacionmanta hurqomuspan paykunata Tayta Dios waqaycharqa. Chayraykum Israelpa llapallan mirayninkuna chay tutata yuyarispa, pascua ruwasqanku tuta rikchananku.

Pascua fiestapaq kamachikuykunamanta

⁴³ Moisestawan Aarontam Tayta Dios nirqa: Kaymi Pascuamanta kamachikuy: Pascua fiestapi mikunaykichik animaltaqa amam huklaw llaqtayuq runaqa mikunqachu.

⁴⁴ Qollqewan rantisqa criadoykichikkunam ichaqa mikunqaku, qari kayninku señalasqa kasqankurayku.

⁴⁵ Huklaw llaqtayuqqa, samapakuqpas otaq llamkapakuqpas amam mikunqachu.

⁴⁶ Kay aychataqa, amam wasikichikmanta hawamanqa hurqonkichikchu, nitaqmi tulluntapas pakinkichikchu, aswanqa wasikichik ukullapim mikunkichik.

⁴⁷ Llapallan Israel runakunam chaynata ruwanqa.

⁴⁸ Sichum huklaw llaqtayuq runa qamkunawan yachasqanrayku Tayta Diospa Pascuan ruwayta munaspaqa, ayllunpi kaq qarikunam qari kayninkuta señalachikunqaku, hinaspañam Pascua fiestata ruwanqa, chaynata ruwaspaqa castamasikichikñam kanqa. Pipas mana qari kayninpi señalasqa kaspaqa amam mikunqachu.

⁴⁹ Hina chay yachachikuyllam kanqa qamkunapaqpas chaynataq qamkunawan yachaq huklaw llaqtayuq runakunapaqpas, nispa.

⁵⁰ Moisesmanwan Aaronman Tayta Diospa kamachisqanman hinam Israelpa mirayninkuna ruwarqaku.

⁵¹ Chay punchaw-pipunim Israelpa mirayninkunata Egipto nacionmanta tropa-tropata Tayta Dios hurqorqa.