Éxodo 10 - CHUYA QELLQA La Biblia en Quechua de Ayacucho 2012

Aqaruwaywan castigasqanmanta

¹ Tayta Diosmi Moisesta nirqa: Faraonpa qayllanman yaykuy, paypa sonqontawan serviqninkunapa sonqontam rumiyarachini, chaynataqa ruwaruni paykunaman señalniykunata qawachinaypaqmi.

² Chaynapi Egipto nacionpi tukuy imam ruwasqaymanta churikikunaman hinaspa willkaykikunaman willanaykipaq. Chaynapim ñoqa Tayta Dios kasqayta yachankichik, nispa.

³ Chaymi Moiseswan Aarón, Faraonpa qayllanman yaykuspa nirqaku: Hebreo runakunapa Diosninmi kaynata nin: “¿Haykapikamataq ñoqapa qayllaypi mana uchuychakunkichu? Yupaychamuwanankupaq llaqtayta kachariy.

⁴ Llaqtayta mana kachariyta munaptikiqa, paqarinmi aqaruwaykunata lliw nacionnikiman kacharimusaq.

⁵ Hinaptinmi allpata tapaykunqa pampapas mana rikukuy atinankama. Chaymi runtu paramanta puchuqta tukunqa, campopi iklliq sachakunatapas lliwtam tukunqa.

⁶ Chay aqaruwaykunam palacioykiman, serviqnikikunapa wasinman chaynataq Egipto nacionpi lliw runakunapa wasinmanpas huntarunqa. Chaynataqa Egipto nación kasqanmantapas, taytaykichikkunawan ñawpaq taytaykichikkunapas manam haykapipas rikurqakuchu”, nispa. Chaynata niruspanmi Moisesqa Fa-raonpa qayllanmanta lloqsikurqa.

⁷ Chaymi Faraonta serviqninkuna nirqaku: ¿Haykapikamataq kay runa sasachakuyllata qowasunchik? Israelpa mirayninkunata kachariy, chaynapi Tayta Diosta yupaychamunankupaq. ¿Manachu rikunki paykunarayku lliw Egipto nacionqa purmachisqa kasqanta? nispanku.

⁸ Chaymi Moisestawan Aaronta qayachispan Faraón nirqa: Rispaykichik Señornikichik Diosta yupaychamuychik. Ichaqa ¿pikunataq rinkichik? nispa.

⁹ Hinaptinmi Moisés nirqa: Tayta Diosta yupaychamunayku fiesta kasqanraykum, warmaykupiwan, yuyaqniykupiwan, qari churiykupiwan hinaspa warmi churiykupiwan risaqku. Ovejaykutawan vacaykutapas qatisaqkum, nispa.

¹⁰ Chaymi Faraón nirqa: Tayta Diosña qamkunawan kaptinpas warmaykichikkunatawanqa manam kacharikichikmanchu. Qamkunaqa mana allintam tanteachkankichik.

¹¹ Manam chaynaqa kanmanchu, qarikunalla rispa Tayta Diosta yupaychamuychik. Chaynatam mañakurqankichik, nispa. Chaynata niruspanmi Faraonqa paykunata ñawpaqninmanta qarqorachirqa.

¹² Chaymi Moisesta Tayta Dios nirqa: Egipto allpapa hawanman makikita haywariy, aqaruwaykuna hamuspan runtu parapa puchusqan lliw qorakunata tukunanpaq, nispa.

¹³ Hinaptinmi Egipto allpapa hawanman tawnanta Moisés haywarirqa, chaymi Tayta Diosñataq tutantin punchawnintin intipa qespimunan lawmanta Egipto nacionman wayrata pukuchimurqa. Chaymi paqarinnintin punchawpaq intipa qespimunan lawmanta aqaruwaykunata wayra aparamurqa.

¹⁴ Chay aqaruwaykunam Egipto nacionpa hawanman hamuruspa puyu hinaña tiyarurqa; chayna aqaruwayqa manam haykapipas karqachu nitaqmi kanqachu.

¹⁵ Pampapas manaña rikukunankamam lliw allpata taparurqa, hinaspam runtu paramanta puchuq plantakunata, kawsaykunata, sachakunata hinaspa frutakunatapas tukururqa. Egipto nacionpiqa verde sachakunawan qorakunapas manam puchurqachu.

¹⁶ Hinaptinmi utqayllamanña Moisestawan Aaronta qayachimuspan Faraón nirqa: Tayta Diospa chaynataq qamkunapa contraykichikpim huchallikuruni.

¹⁷ Chaynaqa, kunanllañayá huchayta pampachaykuwaspa Tayta Diosta mañakuychik, kay plagallatañapas ñoqamanta wischunanpaq, chaynapi mana wañurunaykupaq, nispa.

¹⁸ Chaymi Faraonpa ñawpaqninmanta lloqsiruspan Tayta Diosta Moisés mañakurqa.

¹⁹ Hinaptinmi Tayta Diosqa intipa seqaykunan lawmanta sinchi wayrata pukurachimuspan aqaruwayta Puka lamar qochaman wischuykurqa, manam chulla aqaruwaypas Egipto nacionpiqa puchurqachu.

²⁰ Ichaqa Tayta Diosmi Faraonpa sonqonta rumiyarachirqa, chaymi Israelpa mirayninkunataqa ma-na kacharirqachu.

Sinchi tutayaywan castigasqanmanta

²¹ Moisestam Tayta Dios nirqa: Makikita cieloman hoqariy llapa runa llapchaykachanankukama Egipto nacionpi sinchi tutayay kananpaq, nispa.

²² Chaymi Moisés makinta cieloman hoqarirqa, hinaptinmi kimsa punchaw, yanay-yanay tutayay Egipto nacionta pampaykurqa.

²³ Kimsa punchawpunim mana pipas rikunakurqakuchu, nitaqmi maymi kasqanmantapas lloqsirqakuchu. Israelpa mirayninkunapa yachasqankupim ichaqa achkiy karqa.

²⁴ Chaymi Moisesta qayachispan Faraón nirqa: Rispaykichik Tayta Diosta yupaychamuychik, pusaychiktaqyá warmaykichiktapas. Ovejaykichikwan vacayki-chikmi ichaqa hinapi qepanqa, nispa.

²⁵ Hinaptinmi Moisés nirqa: Qanmi animalkunataqa qowankiku Señorniyku Tayta Diospaq sacrificaspa ofrecemunaykupaq.

²⁶ Animalniykupas ñoqaykuwanmi rinqa, manam chullallapas qepanqachu, Tayta Diosta yupaychanaykupaqqa chay animal-kunamantam hapisaqku. Manaraqmi yachanikuchu wakman chayanaykukama imawanmi Tayta Diosta yupaychanaykutapas, nispa.

²⁷ Ichaqa Tayta Diosmi Faraonpa sonqonta rumiyarachirqa, chayraykum mana kachariyta munarqachu.

²⁸ Chaymi Moisesta Faraón nirqa: Qayllaymanta pasaway, ama masta rikurimuwaychu, yapatawan hamuruptikiqa wañurachisqaykim, nispa.

²⁹ Hinaptinmi Moisés nirqa: Allintapunim nirunki: Manañam yapatawanqa qayllaykiman hamusaqñachu, nispa.