Ester 5 - CHUYA QELLQA La Biblia en Quechua de Ayacucho 2012Reypa qayllanman Ester yaykusqanmanta 1 Kimsa punchaw pasaruptinmi reina pachawan Ester pachakurqa, hinaspam reypa palacionpa uku patioman yaykuspa chayarurqa reypa tiyananpa chimpa corredorninman. Reyñataqmi trononpi tiyachkarqa. 2 Reina Esterta patiopi sayachkaqta rikuykuspanmi, makinpi qorimanta varanta haywariykuspan favoreceykurqa. Esterñataqmi asuykuspan varanpa puntanta llapchaykurqa. 3 Chaymi reyñataq tapurqa: Reina Ester, ¿imataq pasasunki? ¿Imataq mañakuyniki? Mañawaptikiqa munaychakusqay naciontapas partentam qoykusqayki, nispa. 4 Hinaptinmi reina Ester nirqa: Reynilláy, allinpaq rikchakapusuptikiqa kunanyá convido ruwasqayman Amanwan kuska hamuychik, nispa. 5 Reyñataqmi kamachikurqa: Esterpa mañakusqanman hina, Amanta qayamuychik, nispa. Chaynapim reyqa Amanwan kuska Esterpa convido ruwachisqanman rirqaku. 6 Convidota mikuspa vinota upyachkaptinkum Esterta rey nirqa: ¿Imataq mañakuyniki? Ima mañawasqaykitapas qosqaykim. Mañawaptikiqa munaychakusqay naciontapas partentam qoykusqayki, nispa. 7 Chaymi Ester nirqa: Ñoqapa mañakuyniyqa kayllam: 8 Reynilláy, kuyapayawaspaykiqa hinas-pa kay mañakusqayta allinpaq hapispaykiqa, paqarinyá Amanwan kuska huktawan convido ruwachisqayman hamuychik, ima mañakuyniytapas paqarinñam nisqayki, nispa. Mardoqueota Amán warkuchiy munasqanmanta 9 Chay punchawmi Amán ancha kusisqallaña lloqsirqa; ichaqa Mardoqueota reypa palacionpa punkunpi mana sayarisqanta nitaq kuyurisqanta rikuruspanmi sinchita piñakururqa. 10 Chaywanpas aguantakuykuspanmi Amanqa wasinman chayarurqa, hinaspam amistadninkunata, warmin Zerestapas qayachirqa. 11 Hinaspam paykunapa qayllanpi alabakurqa apu kayninmanta, achkallaña churinkunamanta, tukuy imawan rey hatunchasqanmanta chaynataq kamachikuqkunapa, serviqninkunapa hawanman rey churasqanmantapas. 12 Amanqa nirqataqmi: Reina Esterqa manam pitapas reytawan kuskataqa convidanchu, aswanqa ñoqallatam; paqarinpaqpas reywan kuskam convidasqa kachkani. 13 Chaywanpas judío Mardoqueota reypa palacionpa punkunpi tiyachkaqta sapa punchaw rikuptiyqa, manam imapaqpas serviwanchu, nispa. 14 Chaymi warmin Zereswan llapa amistadninkuna kaynata nirqaku: Iskay chunka iskayniyuq metro kaspita sayarachiy hinaspa paqarinlla reyta niy Mardoqueo chaypi warkusqa kananpaq, chaynapim qamqa kusisqaña convidoman yaykunki, nispa. Chay nisqankum Amanpaq allinpaq rikchakarapurqa, chaymi payqa huk warkunata sayachirqa. |
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012
Peruvian Bible Society