Ester 3 - CHUYA QELLQA La Biblia en Quechua de Ayacucho 2012

Judiokunapa contranpi Amán hatarisqanmanta

¹ Chaykuna pasaruptinmi rey Asuero, Agagpa miraynin Hamedatapa churin Amanta hatunchaspan llapallan kamachikuqkunapa kamachiqnin kananpaq churarurqa.

² Chaymi reypa serviqninkunawan palacio punkupi kaqkuna, Amanpa ñawpaqninpi kumuykuqku; chaynataqa ruwarqaku rey kamachikusqanraykum. Mardoqueom ichaqa mana qonqorakuqchu nitaq kumuykuqchu.

³ Hinaptinmi reypa palacion punkunpi kaq serviqninkuna Mardoqueota nirqaku: ¿Imanasqataq reypa kamachikuyninta mana kasukunkichu? nispanku.

⁴ Sapa punchaw chaynata tapupayaptinkupas payqa manam uyariqpas tukurqachu. Chayraykum Amanman willaykurqaku, Mardoqueopa kasukusqanta otaq mana kasukusqantapas qawanankupaq, paykunaman Mardoqueo Judío kasqanta willakusqanrayku.

⁵ Chaymi Amán sinchita piñakururqa, paypa ñawpaqninpi Mardoqueo mana qonqorakusqanta nitaq kumuykusqanta qawaykuspan.

⁶ Ichaqa Mardoqueopa judío kasqanta yacharuspanmi, Amanqa mana payllatañachu wañuchiyta munarqa, aswanqa rey Asueropa munaychakusqanpi yachaq llapallan judío runakunatawanñam.

Judío runakuna wañuchisqa kanankupaq decretomanta

⁷ Rey Asuero chunka iskayniyuq wataña munaychakuchkaptinmi, Nisán sutiyuq punta kaq killapi, Amanpa ñawpaqninpi suerteta qawarqaku, ima killapim hinaspa ima punchawpim chay tanteasqanta ruwayman churananta yachananpaq. Chaymi Adarwan sutichasqa chunka iskayniyuq kaq killapi ruwananpaq lloqsirurqa.

⁸ Hinaptinmi rey Asuerota Amán nirqa: Munaychakusqayki llaqtakunapim huk casta runakuna cheqesqa hinaspa rakinasqa yachachkanku, leyninkupas sapaqmi, manam wakin llaqtakunapa hinachu, kamachikuynikikunatapas manam kasukunkuchu. Manam allinchu reypa munaychakuyninpi kayna runakunapa kawsayninqa.

⁹ Allinpaq rikchakapusuptikiqa paykuna chinkachisqa kanankupaqyá huk kamachikuyta decretay, ñoqañataqmi kimsa pachak kimsa chunka kilo qollqeta, qori-qollqeki waqaychaqkunaman qosaq, munaychakuynikipa qori-qollqenman yapasqa kananpaq, nispa.

¹⁰ Chaymi reyqa anillonta hurqoykuspan Hamedatapa churin Amanman qoykurqa, Amanqa karqa judío runakunapa enemigonmi,

¹¹ hinaspam kaynata nirqa: Munachiwasqayki qollqekiqa qampaq kachun, chay runakunawanqa tanteasqaykiman hinayá ruway, nispa.

¹² Hinaptinmi chay watapi punta kaq killapa chunka kimsayuq punchawninpi, reypa secretarionkuna Amanpa kamachikusqanman hina regionkunapi hinaspa provinciakunapi gobernadorkunaman, chaynallataq nacionkunapi kamachikuqkunamanpas, qellqasqankuman chaynataq rimayninkuman hina qellqarqaku. Rey Asueropa sutinpi qellqaspankum anillonwan sellarqaku.

¹³ Hinaspam reypa munaychakusqan provinciakunaman carta apaqkunawan apachirqaku. Chay decretopim rey kamachikurqa llapa judiokunata, joventapas yuyaqtapas, wawatapas warmitapas lliwta huk punchawllapi, Adarwan sutichasqa killapa chunka kimsayuq punchawninpi wañuchinankupaq hinaspa llapa tukuy imankutapas hapikuykunankupaq.

¹⁴ Sapa provinciakunamanmi kay qellqasqa leypa copian apachisqa karqa, chay punchawpaq llapallanku listollaña kanankupaq.

¹⁵ Reypa kamachikusqanman hinam chay cartakuna utqayman apasqa karqa, Susa llaqtapipas willachisqa kaptinmi llapa runakuna hatun chaqwapi tarikurqaku. Amanñataqmi reywan kuska tiyaykuspa upyakurqaku.