Esdras 6 - CHUYA QELLQA La Biblia en Quechua de Ayacucho 2012

¹ Hinaptinmi rey Darío kamachikurqa Babilonia nacionpi reykunapa tukuy valorniyuq kaqkuna waqaychana wasipi maskanankupaq.

² Chaymi Media law Ecbatana llaqtapi huk librota tarirurqaku, chaypim kayna niq qellqasqa kasqa:

³ Rey Ciropa munaychakuyta qallarisqan watapim kikin rey Ciro kaynata kamachikurqa: Tayta Diospa Jerusalenpi templonmantam kaynata nini: Cimientonkunata churaspayá perqankunapas musoqmanta hatarichisqa kachun, chaypi Tayta Diospaq lliw kañana sacrificiokunata ofrecenankupaq. Sayayninmi kanqa iskay chunka qanchisniyuq metro, anchonñataqmi iskay chunka qanchisniyuq metro.

⁴ Kimsa seqetam hatun rumikunata churanqaku, chaypa hawanmanñataqmi vigakunata huk seqeta churanqaku, chay ruwaypi gastokunataqa reypa qori-qollqenmantam paganqaku.

⁵ Rey Nabucodonosormi qorimanta qollqemanta serviciokunata Jerusalenpi Diospa templonmanta hurqorurqa hinaspam Babilonia llaqtaman aparurqa. Chaykunapas maymi kasqanmanmi Jerusalén llaqtapi Tayta Diospa templonman kutichisqa kanqa, nispa.

⁶ Chayraykum Eufrates mayupa waklawninpi kamachikuq Tatnaitawan Setar-boznaita hinaspa paykunawan kaqkunata rey Darío kaynata kamachirqa: “Jerusalén llaqtamanta anchuychik,

⁷ ama michakuychikchu ancianokunawan llapa gobernadorninkuna Tayta Diospa templonta maymi kasqanpi musoqmanta hatarichinankutaqa.

⁸ Chaynaqa, ñoqam kamachimuykichik, Tayta Diospa templonta ancianokuna hatarichiptinku kaynata yanapanaykichikpaq: Eufrates mayupa waklawninmanta reypaq impuestokuna huñusqaykichikmantam lliw gastokunata pagankichik, chaynapi ruwasqanku mana sayarunanpaq.

⁹ Qoychiktaqyá hanaq pachapi Tayta Diosman lliw kañana sacrificiokunata ofrecenankupaqpas malta torokunata, carnerokunata chaynataq trigota, kachita, vinota hinaspa aceitetapas. Chaykunataqa qonkichik Jerusalenpi sacerdotekunapa mañakusqanman hinam.

¹⁰ Chaynapi hanaq pachapi munaychakuq Diosman sacrificiokunata ofrecespa allin kanaypaq chaynataq churiykunapaqpas Tayta Diosta mañakunankupaq.

¹¹ Sichum pipas kay kamachikusqayta mana kasukuptinqa, wasinmanta qeruta hurqospa chaypi warkuspa wañuchichunku. Wasintapas tuñichispa purmachichunku.

¹² Tayta Diosyá tuñichichun mayqan nacionpas chaynataq mayqan reypas kay kamachikuyniyta yanqachaspan Tayta Diospa Jerusalenpi kaq templonta tuñichiptinqa. Ñoqa Dariom kay kamachikuyta qoni, chaynaqa ruwasqapuni kachun”, nispa.

Diospa templonta qespichisqankumanta

¹³ Chaymi Eufrates mayupa waklawninpi kamachikuq Tatnaiwan Setar-boznai hinaspa paykunawan kaqkuna, rey Dariopa kamachikusqanman hina ruwarqaku.

¹⁴ Chaynapim ancianokunaqa Diospa templon ruwaypi ñawpaqman rirqaku, profeta Hageopa hinaspa Idopa churin profeta Zacariaspa nisqanman hina; hinaspam Tayta Diospa kamachisqanman hina, chaynallataq Persia nacionpa reynin Ciropa, Dariopa hinaspa Artajerjespa kamachisqankuman hina qespirachirqaku.

¹⁵ Persia nacionpi rey Darío soqta wataña munaychakuchkaptinmi, Adar killapa kimsa kaq punchawninpi, Tayta Diospa templon qespichisqa karqa.

¹⁶ Hinaptinmi Israelpa mirayninkuna, llapa sacerdotekuna, levitakuna hinaspa wakin preso apasqa kaqkunamanta kutimuqkuna, Diospa templonta kusikuyllawanña dedicarqaku.

¹⁷ Templota dedicaspankum Tayta Diosman ofrecerqaku pachak malta torokunata, iskay pachak carnerokunata, tawa pachak malta carnerokunata hinaspa chunka iskayniyuq chivatokunatapas, huk chivatotam sapa ayllumanta hucha pampachana ofrendapaq wañuchirqaku.

¹⁸ Chaymantam sacerdotekunatawan levitakunata churarqaku, imam ruwanankuta muyuyninpi ruwaspanku Tayta Diosta Jerusalenpi servinankupaq. Chaytaqa ruwarqaku Moisespa libronpi qellqasqaman hinam.

¹⁹ Preso apasqa kasqankumanta kutimuqkunaqa ruwarqakutaqmi Pascua fiestatapas Abib killapa chunka tawayuq punchawninpi.

²⁰ Sacerdotekunawan llapa levitakunam huk runa hinalla chuyanchakurqaku, hinaspam llapallanku chuyanchasqa karqaku. Chaymantam preso apasqa kasqankumanta kutimuqkunapaq, sacerdotemasinkunapaq hinaspa kikinkupaqpas Pascua carnerota sacrificarqaku.

²¹ Hinaspankum preso apasqa kasqankumanta kutimuqkunawan chaynataq Tayta Diosta maskanankupaq llaqtakunapa mana allin ruwayninkumanta rakikuqkunapiwan chay Pascua carnerota mikurqaku.

²² Qanchis punchawmi mana levadurayuq tanta fiestata llumpay kusisqallaña ruwarqaku. Tayta Diosmi Asiria nacionpa reyninwan yanapachirqa Israelpa yupaychasqan Tayta Diospa templon ruwaypi, chayraykum paykunaqa llumpay kusisqallaña karqaku.