Esdras 3 - CHUYA QELLQA La Biblia en Quechua de Ayacucho 2012

Diospa altarninta hatarichisqankumanta

¹ Qanchis kaq killa chayaramuptinmi, Israelpa mirayninkuna sapakama llaqtankupiña kachkaspanku, chulla runa hinalla Jerusalén llaqtapi huñunakururqaku.

² Chaymi Josadacpa churin Josueywan, paypa sacerdotemasinkuna hinaspa Salatielpa churin Zorobabelwan waw-qenkuna, Tayta Diospa altarninta hata-richirqaku, chaynapi Diospa serviqnin Moisespa kamachisqanman hina lliw kañana sacrificiokunata ofrecenankupaq.

³ Chay lawkunapi yachaq runakunata manchakuchkaspankupas altartam maymi kasqanpi allinta hatarichirqaku, hinaspam Tayta Diosman lliw kañana sacrificiokunata sapa tutapayta sapa tardeykuyta ofrecerqaku.

⁴ Ruwarqakutaqmi Ramada sutiyuq hatun fiestatapas kamachikuypa nisqanman hina, lliw kañana sacrificiokunatapas sapa punchaw ruwanankuman hinam ofrecerqaku.

⁵ Ofrecerqakutaqmi sapa punchaw ofrecenanku lliw kañana sacrificiotapas, llullu killapi chaynataq tayta Diospa fiestankunapi ofrecenankutapas hinaspa kikinkumanta Tayta Diosman ofrecey munasqankutapas.

⁶ Qanchis kaq killapa qallariy punchawmantam Tayta Diosman lliw kañana sacrificiokuna ofreceyta qallaykurqaku, Tayta Diospa templonpa cimientonkunatam ichaqa manaraq churarqakuchu.

⁷ Hinaptinmi albañilkunamanwan carpinterokunaman qollqeta qorqaku; Sidón hinaspa Tiro llaqtayuqkunamanpas mikuyta, vinota hinaspa aceitetam qorqaku, chaynapi Líbano montemantaraq lamar qochanta Jope llaqtakama cedro qerukunata apamunankupaq. Chaytaqa ruwarqaku Persia nacionpa reynin Ciropa kamachikusqanman hinam.

Diospa templonpa cimienton churasqankumanta

⁸ Jerusalén llaqtaman chayamusqankumanta iskay wata qepatam, chay watapa iskay kaq killanpi, Salatielpa churin Zorobabelwan Josadacpa churin sacerdote Josué, Tayta Diospa templon hatarichiyta qallaykurqaku. Paykunatam yanaparqaku llapa sacerdotekuna, levitakuna hinaspa Babiloniamanta lliw kutimuqkuna. Llam-kaqkunata kamachinanpaqñataqmi churarqaku levitakunata iskay chunka watayuqmanta hanayman.

⁹ Josueymi churinkunawan chaynataq ayllunkunawan kuska Tayta Diospa templonpi llamkaqkunata kamachirqaku. Paykunatam yanaparqaku Hodaviaspa mirayninmanta kaq Cadmiel chaynataq churinkunapas hinaspa Henadadpa ayllunkunapas.

¹⁰ Tayta Diospa templonpa cimientonta albañilkuna churaptinkum, llapa sacerdotekuna chaypaq hina pachasqakama hinaspa trompetantinkama sayarirqaku, Asafpa churin levitakunañataqmi platillontinkama sayarirqaku, Israelpa reynin Davidpa kamachisqanman hina Tayta Diosta yupaychanankupaq.

¹¹ Wakiqmi takikunawan Tayta Diosman graciasta qorqaku, wakiqñataqmi kaynata takispa kutichirqaku: Tayta Diosman ancha kuyakuq kasqanmanta graciasta qoychik, Israelpaq kuyapayakuyninqa wiña-wiñaypaqmi, nispanku. Llapallan runakunam hatun kusikuywan qaparispa Tayta Diosta yupaycharqaku, Tayta Diospa templonpa cimientonta churasqankurayku.

¹² Sacerdotekunamanta, levitakunamanta, sapa ayllupi kamachikuqkunamanta yuyaqña kaqkunam, ñawpaq kaq templota rikuqkuna, templopa cimientonkuna churasqa kasqanta rikuykuspanku qaparillawanña waqarqaku, wakinñataqmi kusikuymanta qaparirqaku.

¹³ Llumpayta qaparisqankuraykum mana reqsiyta atirqakuchu pim kusikuywan qaparisqanta otaq pim qapariywan waqasqantapas. Qaparisqankuqa karu-karumanraqmi uyarikurqa.