Eclesiastés 5 - CHUYA QELLQA La Biblia en Quechua de Ayacucho 2012

Prometekuruspaqa cumplinamanta

¹ Diospa templonman rispaykiqa qasillalla kaspayá yachachikuyta allinta uyariy, amayá mana yachayniyuq runakunapa sacrificasqanta hina ofrecenaykipaqchu, paykunaqa manam yachankuchu mana allin ruwasqankutaqa.

² Amayá apurawmanqa imatapas rimaruychu, amayá sonqoykipipas nitaq yuyaymanaynikipas hawanpi-ukunpiqa Diosman prometekuruychu; Diosqa hanaq pachapim kachkan, qamñataqmi kay pachapi kachkanki. Chaynaqa, pisillatayá rimay.

³ Pipas llumpayta piensaspaqa muspaypi hinam rikurirun, pipas llumpayta rimaspaqa mana pasaqllatam imatapas riman.

⁴ Diosman prometekuspaykiqa chayllayá ruwayman churay, prometekusqanta mana cumpliq runaqa manam Diospaq hinachu kachkan. Prometekuspaykiqa ruwaypuni.

⁵ Prometekuruspa mana cumplinaykimantaqa mana prometekuymi aswan allinqa.

⁶ Amayá munaychu huchaman simiki wichiykachisunaykitaqa, chaynapi Diospa kachamusqan hamuptin “mana yachaywanmi ruwaruni” nispa mana ninaykipaq. ¿Imapaqtaq rimasqaykikunawan Diosta piñachiwaq chaynapi ruwasqaykikunata tuñirachinanpaqqa?

⁷ Imapipas llumpay yuyaymanayqa manam allinchu kaqkunatawan yanqa rimaykunallatam apamun, qamqa Diostayá hatunchay.

Runapaqqa ima ruwasqanpas yanqapaqmi

⁸ Hukkaqnin llaqtapi wakchakuna ñakarichisqa kasqanta chaynataq allin arreglo ruwaywan allin kawsakuy sarutyasqa kasqanta rikuspaykiqa amayá admirakuychu. Chaykunaqa pasakun huk kamachikuqpa mana allin ruwayninta paymanta más atiyniyuq kaqraq pakaptinmi, chaynallataq kay iskaynintapas aswan más atiyniyuqraq pakaptinmi.

⁹ Chaywanpas allpaqa llapallan runapaqmi rurun, reypunipas allpamantam kawsan.

¹⁰ Qollqe kuyaq runaqa maynaña qollqewanpas manam sonqon tiyanqachu; apuyayta kuyaqpas maynaña kapuqninwanpas manam hawkaraqchu kanqa. Chaypas yanqallapaqmi.

¹¹ Qollqesapa runapaqqa gastaqkunapas manam faltanchu; apukunaqa kusikuyta tarin achka qollqeta qawasqallankupim.

¹² Llamkakuq runaqa achkata otaq asllata mikuspapas miskitam puñukun; aputam ichaqa tukuy ima kapuqninkuna mana puñuchinchu.

¹³ Huk manchakuypaq mana allintam kay pachapi rikurqani: Qori-qollqella taqeq runaqa kikinpa sasachakuyllanpaqmi taqen.

¹⁴ Mana allin negocio ruwaypiqa maynaña qori-qollqepas chayllam tukurunqa. Sichum chay qori-qollqeyuq runa churiyuq karuptinqa, manam imapas saqenanpaq kanqañachu.

¹⁵ Runaqa, imaynam mamanmanta qalalla nacemurqa chaynam kutinqapas; llamkasqanmantaqa manam imatapas apanqachu.

¹⁶ Mayna llakikuypaqmi runaqa nacesqanman hina mana imayuq tukuruyninqa. Hinaptinqa ¿imatataq hurqokun maynataña llamkaspanpas?

¹⁷ Chaywanpas sapa punchawmi tutayayllapi, sasachakuyllapi, nanayllapi hinaspa piñakuyllapi kawsanqa.

¹⁸ Chaynapim kayta allinpaq kasqanta hapirqani: Runapaqqa allinqa kanman mikuspa tomaspa Diospa kawsay qosqanman hina sapa punchaw pisipaywan llamkasqanpa rurunwan kusikuymi. Chaymi Diospa munayninqa.

¹⁹ Diosqa qori-qollqetawan tukuy imatam runaman qon chaykunamanta mikunanpaq, chaymanta hapispa llamkasqanwan kusikunanpaq. Chayqa Diospa qokuyninmi.

²⁰ Diospuni kusichisqanraykum, runaqa imaynam kawsananmantapas mana imapas qokunchu.