Eclesiastés 11 - CHUYA QELLQA La Biblia en Quechua de Ayacucho 2012

¹ Tantaykita yakuman wischuykuy, punchawkuna pasaruptinmi huktawan tarirunki.

² Qanchisman otaq pusaqman kapuqnikikunata aypuy, manam yachankichu ima sasachakuymi llaqtaman hamunantapas.

³ Puyukuna armakuptinqa param allpaman chayamunqa. Sachaqa sur lawman otaq norte lawman wichispanpas, maymi wichisqanpim kanqa.

⁴ Wayralla qawaq runaqa manam tarpukunqachu, puyuta qawaq runaqa manam cosechanqachu.

⁵ Imaynam mana yachankichu maynintam wayra risqanta, nitaq imaynam warmipa wiksanpi wawapa tullunkuna wiñasqanta, chaynam tukuy imata unanchaq Diospa ruwasqankunatapas mana reqsinkichu.

⁶ Tutapaymanta muhuykita tarpuy, tardenpas ama makikita samachiychu; manam yachankichu mayqanmi allin qespinantapas, otaq iskaynin chaynakamalla qespinantapas.

⁷ Achkiyqa suma-sumaqmi, mayna sumaqmi ñawipaq intipa kanchaynin qawayqa.

⁸ Ichaqa unay watakunataña runa kawsaspapas, chay watakunapi anchataña kusikuspapas, manam qonqananchu sasachakuy punchawkunataqa, hamuq kaqkunapas tukuruqlla kasqantaqa.

Jovenkunapaq yachachikuykunamanta

⁹ Joven, joven kaynikipi kusikuy, sonqoykipas warma kaynikipi anchata kusikuchun, sonqoykipa munasqanman hina, ñawikipa qawasqanman hina kawsay. Ichaqa amayá qonqaychu, tukuy ima ruwasqaykimantaqa Diosmi cuenta mañasunki.

¹⁰ Sonqoykimantayá piñakuyta wischuy, mana allin ruwaykunamantayá ayqekuy, warma kaywan joven kayqa tukuruqllam.