Eclesiastés 1 - CHUYA QELLQA La Biblia en Quechua de Ayacucho 2012

Tukuy imapas pasaruqlla kasqanmanta

¹ Kaykunam Predicadorpa rimarisqankuna. Payqa karqa Jerusalenpa reynin Davidpa churinmi.

² Predicadormi nirqa: ¡Tukuy imapas yanqallam! ¡Tukuy impas mana kaqllam! ¡Tukuy imapas tukuruqllam!

³ ¿Imatataq runa hurqokun kay pachapi sapa punchaw llamkasqanmanta?

⁴ Runaqa nacechkanraq wañuchkanraqmi, allpa pacham ichaqa hina kaqlla.

⁵ Intiqa lloqsimuspam seqaykun, maymi kasqanman kutiykuspam kasqallan lloqsimun.

⁶ Wayraqa sur lawman pukuchkaspam norte lawman muyurun, muyurispa muyurispanmi maymi kasqanman kutin.

⁷ Mayukunaqa lamar qochamanmi rin, lamar qocham ichaqa mana huntarinchu, mayukunam maymantam hamusqanman kutirin, chaymanta kasqallan kallpamunanpaq.

⁸ Tukuy imam runata amichin, rimaytapas manaña munanakama. Ñawiqa manam qawasqanwan saksanchu, nitaqmi rinripas uyarisqanwan aminchu.

⁹ ¿Imataq ñawpaqta pasakurqa? Hina chayllam huktawan pasakunqa; ¿Imataq ñawpaqta ruwasqa karqa? hina chayllam ruwasqa kanqa. Kay pachapiqa manam imapas musoqqa kanchu.

¹⁰ Chaywanpas kanqam: “Kayqa musoqmi niqkuna”, ichaqa manaraq nacechkaptinchikmi chaykunaqa karqaña.

¹¹ Imapas pasaq kaqkunaqa qonqasqañam, chaynallataqmi qepa hamuqkunapas qepaman pasakuqkunata qonqarunqaku.

Predicadorpa imamantapas yachaykuy munasqanmanta

¹² Ñoqa Predicadormi, Israel nacionpi rey kaspay Jerusalenmanta munaychakurqani.

¹³ Hinaspam kay pachapi runakunapa tukuy ima ruwasqanta yachanaypaq tapukachakuspay sumaqta qatiparqani. Chay llasaq ruwaytam runakunaman Dios qoykurqa llamkanankupaq.

¹⁴ Kay pachapi runakunapa tukuy ima ruwasqanta qawaykuspaymi yuyayta hapirqani, tukuy chaykunaqa yanqalla kasqanta, wayra qatikachay hinalla kasqanta.

¹⁵ Qewisqa kaytaqa manam derechayta atichwanchu, mana kaqtaqa manam yupayta atichwanchu.

¹⁶ Sonqoypim nirqani: “Llumpaytam hatunchakuruni, ñoqamanta ñawpaqta Jerusalenpi munaychakuqkunamantapas aswan yachayniyuqmi rikuriruni. Sonqoypas yachaytawan sinchi yuyayniyuq kaytam hayparun, nispay.

¹⁷ Tukuy sonqoymantam yachayta maskaypi rirqani, mana yachayniyuq kaytawan mana yuyayniyuq kaytapas reqsirurqanim. Hinaspaymi chaykunapas yanqalla kasqanta yacharurqani.

¹⁸ Achka yachayqa uma nanaytam apamun, runaqa yachasqanman hinam aswan ñakarinqa.