Deuteronomio 33 - CHUYA QELLQA La Biblia en Quechua de Ayacucho 2012

Israel miraykunata Moisés bendecisqanmanta

¹ Diospa serviqnin Moisesmi wañukunallanpaqña Israelpa mirayninkunata kaynata bendeciykurqa:

² Tayta Diosmi Sinaí orqomanta hamurqa, Seir orqomantam inti hina achkirimurqa, Parán orqomantam kancharimurqa, waranqantin-waranqantin chuyakunapa chawpintam hamurqa, yachachikuyninkunatam rupachkaq ninata hina apamurqa.

³ Dios Taytalláy, llaqtaykitam kuyanki, llapallan sapaqchasqaykikunatam waqaychanki, paykunaqa ñawpaqnikipim qonqorakunku, kamachisqaykikunatam chaskikunku.

⁴ Jacobpa mirayninkunapa herencian kananpaqmi, Tayta Diospa kamachikuyninkunata Moisés qowarqaku.

⁵ Jesurún llaqtapim huk rey munaychakurqa, Israel ayllukunawan kamachiqninkuna huñunakuptinkum munaychakurqa.

⁶ Rubén ayllumantam nirqa: ¡Rubén ayllu kawsachun! Ama wañuchunchu, mirayninkunapas mana yupay atina kachun.

⁷ Judá ayllumantam nirqa: Dios Taytalláy, Judá ayllupa mañakuyninta uyariykuy, llaqtanman paykunata kutichiy, atiynikiwan waqaychaykuy, enemigonkunapa contranpi yanapaykuy.

⁸ Leví ayllumantam kaynata nirqa: Dios Taytalláy, Tumim rumikiwan Urim rumikiyá qanman sonqoyuq runapaq kachun, paytam Masahpi pruebaman churarqanki, Meriba yakupa kasqanpim atipanakurqanki.

⁹ Paymi tayta-mamanmanta nirqa: “Manam haykapipas rikurqanichu”, nispa. Wawqenkumantañataqmi nirqa: “Manam reqsinichu”, nispa. Churinkunatapas manam reqsirqachu. Paykunaqa nisqaykitam kasukurqaku, pactoykitam ruwayman churarqaku.

¹⁰ Jacobpa mirayninkunamanmi kamachikuynikikunata yachachinqaku, Israel miraykunamanmi yachachikuynikikunata yachachinqaku. Ñawpaqnikipim inciensota qontichinqaku, altarnikipim lliw kañana animalkunata kañanqaku.

¹¹ Dios Taytalláy, kallpantayá yapaykuy, llamkasqankutayá kusikuywan chaskiykuy, enemigonkutapas wasanta pakiruy, cheqniqninkunatapas manaña sayariypas atinankukama waqtaparuy.

¹² Benjamín ayllumantam nirqa: Dios Taytapa kuyasqanqa hawkam kawsakunqa, paypa waqaychasqanmi kawsakunqa, kuyasqaykiqa marqaynikipim kawsakunqa.

¹³ José ayllumantam nirqa: Dios Taytalláy, allpantayá allinta rurunanpaq bendeciykuy, cielomanta chayamuq allinnin sullawan bendeciykuy, allpapa ukunpi kaq yakuwan bendeciykuy.

¹⁴ Intipa rupayninwan poqoq rurukunawan bendeciykuy, killapa qespichisqan rurukunawan bendeciykuy.

¹⁵ Ñawpaq orqokunapi qespiq sumaq rurukunawan bendeciykuy, wiñaypaq moqokunapi qespiq rurukunawan bendeciykuy.

¹⁶ Kay pachata huntariq allinnin kaqkunawan bendeciykuy, rupachkaq tankar kichkapi rikuriqpa kuyakuyninwan bendeciykuy. Chaykunawanyá Joseyqa bendecisqa kachun, payqa wawqenkunata kamachinanpaq akllasqam karqa.

¹⁷ Joseyqa vacapa punta wawan hina kuyayllapaqmi, payqa búfalo hina kallpasapallañam, waqrankunawanmi llapa nacionkunata kay pachapa patankama waqraparunqa. Chaynam Efrainpa wara-waranqa mirayninkunaqa, chaynam Manasespa waranqantin mirayninkunaqa.

¹⁸ Zabulonmantawan Isacarmantam nirqa: Zabulón, maymanña rispapas kusikuy, Isacar, carpaykikunapi kusikuy.

¹⁹ Orqomanmi llaqtakunata qayanqaku, chaypim animalkunata allin ruwasqankumanta ofrecenqaku, lamar qochapi tukuy ima kaqkunawanmi apuyanqaku, lamar qochapa aqonpi pakasqa qori-qollqewanmi apuyanqaku.

²⁰ Gad ayllumantam nirqa: Gad ayllupa allpanta hatunyachiq yupaychasqa kachun, Gad aylluqa animalta suyachkaq león hinam, brazokunata umakunata tisaparuq león hinam.

²¹ Paykunaqa allinnin allpatam hapikuykurqaku, kamachikuqkunapaq kaqtam akllakuykurqaku. Llaqtapa ñawpaqnintam hamurqaku, Tayta Diospa imam munasqantam ruwarqaku, Israel mirayninkunapim allin arreglota ruwarqaku.

²² Dan ayllumantam nirqa: Danqa uña león hinam, Basán lawmanta pawamuq león hinam.

²³ Neftalí ayllumantam nirqa: Neftaliyqa Tayta Diospa bendicionninwan huntarisqam kachkan, payqa tukuy imawan bendecisqam kachkan. Sur lawpi allpatam Galilea qochakama hapikuykun.

²⁴ Aser ayllumantam nirqa: Aserqa wawqenkunamanta aswan bendecisqayá kachun, wawqenkunapa ancha kuyasqanyá kachun, chakintapas aceitewan mayllakuchun.

²⁵ Punkunpa cerrojonkunapas fierromantawan broncemantam kanqa, wañunankamayá kallpanpas ama tukuchunchu.

²⁶ Jesurunpa Diosnin hinaqa manam kanchu, yanapasunaykipaqmi atiyninwan cielokunapa hawanpi purichkan, puyu hawantam hamuchkan.

²⁷ Wiñaypaq kawsaq Diosmi pakakunaykiqa, wiñaypaq atiyninwanmi marqasunki. Ñawpaqnikichikmantam enemigoykichikta wischunqa, chinkachinaykichikpaqmi kamachikunqa.

²⁸ Israelpa mirayninkunaqa payman hapipakuspam kawsakunkichik, Jacobpa mirayninkunaqa hawkallam kawsakunkichik. Trigopapas vinopapas kanan allpapim yachakunkichik, paranan allpapim yachakunkichik.

²⁹ Israelpa mirayninkuna, ¡mayna kusisqam kankichik! ¿Pitaq qamkuna hinaqa? Tayta Diospa librasqan runakunam kankichik, paymi waqaychaspa yanapaqnikiqa, paymi vencechisuqniki espadaqa. Enemigoykikunam qayllaykipi wichinqaku, qamkunañataqmi paykunata sarupankichik, nispa.