Deuteronomio 31 - CHUYA QELLQA La Biblia en Quechua de Ayacucho 2012

Moisespa rantinpi Josué churasqa kasqanmanta

¹ Israelpa mirayninkunatam huktawan Moisés nirqa:

² Ñoqaqa pachak iskay chunka wataypiñam kachkani, mayman rinaypaqpas manañam kallpay kanñachu. Tayta Diospas niwarqataqmi “Jordán mayutaqa manam chimpankichu”, nispa.

³ Chaywanpas Tayta Diosmi ñawpaqnikichikta rispan, chay risqaykichikpi nacionkunata chinkachispan paykunapa allpanta qosunkichik. Josueymi Tayta Diospa nisqanpi hina pusasunkichik.

⁴ Señornikichik Tayta Diosmi chinkachinqa imaynam amorreokunapa reynin Sehonta, rey Ogta chaynataq nacionninkutapas chinkachisqanta hina.

⁵ Chay nacionkunata Tayta Dios vencerachisuptikichikqa, kamachisqayman hinam paykunawan ruwankichik.

⁶ Chaynaqa, kallpanchakuspa qarinchakuychik. Ama paykunata manchakuychikchu, amataq katkatataychikchu; Señornikichik Tayta Diosmi qamkunawan richkan, manam payqa saqerusunkichikchu nitaqmi qonqasunkichikchu.

⁷ Chaymantam Josueyta qayaspan Israelpa llapallan mirayninkunapa qay-llanpi Moisés nirqa: Kallpanchakuspa qarinchakuy, qanmi kay runakunata ñawpaq taytankuman Tayta Diospa jurasqan allpaman pusanki, hinaspam paykunaman qonki.

⁸ Tayta Diosmi ñawpaqnikita rispan qanwan kanqa. Manam saqesunkichu nitaqmi qonqasunkichu, chaynaqa ama manchakuychu nitaq hukmanyaychu, nispa.

Kamachikuykunata Ramada fiestapi leenankumanta

⁹ Moisesmi kay yachachikuykunata qellqarqa, hinaspam Tayta Diospa pacton waqaychana Arca apaq Leví ayllu sacerdotekunaman chaynataq Israelpa llapallan ancianonkunaman qorqa.

^10-11 Chaymantam paykunata kamachispan nirqa: Sapa qanchis wata tukuytam, manukuqkunata pampachana watapi, Ramada fiestata ruwanaykichikpaq Israelpa llapallan mirayninkuna Señornikichik Tayta Diospa qayllanman paypa akllasqan sitioman huñunakamunqaku, hinaspam lliwpa qayllanpi kay kamachikuy librota leenki.

¹² Llapallan runakunatam huñunkichik: Qaritapas, warmitapas, wawakunatapas chaynataq qamkunawan yachaq huklaw llaqtayuqkunatapas; chaynapi leesqanku yachachikuykunata uyarispanku Tayta Diosta manchakunankupaq hinaspa kay yachachikuykunata kasukunankupaq.

¹³ Chaynapim kay yachachikuykunata manaraq yachaq miraynikichikkunapas uyarispanku Tayta Dios manchakuyta yachanqaku, Jordán mayuta chimpaspa Tayta Diospa qosqan allpapi kawsananku punchawkama.

Wañukunallanpaqña Moisespa rimarisqanmanta

¹⁴ Moisestam Tayta Dios nirqa: Wañukunayki punchawmi hichpamuchkanña, chaynaqa Josueyta qayaspa paywan kuska asuykamuwanaykichik carpaman riy, chaypi payman kamachikuyniykunata ninaypaq, nispa. Chaynapim Moiseswan Josué rispanku, Tayta Diosman asuykuna carpapi sayarqaku.

¹⁵ Chaypim paykunaman sayanpa puyupi Tayta Dios rikuriykurqa, chay puyuqa carpapa punkunpim sayaykurqa.

¹⁶ Hinaptinmi Moisesta Tayta Dios nirqa: Qamqa wañukunkiñam, ichaqa kay runakunam maymi risqanku allpapi, hukwan tupakuruq casada warmi hina mana reqsisqanku dioskunata qatinqaku. Saqeruwaspankum paykunawan ruwasqay pactotapas yanqacharunqaku.

¹⁷ Hinaptinmi contrankupi piñakuruspay paykunata saqerusaq. Qepancharuptiymi puchukaytaña qallaykunqaku. Chaymi hatun sasachakuypi hinaspa hatun ñakariypi kaspa ninqaku: “Kay ñakariykunaqa hamuruwanchik Tayta Dios manaña ñoqanchikwan kasqanraykum”, nispanku.

¹⁸ Chayna ñakariypi kaptinkum astawanraq paykunamanta karunchakurusaq, chaynataqa ruwasaq tukuy mana allinkunata ruwaspa idolokunataña yupaychasqankuraykum.

¹⁹ Kunanyá kay takita qellqaspa Israelpa mirayninkunaman takinankupaq yachachiychik, chaynapi Israelpa mirayninkunapa contranpi testigo kananpaq.

²⁰ Ñawpaq taytaykichikkunaman juraspa prometesqay tukuy imapa kanan chaynataq tukuy imapa qespinan allpaman paykunata pusaruptiymi saksanankukama mikuspa wirayanqaku, ichaqa karunchakuruspam idolokunataña yupaychanqaku. Qepancharuwaspankum pactoytapas mana kasukunqakuchu.

²¹ Chay hatun sasachakuykunapi chaynataq ñakariykunapi kaptinkum kay taki testigo kanqa, chaynapi mirayninkupas mana qonqanankupaq. Ñoqaqa yachaniñam qonaypaq jurasqay allpaman manaraq yaykuchkaspa imam tanteasqankutapas, nispa.

²² Chay punchawmi Moisés qellqarqa kay takita, hinaspam Israelpa mirayninkunaman yachachirqa.

²³ Nunpa churin Josueyta kamachispanmi Tayta Dios kaynata nirqa: Kallpanchakuspa qarinchakuy, qanmi jurasqay allpaman Israelpa mirayninkunata pusanki, ñoqam qanwan kasaq, nispa.

²⁴ Chay yachachikuykunata Moisés qellqayta tukuruspanmi,

²⁵ Tayta Diospa pacton waqaychana Arca apaq Levita-kunata nirqa:

²⁶ Kay kamachikuy librota Señornikichik Tayta Diospa Arcanman churaychik. Chaypi kachun, contraykichikpi testigo kananpaq.

²⁷ Ñoqaqa yachanim qamkunaqa mana kasukuq hinaspa rumi sonqo runakuna kasqaykichikta. Qamkunawanraq kachkaptiypas Tayta Diosta mana kasukuspaqa, imaynaraq wañukuptiy kankichik.

²⁸ Chaynaqa, aylluykichikpi ancianonkunatawan kamachikuqkunata qayamuychik, paykuna uyarichkaptin kaykunata nispay cielotawan kay pachata paykunapa contranpi testigota churanaypaq.

²⁹ Wañukuptiyqa cheqaptapunipas huchallikuspaykichikmi kay kamachisqayman hina kawsaymantapas karunchakurunkichik. Yachanitaqmi Tayta Diospa qayllanpi mana allinkunata ruwaspa payta piñachinaykichiktapas, chayraykum hamuq punchawkunapi castigasqa kankichik, nispa.

Moisespa qellqasqan taki

³⁰ Hinaptinmi Israelpa llapallan mirayninkunapa qayllanpi Moisés kay takita qallariyninmanta tukupayninkama rimarirqa: