Deuteronomio 30 - CHUYA QELLQA La Biblia en Quechua de Ayacucho 2012

Tayta Diospa bendecisqan kanankumanta

¹ Sichum akllakunaykichikpaq kunan willasqay bendicionkunapas otaq ñakaykunapas hamusuptikichik, Señornikichik Tayta Diospa qarqosusqaykichik nacionkunapi kaspa yuyaymanankichik,

² hinaspa qamkunapas chaynataq churikichikkunapas Señornikichik Tayta Diosman kutirikuspa, tukuy sonqoykichikwan, tukuy vidaykichikwan kunan kamachisqaykunata kasukuptikichikqa,

³ Señornikichik Tayta Diosmi preso kasqaykichikmanta kutichimusunkichik, hinaspam llakipayarisunkichik.

⁴ May karu llaqtakunamanña qarqosqa kaptikichikpas, chaykunaman-tam Señornikichik Tayta Dios kutichimusunkichik. Chaymantam payqa hoqarimusunkichik.

⁵ Ñawpaq taytaykichikpa allpanmanmi Señornikichik Tayta Dios kutichimusunkichik, hinaptinmi huktawan qamkunapaq kanqa. Bendecisuspaykichikmi ñawpaq taytaykichikkunamantapas aswantaraq mirachisunkichik.

⁶ Señornikichik Tayta Diosmi qamkunatapas chaynataq miraynikichiktapas kasukuq sonqotaña ruwasunkichik, chaynapi tukuy sonqoykichikwan, tukuy vidaykichikwan payta kuyaspa allinta kawsanaykichikpaq.

⁷ Hinaptinmi Señornikichik Tayta Dios, kay ñakay-kunata enemigoykichikman, cheqnispa qatikachasuqnikichikkunaman kacharinqa.

⁸ Qamkunañataqmi Señornikichik Tayta Diosman kutirikuspa kasukunkichik, kunan willasqay llapa kamachikuykunatapas ruwaymanmi churankichik.

⁹ Hinaptinqa Señornikichik Tayta Diosmi tukuy ruwasqaykichikpi allinta kawsachisunkichik, chaynapim achka churiyuq, achka animalniyuq kankichik; tarpuspapas achkallatañam cosechankichik. Tayta Diosmi ñawpaq taytaykichikkunawan kusikusqanta hina qamkunawanpas kusikunqa.

¹⁰ Chaynataqa kusikunqa Señornikichik Tayta Diosta kasukuspa kay kamachikuy libropi qellqasqa kamachikuyninkunata, yachachikuyninkunata ruwayman churaptikichikmi; chaynataq tukuy sonqoykichikwan hinaspa tukuy vidaykichikwan payman kutirikuptikichikmi.

¹¹ Kay kamachikuykuna qosqayqa manam sasachu, nitaqmi mana ruway atinaykichikpaq hinachu;

¹² manam hanaq pachapichu kachkan: “¿Pitaq cielota qespiruspan aparamunman hinaspa ruwayman churananchikpaq yachachiwachwan?” ninaykichikpaqqa;

¹³ nitaqmi lamar qochapa waklaw chimpanpichu kachkan: “¿Pitaq chimparuspan aparamunman hinaspa ruwayman churananchikpaq yachachiwachwan?” ninaykichikpaqqa;

¹⁴ kay kamachikuykunaqa hichpallaykichikpiña, simillaykichikpiña chaynataq sonqollaykichikpiñam kachkan.

¹⁵ Chaynaqa, akllakuychik, kunanmi ñawpaqnikichikman churani allin kaqtawan kawsayta, mana allin kaqtawan wañuyta.

¹⁶ Sichum kunan kamachisqaykunata kasukuspa Tayta Diosta kuyaspaykichikqa, munasqanman hina kawsaspa kamachikuyninkunata, yachachikuyninkunata, reglamentonkunata ruwayman churaspaykichikqa, allinta kawsaspam achkallaña mirayniyuq kankichik, chaynatam Señornikichik Tayta Diosqa qosusqaykichik allpapi bendecisunkichik.

¹⁷ Sichum Tukuy kay nisqaykunata mana kasukuspa, idolokunataña qonqorakuspa yupaychaptikichikqa,

¹⁸ kunanmi nikichik: Wañunkichikpunim. Jordán mayuta chimparuspa Tayta Diospa qosusqaykichik allpapipas manam unaychu kawsankichik.

¹⁹ Chaynaqa, cielokunatawan kay pachatam qamkunapa contraykichikpi testigota churani, kawsayta otaq wañuyta, bendecisqa kayta otaq ñakasqa kayta akllakunaykichikpaq qamkunaman nisqaymanta. Chaynaqa, kawsaytayá akllakuychik, qamkunapas miraynikichikkunapas kawsanaykichikpaq.

²⁰ Tayta Diosta kuyaspaqa kasukuychik, ama paymantaqa kacharikuychikchu. Paymi kawsay qosuqnikichikqa chaynataq unay watakunata kawsachisuqnikichikpas, chaynapim ñawpaq taytaykichik Abrahamman, Isaacman hinaspa Jacobman Tayta Diospa jurasqan allpapi yachankichik.