Deuteronomio 3 - CHUYA QELLQA La Biblia en Quechua de Ayacucho 2012

Basán nacionpa reyninta vencesqankumanta

¹ Chaymantam huklaw ñannintaña Basán lawman hamurqanchik, chaymi rey Og llapallan tropankunapiwan Edrei llaqta lawpi peleananchikpaq lloqsimurqa.

² Hinaptinmi Tayta Dios niwarqa: “Ama manchakuychu, paytaqa llapallan tropantawan hinaspa allpantawanmi qosqayki. Hesbón llaqtapi yachaq amorreokunapa reynin Sehonta hinam ruwanki”, nispa.

³ Chaynatam Basán nacionpa reynin Ogta chaynataq llapallan tropankunatapas Señorninchik Tayta Dios vencechiwarqanchik, hinaptinmi paykunata mana hukllatapas puchuspa wañuchirqanchik.

⁴ Mana huk llaqtallatapas puchuykuspam llapallanta vencerurqanchik, chay vencesqanchik llaqtakunaqa soqta chunka llaqtakunam karqa, chaykunaqa Argob lawpi otaq rey Ogpa munaychakusqan Basán nacionpi llaqtakunam karqa.

⁵ Chay llaqtakunaqa qaqay-qaqay murallayuqmi karqa, punkunkunapas qerukunawan trancasqam karqa. Vencerurqanchiktaqmi chakrakunapi mana murallayuq achkallaña llaqtakunatapas.

⁶ Hesbón llaqtapi rey Sehonta hinam llapallan llaqtakunapi qarikunatapas, warmikunatapas chaynataq wawakunatapas chinkarachirqanchik.

⁷ Enemigonchikpa llapallan animalninkunawan chaynataq tukuy kapuqninkunawanmi ichaqa qepakuykurqanchik.

⁸ Chaynatam chay tiempopi Jordán mayupa waklawnin intipa qespimunan lawpi yachaq iskay reykunapa nacionninkunata Arnón mayumanta Hermón orqokama hapikuykurqankichik. Chay reykunaqa karqaku amorreokunapa reyninkunam.

⁹ (Sidoniokunam Hermón orqota Sirión orqowan suticharqaku, amorreokunañataqmi Senir orqowan).

¹⁰ Tukuy pampapi kaq llaqtakunatawan Galaadpi chaynataq Basán lawpi llapallan llaqtakunatam Salca hinaspa Edrei llaqtakunakama hapikuykurqanchik. Chay llaqtakunaqa Basán nacionpa reynin Ogpa munaychakusqan llaqtakunam karqa.

¹¹ (Refaitakunamantaqa Basán nacionpa reynin Ogllañam puchururqa. Paypa catrenmi fierromanta tawa metro sayayniyuq hinaspa yaqa iskay metro anchoyuq karqa. Amonpa mirayninkunapa Rabá llaqtanpim chay catreqa hinallaraq kachkan).

Jordán mayupa waklawninpi qepamuq Israel ayllukunamanta

¹² Kay yachasqanchik allpatam Rubén ayllumanwan Gad aylluman qorqani, Arnón mayupa patanpi kaq Aroer llaqtamanta qallarispa Galaad orqokunapa partentapas, chaypi kaq llaqtakunatapas qorqanitaqmi.

¹³ Galaad allpamanta puchuqtawan rey Ogpa munaychakusqan Basán allpatañataqmi Manasespa wakin ayllunman qorqani. Qorqanitaqmi Refaim runakunapa allpanmi nisqanku Argob lawpi allpakunatapas.

¹⁴ Manasés ayllumanta kaq Jairmi Argob lawpi allpakunata hapikuykurqa, Gesur runakunapa chaynataq Maaca runakunapa linderonkama. Chay Basán lawpi allpatam kikinpa sutinwan “Havot-jair” nispa suticharqa, chaynam kunankamapas sutin.

¹⁵ Galaad allpatam Maquirpa mirayninkunaman qorqani.

¹⁶ Rubén ayllumanwan Gad ayllumanñataqmi allpata Galaad lawmanta qallarispa Arnón mayukama qorqani. Linderonmi karqa chay wayqomanta qallarispa amonitakunapa allpanwan tupaq Jaboc mayukama.

¹⁷ Arabá qechwatapas paykunamanmi qorqani, chaypa linderonqa tukuy Jordán mayum kachkan. Chay mayuqa richkan Cineret qochamanta Arabá lamarkamam otaq Puchqo lamar qochakama. Chay lamarqa kachkan intipa qespimunan lawpi kaq Pisga orqopa uray waqtanpim.

¹⁸ Chaypim kay kamachikuykunata nirqaykichik: “Señornikichik Tayta Diosmi kay allpata qamkunaman qoykusunkichik; ichaqa aylluykichik Israel miraykunapa ñawpaqnintam guerrapaq allin armasqakama llapallaykichik rinkichik.

¹⁹ Qamkunaman qosqay llaqtakunapiqa qepanqaku warmikichikwan churikichikkuna hinaspa animalnikichikkunallañam. Qamkunaqa achka animalniyuqmi kachkankichik.

²⁰ Tupaqnikichik allpamanqa kutimunkichik, qamkunaman qosusqaykichikta hina wakin aylluykichikmanpas hawkayayta Tayta Dios qoykuptinñam, Jordán mayupa chimpanpi Señornikichik Tayta Diospa qosqan allpata hapikuykuptinkuñam”, nispa.

²¹ Josueytapas nirqanitaqmi: “Señornikichik Tayta Diospa chay iskay reykunawan imam ruwasqantaqa rikurqankim, chaynatam Tayta Diosqa pasanayki llapallan nacionkunawanpas ruwanqa.

²² Amam paykunataqa manchakunkichikchu, Señornikichik Tayta Diosmi qamkunapa rantikichikpi peleanqa”, nispa.

Canaán allpaman Moisés mana yaykunanmanta

²³ Chay tiempopitaqmi Tayta Diosta mañakuspay nirqani:

²⁴ “Señorlláy, Dios Taytalláy, qanmi kay serviqnikiman qawachiwachkanki hatu-hatun atiyniyuq kasqaykita. Manam hukqa kanchu cielopipas hinaspa kay pachapipas qampa ruwasqaykikunata hina ruway atiqqa.

²⁵ Ama hina kaspayá Jordán mayuta chimparachiway, chay sumaq allpata, orqokunata hinaspa Líbano monteta qawaykunaypaq”, nispa.

²⁶ Ichaqa Tayta Diosmi qamkunarayku ñoqapaq piñakuruspan mañakusqaytapas mana uyariwarqachu, hinaspam kaynata niwarqa: “Chaymantaqa amaña rimapayawaypaschu.

²⁷ Pisga orqopa puntanman qespispa intipa seqaykunan lawta, norte lawta, sur lawta chaynataq intipa qespimunan lawta qawamuy. Jordán mayutam ichaqa mana chimpankichu.

²⁸ Josueyta yachachiy hinaspa kallpanchay. Paymi runakunapa ñawpaqninta rispan qawamunayki allpata paykunaman partenqa”, nispa.

²⁹ Chaynapim Bet-peor llaqtapa chimpan qechwapi qeparurqanchik.