Deuteronomio 29 - CHUYA QELLQA La Biblia en Quechua de Ayacucho 2012

Pactota huktawan Tayta Dios ruwasqanmanta

¹ Horeb orqopi pactota Tayta Dios ruwaruchkaspanpas, Moab nacionpiña kachkaptinkum Moisesta huktawan kamachirqa Israelpa mirayninkunawan pactota ruwananpaq.

² Chaymi Israelpa miraykunata huñuruspan Moisés nirqa: Egipto nacionpi kaspaykichikmi rikurqankichik imaynam rey Faraonta, serviqninkunata chaynataq llapallan runankunatapas Tayta Dios castigasqanta.

³ Rikurqankichikmi hatun señalkunata chaynataq admirakuypaq kaqkuna ruwasqantapas.

⁴ Chaywanpas Tayta Diosqa kunan-kamam yachayta manaraq qosurqankichikchu, chaynapi qawachkaspapas hinaspa uyarichkaspapas mana entiendenaykichikpaq.

⁵ Ñoqam chunniqninta tawa chunka watapuni pusamurqaykichik, pachaykichikpas chaynataq usutaykichikpas manam tukurqachu.

⁶ Manam tantatapas mikurqankichikchu, nitaqmi vinotawan poqosqa aqatapas tomarqankichikchu. Tukuy chaykunatam Tayta Dios kasqanta yachanaykichikpaq ruwarqa.

⁷ Kay allpaman chayaramuptinchik-ñataqmi, Hesbón llaqtapi yachaq rey Sehón hinaspa Basán law allpapa reynin Og ñoqanchikwan peleanankupaq lloqsimurqaku, ichaqa paykunatam vencerurqanchik.

⁸ Paykunata qarqoruspam allpankutapas Rubén aylluman, Gad aylluman chaynataq Manasespa wakin ayllunman herencianku kananpaq qoykurqanchik.

⁹ Chaynaqa, kay pactopa nisqantayá ruwayman churaychik, chaynapi tukuy ima ruwasqaykichikpas allin kananpaq.

¹⁰ Qamkunam llapallaykichik Señornikichik Tayta Diospa qayllanpi hu-ñunasqa kachkankichik: Sapa ayllupi kamachiqninkunapas, ancianokunapas, capitankunapas, Israelpa llapallan mirayninkunapas,

¹¹ warmakunapas, warmikunapas, campamentopi qamkunawan yachaq huklaw llaqtayuqkunapas, yantaqkunapas chaynataq yaku apamuqkunapas.

¹² Llapallaykichikmi huñu-nasqa kachkankichik Señornikichik Tayta Dioswan pactota ruwaspa kunan juranaykichikpaq.

¹³ Chaynapim kunanmantaqa Tayta Diospa llaqtanña kankichik. Payñataqmi Diosnikichikña kanqa, imaynam ñawpaq taytaykichik Abrahamman, Isaacman chaynataq Jacobman jurasqanpi hina.

¹⁴ Tayta Diosqa kay pactotawan juramentotaqa manam qamkunallawanchu ruwan,

¹⁵ aswanqa imaynam qamkunawan ruwasqanta hinam miraynikichikkunawanpas ruwan.

¹⁶ Qamkunaqa yachankichikmi Egip-to nacionpi imaynam yachasqanchiktapas, yachankichiktaqmi hamusqanchikpi tarimusqanchik nacionkunata imaynam pasamusqanchiktapas.

¹⁷ Rikumurqanchikmi chay nacionkunapa yupaychasqanku kullumanta, rumimanta, qollqemanta, qorimanta millakuypaq idolokunatapas.

¹⁸ Amam qamkuna ukupiqa kanqachu qaripas, warmipas, aylluykichikpas otaq miraynikichikpas, chay nacionkunapa idolonkuta yupaychaspanku Tayta Diosmanta rakikuqkunaqa. Yanqañataq qamkuna ukupi rikurirunman hayaq otaq qatqe sapiyuq plantakuna hina runakuna.

¹⁹ Sichum pipas, kay pactopi kaq ñakaykunata uyarichkaspan sonqonpi kaynata alabakunman: “Rumi sonqo kaspay munasqayta ruwakuptiypas, tukuy imam allinpuni lloqsiwanqa”, nispa. Chayna runaqa llapallan runakunatam urmarachinqa.

²⁰ Tayta Diosqa chayna runataqa manam pampachanqachu, aswanqa contranpi sinchita piñakuruspanmi kay libropi qellqasqa kaq ñakaykunata payman kachaykamunqa, chay runapa mirayninkunatapas Tayta Diosqa manaña pipapas yuyarinankamam kay pachamanta chinkarachinqa.

²¹ Tayta Diosqa, Israelpa mirayninkunamanta chay runata rakiruspanmi ñakariykunawan castiganqa, payqa ñakarichinqa kay pactopi qellqasqa llapallan ñakaykunawanmi.

²² Qamkunamanta hamuq qepa miraykunam chaynataq karu nacionkunamanta hamuqkunam chay castigokunata hinaspa nacionnikichikman Tayta Diospa kachamusqan onqoykunata qawanqaku.

²³ Chay allpaqa azufreyuq, kachiyuq hinaspa kañasqa, mana tarpuna, mana imapapas ikllinan nitaq qorapapas wiñanan allpam kanqa. Sodomapa, Gomorrapa, Admapa chaynataq Zeboimpa allpankunamanmi rikchakunqa. Chaykunatam Tayta Dios anchata piñakuspan chinkarachirqa.

²⁴ Hinaptinmi llapa runakuna tapukunqaku: “¿Imanasqataq kay allpata Tayta Dios kaynata castigarun? ¿Imanasqataq kaynataña piñakurun?” nispanku.

²⁵ Chaymi ninqaku: “Ñawpaq taytankupa yupaychasqan Tayta Diosmi Egipto nacionmanta hurqomuspan paykunawan pactota ruwarqa, chay pacto saqerusqankuraykum kaynata ruwarachikunku.

²⁶ Paykunaqa mana reqsisqanku chaynataq mana imapas qoqninku idolokunata yupaychaspankum ñawpaqninpi qonqorakurqaku.

²⁷ Chayraykum paykunapa contranpi Tayta Dios piñakururqa, hinaspam kay libropi qellqasqa llapallan ñakaykunata paykunaman kachaykamurqa.

²⁸ Tayta Diosmi anchallataña piñakuruspan allpankumanta qarqorurqa, hinaspam kunan qawasqaykichikpi hinapas huklaw nacionkunamanña wischururqa”, nispa.

²⁹ Kanmi mana yachasqanchik pakasqa kaqkuna, chaytaqa Tayta Diosllam yachan. Chaywanpas kantaqmi ñoqanchikman chaynataq churinchikkunamanpas wiñaypaq reqsichisqan kaqkuna, chaynapi kay llapallan yachachikuykunata ruwayman churananchikpaq.