Deuteronomio 27 - CHUYA QELLQA La Biblia en Quechua de Ayacucho 2012

Ebal Orqopi rumikunamanta

¹ Moiseswan ancianokunam Israelpa mirayninkunata nirqaku: Kay kamachisqaykunata llapallanta kasukuychik.

² Tayta Diospa qosusqayki-chik allpaman yaykunaykichikpaq Jordán mayuta chimparuspaqa hatunnin rumikunata sayarachispaykichikmi estucowan llusinkichik.

³ Chay rumikunapim kay willasqay yachachikuykunata qellqankichik, chaynataqa ruwankichik Señornikichik Tayta Diospa qosunaykichik tukuy imapapas kanan chaynataq tukuy imapapas qespinan allpaman yaykuruspaykichikmi. Chaynatam ñawpaq taytanchikkunaman Tayta Dios prometekurqa.

⁴ Chaynaqa, Jordán mayuta chimparuspaykichikmi, chay nisqay rumikunata Ebal orqopi sayachinkichik, hinaspam estucowan llusinkichik.

^5-6 Chay orqopim Tayta Diospaq rumimanta altarta hatarichinkichik, rumikunaqa mana labrasqam kanqa. Chaypim lliw kañana sacrificiokunata Tayta Diosman ofrecenkichik,

⁷ chaynataq paywan allinlla kasqaykichikmanta ofrendatapas, hinaspam Tayta Diospa qayllanpi mikuspaykichik fiestata ruwankichik.

⁸ Chay rumikunapim willasqay yacha-chikuykunata lliwpa qawanankupaq hina qellqankichik, nispa.

⁹ Chaymantam Moisés, Leví ayllumanta sacerdotekunapiwan Israelpa mirayninkunata nirqa: Israelpa mirayninkuna, upallaspa kayta uyariychik, kunanqa Señornikichik Tayta Diospa llaqtanñam kankichik.

¹⁰ Chaynaqa, kunan willasqay kamachikuykunatawan yachachikuykunatam ruwayman churankichik, nispa.

Ñakaykunamanta

¹¹ Chay punchawpim runakunata kamachispan Moisés nirqa:

¹² Jordán mayuta chimparuptikichikmi Simeón, Leví, Judá, Isacar, José chaynataq Benjamín ayllukuna Gerizim orqopi sayaykunqaku, hinaspam llaqtata bendecinqaku.

¹³ Ebal orqopiñataqmi Rubén, Gad, Aser, Zabulón, Dan chaynataq Neftalí ayllukuna sayaykunqaku, hinaspam ñakanqaku.

¹⁴ Hinaptinmi levitakuna qaparispa Israelpa mirayninkunata ninqaku:

¹⁵ ¡Llaqllaspan otaq metalta chulluchispan idolota ruwaruspan pakasqapi hatalliq runaqa ñakasqayá kachun, chaytaqa Tayta Diosqa millakunmi! nispanku. Hinaptinmi llapa runakunañataq ninqaku: ¡Amén! nispanku.

¹⁶ ¡Tayta-mamanta usuchiq runaqa ñakasqayá kachun! nispanku. Hinaptinmi llapa runakunañataq ninqaku: ¡Amén! nispanku.

¹⁷ ¡Runamasinpa linderonta suchuchiq runaqa ñakasqayá kachun! nispanku. Hinaptinmi llapa runakunañataq ninqaku: ¡Amén! nispanku.

¹⁸ ¡Ñawsa runata purisqan ñanmanta pantarachiq runaqa ñakasqayá kachun! nispanku. Hinaptinmi llapa runakunañataq ninqaku: ¡Amén! nispanku.

¹⁹ ¡Huklaw llaqtayuqta, viudata, mana tayta-mamayuqta engañaq runaqa ñakasqayá kachun! nispanku. Hinaptinmi llapa runakunañataq ninqaku: ¡Amén! nispanku.

²⁰ ¡Taytanpa warmillanwan kakuq runaqa, chay ruwasqanwan taytanta penqayman churasqanmantayá ñakasqa kachun! nispanku. Hinaptinmi llapa runakunañataq ninqaku: ¡Amén! nispanku.

²¹ ¡Animalwan qachakuq runaqa ñakasqayá kachun! nispanku. Hinaptinmi llapa runakunañataq ninqaku: ¡Amén! nispanku.

²² ¡Mamanmanta otaq taytanmanta kaq panillanwan kakuq runaqa ñakasqayá kachun! nispanku. Hinaptinmi llapa runakunañataq ninqaku: ¡Amén! nispanku.

²³ ¡Suegrallanwan kakuq runaqa, ñakasqayá kachun! nispanku. Hinaptinmi llapa runakunañataq ninqaku: ¡Amén! nispanku.

²⁴ ¡Runamasinta mana pipa rikusqanta wañurachiq runaqa ñakasqayá kachun! nispanku. Hinaptinmi llapa runakunañataq ninqaku: ¡Amén! nispanku.

²⁵ ¡Mana huchayuq runata wañurachinanpaq qollqe chaskikuq runaqa ñakasqayá kachun! nispanku. Hinaptinmi llapa runakunañataq ninqaku: ¡Amén! nispanku.

²⁶ ¡Kay yachachikuykunata mana kasukuq, mana ruwayman churaq runaqa ñakasqayá kachun! nispanku. Hinaptinmi llapa runakunañataq ninqaku: ¡Amén! nispanku.