Deuteronomio 26 - CHUYA QELLQA La Biblia en Quechua de Ayacucho 2012

Primiciakunamanta

¹ Señornikichik Tayta Diospa qosunaykichik allpaman yaykuspa chaypiña yachaspaykichikqa,

² chay allpapi tarpusqaykichikpa punta rurunkunatam Señornikichik Tayta Diospa santuarionman canastapi apankichik.

³ Chaypim servikuq sacerdoteman asuykuspa ninkichik: “Señorniki Tayta Diospa qayllanpim kunan niki ñawpaq taytanchikkunaman prometesqan allpapiñam kachkani”, nispa.

⁴ Sacerdoteñataqmi canastata chaskiykususpaykichik Señornikichik Tayta Diospa altarninpa ñawpaqninman churanqa.

⁵ Qamkunañataqmi Tayta Diospa qayllanpi ninkichik: “Ñawpaq taytaykuqa karqaku Aram lawmanta kaq as runakunallam. Paykunam mana allpayuq hina purispanku Egipto nacionman ripukurqaku, hinaspam atiyniyuq llaqta chaynataq achka runayuq kanankukama mirarurqaku.

⁶ Egipto nacionniyuq runakunam ichaqa maqawaspanchik ñakarichiwarqanchik, mana llakipayarispam servichikuwarqanchik.

⁷ Chaymi Tayta Diosta, ñawpaq taytanchikkunapa Diosninta mañakuptinchik uyariykuwarqanchik, hatun llakikuypi kasqanchiktapas, tukuy imapi llamkasqanchiktawan ñakarichiwasqanchiktapas qawarqam.

⁸ Chaymi hatun atiyninwan, manchakuypaq señalkunawan chaynataq admirakuypaq milagrokunawan Egiptomanta hurqomuwarqanchik,

⁹ hinaspam kayman pusamuwaspanchik tukuy imapapas kanan chaynataq tukuy imapapas qespinan allpata qoykuwanchik.

¹⁰ Chayraykum kunan Tayta Diospa qowasqan allpapa punta rurunkunata apamuni”, nispa. Hinaspam Señornikichik Tayta Diospa qayllanpi canastata churaykuspa qonqorakunkichik.

¹¹ Chaymantam Señornikichik Tayta Diospa tukuy allinkuna qosusqaykichikmanta aylluykichikkunapiwan fiestata ruwankichik. Qamkunawan yachaq levitakunapas chaynataq huklaw llaqtayuqkunapas qamkunawan kuskam kusikunqaku.

Diezmokunamanta

¹² Sapa kimsa watamantam lliw cosechasqaykimanta diezmoykita rakispa, Leví castakunaman, qamkunawan yachaq huklaw llaqtayuqkunaman, mana tayta-mamayuqkunaman chaynataq viudakunaman qonki; chaynapim llaqtaykipi saksanankukama mikunqaku.

¹³ Chaykunata qospaykim Señorniki Tayta Diospa qayllanpi ninki: “Cosechasqaykunamanta sapaqchas-qay diezmoykunatam wasiymanta hurqospay, levitakunaman, llaqtaypi yachaq huklaw llaqtayuqkunaman, mana tayta-mamayuqkunaman chay-nataq viudakunaman aypurqani; chaynatam kamachiwasqaykita ruwarqani, mana qonqaspaymi kasukurqani.

¹⁴ Sapaqchasqay diezmokunamantaqa, ima llakipiña kaspaypas chaynataq qanman mana asuykamunaypaq hina kaspaypas manam mikukurqanichu, manataqmi wañuqkunamanpas ofrecerqanichu. Yupaychasqay Dios Taytalláy, tukuy kamachiwasqaykita kasukuspaymi ruwarqani.

¹⁵ Yachasqayki hanaq pachamanta qawarimuspaykiyá, Israelpa mirayninkunatawan qowasqaykiku tukuy imapa kasqan chaynataq tukuy imapa qespinan allpata bendeciykuy, ñawpaq taytaykuman prometesqaykiman hina”, nispa.

Israelpa mirayninkuna Tayta Diospaq sapaqchasqa kasqankumanta

¹⁶ Señorniki Tayta Diosmi kunan kamachisunki kay kamachikuykunatawan kay yachachikuykunata ruwayman churanaykipaq. Chaynaqa, tukuy sonqoykiwan hinaspa tukuy yuyaynikiwanyá kasukuy.

¹⁷ Kunanmi Tayta Diosqa Diosniki kasqanta nirunki. Prometekurunkitaqmi paypa munasqanman hina kawsaspa yachachikuyninkunata, kamachikuyninkunata hinaspa decretonkunata wiñaypaq kasukuspa ruwanaykipaqpas.

¹⁸ Israel llaqta, kunanmi Tayta Dios nisunkichik qamkunaqa llaq-tanña kasqaykichikta, imaynam prometekusqanman hina, chaynaqa, tukuy kamachikuyninkunatayá kasukuychik.

¹⁹ Paymi wakin nacionkuna hatarichisqanmantapas ancha reqsisqata chaynataq allin qawasqata ruwasunkichik. Chaymi Señornikichik Tayta Diospa nisqanpi hina payllapaqña sapaqchasqa kankichik.