Deuteronomio 19 - CHUYA QELLQA La Biblia en Quechua de Ayacucho 2012

Amparakunanku llaqtakunamanta

¹ Señorninchik Tayta Diosmi nacionkunata chinkachispan allpankuta qamkunaman qosunkichik, chaynapi llaqtankunapipas chaynataq wasinkunapipas yachanaykichikpaq.

² Hinaptinqa Señorninchik Tayta Diospa qosusqaykichik allpapim kimsa llaqtakunata akllankichik,

³ hinaspam chay llaqtakunaman riq ñankunatapas alli-chankichik. Chaypaqmi chay allpaykichikta kimsaman partenkichik, chaynapi runamasin wañurachiq runa mayqannin llaqtamanpas lluptikunanpaq.

⁴ Pipas runamasinta wañurachiq runam chay llaqtaman lluptikuspan vidanta libranqa, ichaqa qawachinqam runamasinta qonqaymanta wañurachisqanta hinaspa ñawpaqmantapas mana cheqnikusqanta.

⁵ Ichapas kayna kanman: Pipas runamasinwan monteta yantaman rinman, hinaptinñataq hachawan waqtachkaptin cabonmanta hacha lloqsiruspan chay runata wañurachinman hinaptinqa wañurachiqmi chay hukkaqnin llaqtaman ayqekunqa, chaynapim mana wañunqachu.

⁶ Yanqañataq ancha karupi chay llaqta kasqanrayku wañuqpa ayllun chay wañuchiqta vengakunanpaq piñakuywan qatispan wañurachinman, chay wañuchiq runa inocente kachkaptinpas otaq mana cheqnichkaspan qonqaymanta wañurachiptinpas.

⁷ Chayraykum kamachikichik kimsa llaqtakunata sapaqchanaykichikpaq.

⁸ Ñawpaq taytaykichikkunaman prometesqanman hina allpaykichikta Señornikichik Tayta Dios hatunyachispan lliw allpata qoykusuptikichikqa,

⁹ chay kimsa llaqtakunamanmi kimsa amparakuna llaqtakunatawan yapankichik. Kunan willasqay kamachikuykunata kasukuptikichikqa hinaspa sapa punchaw payta kuyaspa kamachisqanman hina kawsaptikichikqa Señornikichik Tayta Diosmi allpaykichikta hatunyachinqa.

¹⁰ Chaynapim Señornikichik Tayta Diospa qosunaykichik allpapi mana huchayuq runakunataqa mana wañuchinkichikchu, chaynataqmi wañuq-kunamantapas mana huchayuq kankichik.

¹¹ Sichum pipas runamasinta cheqnisqanrayku qatispan traicionmanta wañurachispan amparakuna hukkaqnin llaqtaman ayqeptinqa,

¹² chay wañuchiqpa llaqtanpi ancianokunam hapirachimuspanku wañuqpa ayllunman hapiykachinqaku, hinaptinmi wañurachinqaku.

¹³ Chayna runataqa ama llakipayaspam wañuchinkichik, chaynapim Israel nacionpi inocente runa mana wañuchisqachu kanqa. Chaynata ruwaptikichikqa ima ruwasqaykichikpas allinmi lloqsisunkichik.

¹⁴ Señornikichik Tayta Diospa qosunaykichik allpapi yachaspaqa, amam runamasikichikpa allpanpa linderonkunataqa asuchinkichikchu. Chay linderokunaqa ñawpaq taytaykichikkunapa churasqanku hinallam kanqa.

Llulla rimaq testigokunamanta

¹⁵ Chullalla testigopa declarasqanwanqa amam pitapas mana allin ruwasqanmanta otaq huchallikusqanmantapas acusanqakuchu, aswanqa iskay otaq kimsa testigokuna declaraptillanmi.

¹⁶ Pipas runamasinta cheqnikuspan imamantapas yanqamanta acusaptinqa,

¹⁷ chay iskaynin quejanakuqkunam Tayta Diospa qayllanmanwan sacerdotekunapa chaynataq chay tiempopi juezkunapa qayllanman asuykunqaku.

¹⁸ Juezkunañataqmi allin-ta qatipaykunqaku; sichum chay testigopa rimasqan yanqa kaptinqa

¹⁹ chay runamasinpa contranpi mañakusqan castigowanmi castigasqa kanqa. Chaynata ruwaspam qamkunamanta mana allin ruwaqta chinkachinkichik.

²⁰ Chayta yachaspankum wakin runakunapas manchakunqaku, hinaspam manaña chay mana allinkunata ruwanqakuchu.

²¹ Amam llakipayankichu, payqa paganqapunim: Vidamantam vidanwan, ñawimantam ñawinwan, kirumantam kirunwan, makimantam makinwan, chakimantam chakinwan.