Deuteronomio 18 - CHUYA QELLQA La Biblia en Quechua de Ayacucho 2012

Leví ayllu sacerdotekunamanta

¹ Leví ayllumanta kaq sacerdotekunaqa otaq levitakunaqa manam wakin Israel ayllukunawan kuskaqa allpata chaskinqakuchu. Paykunaqa kawsanqaku Tayta Diospaq sacrificiokunamanta hinaspa ofrendakunamantam.

² Wakin ayllukuna hina allpata mana chaskiptinkupas Tayta Diosmi paykunapa herencianqa, chaynatam kikin Tayta Dios nirqa.

³ Runakunam sacerdotekunaman torokunata, carnerokunata apamunqaku, chaynapi sacerdotekuna Tayta Diosman ofrecenankupaq. Chay ofrecesqankumantam sacerdotekunapaq kanqa: Brazon, kakichun, wiksan;

⁴ chaynataq trigopa punta rurunkuna, punta sarusqaykichik vino, punta ruwasqaykichik aceite, ovejaykichikmanta punta rutusqaykichik millwanpas.

⁵ Aylluykikuna ukumantam payta, chaynataq mirayninkunata Señornikichik Tayta Dios akllarqa, payllataña sapa punchaw servinankupaq.

⁶ Sichum hukkaqnin levita Israel nacionpi hukkaqnin llaqtapi yachasqanmanta Tayta Diospa akllasqan sitioman rinman hinaspaqa,

⁷ chaypi kaq sacerdotekuna hinam paypas Señornikichik Tayta Diospa qayllanpi servikunqa,

⁸ hinaspam mikuytapas chaypi kaq sacerdotekuna hina chaskinqa. Taytanmanta chaskisqanqa sapaqmi.

Idolokuna yupaychaqkunata ama qatipakunankumanta

⁹ Señornikichik Tayta Diospa qosunaykichik allpaman yaykuspaqa, amam chaypi runakunapa millakuypaq mana allinkuna ruwayninkutaqa qatipakunkichikchu.

¹⁰ Yanqañataq churikichikta kañaspa sacrificawaqchik. Qamkuna ukupiqa amam kanqachu qatipaqkunapas, qawaqkunapas, layqakunapas,

¹¹ mesa mastaqkunapas, wañuqpa almanta qayaqkunapas, espiritistakunapas.

¹² Chaykuna ruwaqtaqa Tayta Diosmi millakun. Chay nacionkunataqa chayna millakuypaq kaqkunata ruwasqankuraykum qayllaykichikmanta Señornikichik Tayta Dios wischunqa.

¹³ Qamkunaqa Señornikichik Tayta Diospa munasqanman hinam kawsankichik.

¹⁴ Qamkunamanña qosus-qaykichik allpapi runakunaqa layqakunatawan qatipaqkunatam kasukunku. Qamkunatam ichaqa Señornikichik Tayta Dios mana munanchu chaykuna ruwanaykichikta.

Huk profetata Tayta Dios hatarichinanmanta

¹⁵ Señornikichik Tayta Diosmi qamkunamanta ñoqa hina profetata hata-richinqa, hinaptinmi payta kasunkichik.

¹⁶ Kaytam Horeb orqopi hu-ñunakuptinchik mañakuspa nirqankichik: “Señornikichik Tayta Diospa rimasqantaqa amañayá huktawanqa uyarisaqkuñachu, nitaq ninapa hatun rupariynintapas rikusaqkuñachu, chaynapi mana wañurunaykupaq”, nispaykichik.

¹⁷ Chaymi Tayta Dios niwarqa: “Allinmi chay rimasqankuqa.

¹⁸ Israel miraykunamantam qam hina profetata hatarichispay rimapayasaq, hinaptinmi payña tukuy kamachisqaykunata willasunkichik.

¹⁹ Pipas chay profetapa sutiypi rimasqanta mana kasukuqtaqa cuentatam mañasaq.

²⁰ Pipas profeta tukuspa mana kamachichkaptiy sutiypi rimaqtaqa otaq idolokunapa sutinpi rimaqtaqa, wañuchinkichikpunim”, nispa.

²¹ Ichapas sonqoykichikpi niwaqchik: “Chaynaqa, ¿imaynatataq yacha-saqku chay runapa willakusqanqa Tayta Diospa palabran kasqanta otaq mana kasqantapas?” nispa.

²² Sichum Tayta Diospa sutinpi profetapa rimasqan mana cumplikuptinqa manam Tayta Diospa nisqanchu. Chay profetaqa kikillanmantam hatun tukuspa rimarqa. Paytaqa amam manchakunkichikchu.