Deuteronomio 16 - CHUYA QELLQA La Biblia en Quechua de Ayacucho 2012

Sapa wata ruwananku fiestakunamanta

¹ Abib killapim Señornikichik Tayta Diospaq Pascua fiestata ruwankichik. Paymi chay killapi huk tuta Egipto nacionmanta hurqomusurqankichik.

² Chay fiestapim vacakunatawan ovejakunata wañuchispa Señornikichik Tayta Diosman ofrecenkichik. Paypa akllasqan sitiopim chaytaqa ruwankichik.

³ Wañuchipusqaykichik animalpa aychantaqa mana levadurayuq tantayuqtam mikunkichik. Egipto nacionmanta utqayllamanña lloqsimusqaykichikta yuyarispam qanchisnintin punchaw mana levadurayuq llakikuy tantata mikunkichik, chaynapim Egiptomanta lloqsimusqaykichikta kawsanaykichik punchawkama yuyarinkichik.

⁴ Chay qanchisnintin punchawmi lliw nacionnikichikpi levadura ama kanqachu. Qallariy punchaw tardeykuyta wañu-chipusqaykichik animalpa aychantaqa amam paqarinnintin punchawkamaqa puchunkichikchu.

⁵ Señornikichik Tayta Diospa qosusqaykichik llaqtapiqa amam kaypi chaypiqa Pascuapi wañuchipunaykichik animaltaqa ofrecenkichikchu,

⁶ ofrecenkichikqa Señornikichik Tayta Diospa akllasqan sitiollapim. Chay animaltaqa Egipto nacionmanta lloqsimusqaykichik punchawpi hinam tardeykuytaña ofrecenkichik.

⁷ Chay aychataqa kankasqatam Señornikichik Tayta Diospa akllasqan sitiopi mikunkichik. Paqarinnintin punchawñataqmi wasikichikman kuti-kunkichik.

⁸ Soqta punchawmi mana levadurayuq tantata mikunkichik. Qanchis kaq punchawpiñataqmi hatun fiestata ruwaspa Señornikichik Tayta Diosta yupaychankichik. Chay punchawpiqa amam pipas llamkanqachu.

⁹ Trigo rutuy qallarisqaykichik punchawmanta qanchis semana pasaruptinmi

¹⁰ Semanakuna sutiyuq hatun fiestata ruwaspa Señornikichik Tayta Diosta yupaychankichik. Chay fiestapim kikikichikmanta qosqaykichik ofrendaykichikta Señornikichik Tayta Diosman tukuy imapi bendecisusqaykichikmanta ofrecenkichik.

¹¹ Señornikichik Tayta Diospa qayllanpim hatun fiestata ruwaspa churikichikkunawan, criadoykichikkunawan, criadaykichikkunawan, llaqtaykichikpi yachaq levitakunawan, huklaw llaqtayuqkunawan, mana tayta-mamayuqkunawan hinaspa viudakunawan kuska kusikunkichik. Chaytaqa Señornikichik Tayta Diospa akllasqan sitiopim ruwankichik.

¹² Egipto nacionpi esclavo kasqaykichikta yuyarispam kay kamachikuykunata kasukunkichik.

¹³ Trigo cosechatawan uvas saruyta tukuruspañataqmi Ramada fiestata qanchis punchaw ruwankichik.

¹⁴ Chay fiestapim churikichikkunawan, serviqnikichikkunawan, llaqtaykichikpi yachaq levitakunawan, huklaw llaqtayuqkunawan, mana tayta-mamayuqkunawan chaynataq viudakunawan kuska kusikunkichik.

¹⁵ Chay fiestataqa qanchis punchawmi Señornikichik Tayta Diospaq ruwankichik, paypa akllasqan sitiopi. Paymi cosechaykichikpi chaynataq tukuy ima ruwaynikichikpipas bendecisunkichik, chaynapi cheqapta kusikunaykichikpaq.

¹⁶ Sapa watam llapallan qarikuna kimsa kutita Señornikichik Tayta Diospa qayllanman otaq paypa akllasqan sitioman rinqaku. Chaynataqa ruwanqaku mana levadurayuq Tanta fiestapi, Semanakuna fiestapi chaynataq Ramada fiestapim. Amam pipas mana imatapas apaspaqa Tayta Diosmanqa rinqachu.

¹⁷ Señornikichik Tayta Diospa bendecisqanman hinam ofrendankuta sapakama apanqaku.

Juezkuna allinta arreglanankumanta

¹⁸ Señornikichik Tayta Diospa sapa aylluman qosunaykichik llaqtakunapim juezkunatawan kamachikuqkunata churankichik, chaynapi runakunapa quejanta arreglanankupaq.

¹⁹ Allin arreglo ruwaytaqa amam qewirunkichikchu. Wakin runakunallamanqa amataqmi imaraykupas sayapakunkichikchu. Juez kaspaykichikqa amam sobornotaqa chaskikunkichikchu. Sobornoqa yachayniyuqkunatapas ñawsayachinmi, pantachintaqmi allin ruwaqkunapa rimaynintapas.

²⁰ Allin arregloman hinallam haykapipas ruwankichik, chaynapi mana wañuruspa Señornikichik Tayta Diospa qosunaykichik allpapi yachanaykichikpaq.

²¹ Señornikichik Tayta Diospa altarninpa waqtanpiqa amam ima sachatapas Asera idolopaqqa plantankichikchu.

²² Amataqmi rumimanta idolokunatapas sayachinkichikchu. Chaykunataqa Señornikichik Tayta Diosmi millakun.