Deuteronomio 1 - CHUYA QELLQA La Biblia en Quechua de Ayacucho 2012

Libropa qallariyninmanta

¹ Kaykunatam Israelpa mirayninkunaman Moisés rimarirqa Jordán mayupa waklawnin intipa qespimunan law chunniqpi, Puka lamar qochapa hanaynin Arabá lawpi chaynataq Parán, Tofel, Labán, Hazerot hinaspa Dizahab llaqtakunapa chawpinpi kachkaptinku.

² Horeb orqomanta Cades-barnea lawkamaqa chunka hukniyuq punchaw puriymi kachkan, chay llaqtaman chayanapaqqa Seir orqontam rina.

³ Egipto nacionmanta lloqsimusqankumantam, tawa chunka watapa chunka hukniyuq killapa punta kaq punchawninpi Israelpa mirayninkunaman Moisés willarqa Tayta Diospa kamachisqanman hina.

⁴ Chaykunataqa willarqa amorreokunapa reynin Hesbón llaqtayuq Sehonta chaynataq Basán nacionpa reynin Ogta venceruspanñam. Rey Ogqa Edrei llaqtapiwan Astarot llaqtapim munaychakurqa.

⁵ Jordán mayupa waklawnin moabitakunapa allpanpi kachkaptinkum, kay yachachikuykunata Israelpa mirayninkunaman Moisés yachachirqa:

⁶ Señorninchik Tayta Diosmi Horeb orqopi rimapayawaspanchik kaynata niwarqanchik: “Qamkunaqa unayñam kay orqopi karunkichik.

⁷ Chaynaqa, muyurispa riychik amorreokunapa yachanan orqokunaman, Arabá lawkunaman, orqokunaman, qechwakunaman, Neguev lawman, lamar qocha lawman, cananeokunapa yachanan lawman, Líbano lawman hinaspa Eufrates hatun mayuman chayanaykichikkama.

⁸ Ñoqam qoykichik chay allpata, chaynapi yaykuptikichik qamkunapaña kananpaq. Ñoqa Tayta Diosmi chay allpata ñawpaq taytaykichik Abrahamman, Isaacman, Jacobman chaynataq mirayninkunaman qonaypaq juraspay prometekurqani”, nispa.

Kamachikuqkuna akllasqankumanta

⁹ Chay tiempopim kaynata nirqaykichik: “Qamkuna nanachikuytaqa manam sapallayqa atiymanchu.

¹⁰ Señornikichik Tayta Diosmi llumpayta mirarachisunkichik, chaymi kunanqa cielopi chaskakuna hinaña kachkankichik.

¹¹ Ñawpaq taytanchikkunapa yupaychasqan Tayta Diosyá kunan kasqaykichikmantapas waranqa kutitawanraq mirachisunkichik, hinaspayá prometewasqanchikman hina bendecisunkichik.

¹² Chaywanpas manam sapallayqa atiymanchu sasachakuynikichik, quejanakuynikichik hinaspa atipanakuynikichik allichaytaqa.

¹³ Chaynaqa, sapa ayllumantayá allin yachayniyuq allin yuyayniyuq chaynataq ancha reqsisqa runakunata akllaychik, chaynapi kamachiqnikichikta churanaypaq”, nispa.

¹⁴ Hinaptinmi qamkunañataq niwarqankichik: “Chay niwasqaykikuqa allinpunim”, nispaykichik.

¹⁵ Chaymi sapa ayllumanta allin yachayniyuq chaynataq allin experienciayuq runakunata akllarqani, hinaspaymi kamachiqnikichik kananpaq churarqani, chaynapi waranqa runakunata, pachak runakunata, pichqa chunka runakunata, chunka runakunata kamachinankupaq. Wakintañataqmi sapa aylluta kamachinanpaq churarqani.

¹⁶ Juezkunatapas kaynatam kamachirqani: Llapallankuta uyarispaykichikmi, Israelpa mirayninkuna kaptinpas otaq huklaw llaqtayuqkuna kaptinpas allinta arreglankichik.

¹⁷ Juzgaspaqa amam pimanpas sayapakunkichikchu. Ama manchakuspam wakchatapas aputapas, atiyniyuqta mana atiyniyuqtapas uyarinkichik. Allin arregloqa Tayta Diosmantam hamun. Mana arreglay atisqaykichikkunatam ichaqa arreglanaypaq ñoqaman apamuwankichik, nispa.

¹⁸ Tukuy imapas ruwanaykichiktaqa chay tiempopim sumaqta yachachirqaykichik.

Canaán allpata qawamuq runakunamanta

¹⁹ Señorninchik Tayta Diospa kamachiwasqanchikman hinam Horebmanta lloqsimuspa amorreokunapa orqonman rirqanchik, hinaspam rikumusqaykichikpi hinapas chay manchakuypaq chunniqninta hamuspa Cades-barnea lawman chayamurqanchik.

²⁰ Chaypim nirqaykichik: “Señorninchik Tayta Diospa qowananchik amorreokunapa yachanan orqokunamanmi chayaramunchik.

²¹ Señornikichik Tayta Diosmi kay allpata qoykusunkichik, chaynaqa ñawpaq taytanchikkunapa yupaychasqan Tayta Diospa nisqanman hinayá rispaykichik hapimuychik. Amayá manchakuychikchu nitaq hukmanyaychikchu”, nispa.

²² Hinaptinmi hamuspa niwarqankichik: “Allinmi, ichaqa qawamuqkunatayá puntata kacharusun, chaynapi allinta qawamunankupaq. Paykunachiki kutimuspa willawasun maynin rinanchiktapas chaynataq maylaw llaqtakunamanmi yaykunanchiktapas”, nispaykichik.

²³ Chay niwasqaykichik allinpaq rikchakapuwaptinmi, qamkunamanta chunka iskayniyuq runakunata, sapa ayllumanta hukta akllarqani.

²⁴ Paykunam orqonta rispanku Escol wayqokama chayarurqaku. Chaymanta pasaspankum lliw allpata qawamurqaku.

²⁵ Qawamuspam chay allpapa rurunkunatapas apamurqaku, hinaspam kaynata willawarqanchik: “Señorninchik Tayta Diospa qowananchik allpaqa allinmi kasqa”, nispanku.

²⁶ Ichaqa mana riyta munaspaykichikmi Señornikichik Tayta Diospa kamachisqanta mana kasukurqankichikchu.

²⁷ Hinaspam carpaykichik ukupi kaynata rimapakurqankichik: Tayta Diosqa cheqniwaspanchikmi Egipto nacionmanta hurqomuwarqanchik amorreokunaman qoykuwaptinchik tukuruwananchikpaq.

²⁸ Kunanqa, ¿maymantaq risunchik? Chay allpata qawamuq llaqtamasinchikkunam kaynata willakuspa sonqonchikta hukmanyarachin: Chay allpapiqa ñoqanchikmantapas aswan kallpasapa hatunkaray runakunam kasqaku, llaqtakunapa murallankunapas alto-altom kasqa. Hatunkaray Anacpa mirayninkunatapas rikuramunikum, nispanku. “Chay willakuymi pasaypaqta hukmanyarachiwanchik”, nispaykichik.

²⁹ Chaymi nirqaykichik: “Ama hukmanyaychikchu, nitaq paykunataqa manchakuychikchu.

^30-31 Ñawpaqninchik riq Señornikichik Tayta Diosmi ñoqan-chikpaq peleanqa, payqa imatapas ruwanqa Egipto nacionpi chaynataq chunniqpipas ruwasqanman hinam. Chayamunaykichikkamam tukuy chunniq ñankuna hamusqaykichikpi rikurqankichik, imaynam churinta taytan marqayninpi apamuchkaq hina Señornikichik Tayta Diospas marqayninpi apamususqaykichikta”, nispa.

³² Chaywanpas Señornikichik Tayta Diospiqa manam hapipakurqankichikchu.

³³ Payqa ñawpaqnikichiktam rirqa maypim samanaykichikta maskastin. Tutanmi mayninta rinaykichikpaq ninawan achkirqa, punchawñataqmi puyuwan.

Israelpaq Tayta Dios piñakusqanmanta

³⁴ Tayta Diosmi tukuy rimapakusqaykichikta uyariruspa piñakururqa, chaymi juraspan nirqa:

³⁵ “Kay mana allin miraykunaqa manam mayqanninkupas ñawpaq taytankuman juraspay qonay sumaq allpataqa rikunqachu.

³⁶ Jefonepa churin Calebmi ichaqa yaykunqa, chaymi payman chaynataq mirayninkunaman chay qawamusqan allpata qosaq. Payqa yaykunqa ñoqa Tayta Diosta tukuy sonqonwan qatiwasqanraykum”, nispa.

³⁷ Qamkunapa huchaykichikmantam ñoqapaqpas Tayta Dios piñakuspa niwarqa: Chay allpamanqa manam qampas yaykunkichu.

³⁸ Nunpa churin yanapaqniki Josueymi ichaqa qampa rantikipi yaykunqa, chaynaqa paytayá kallpanchay, paymi chay allpata Israelpa mirayninkunaman qonqa.

³⁹ Qamkunam nirqankichik: “Kay wawa-churikichikkunataqa enemigonchikmi qechuruwasunchik”, nispa. Aswanqa chay mana imapas yachaq warmakunam chay allpamanqa yaykunqaku. Paykunaman qoptiymi chay allpaqa paykunapaña kanqa.

⁴⁰ Qamkunaqa chunniq lawman muyurispayá kasqallan Puka lamar qocha lawman riychik, nispa.

Mana kasukusqankurayku vencerachikusqankumanta

⁴¹ Hinaptinmi qamkuna niwarqankichik: “Diospa contranpim huchallikuruniku, ñoqaykuqa rispaykum peleamusaqku Señorninchik Tayta Diospa kamachiwasqanchikman hina”, nispaykichik. Chaynapim guerrapi peleamunaykichikpaq armaykichikta sapakama hapispa orqokunaman riyta munarqankichik.

⁴² Hinaptinmi qamkunaman ninaypaq Tayta Dios niwarqa: “Ama guerramanqa richunkuchu, ñoqaqa manam qamkunawanñachu kachkani, chaynapi enemigoykichikpa vencesqan mana kanaykichikpaq”, nispa.

⁴³ Chaynata willachkaptiypas mana kasuwaspaykichikmi Tayta Diospa kamachisqanpa contranpi hoqarikurqankichik, hinaspam qari tukuspa chay orqoman rirqankichik.

⁴⁴ Ichaqa chay orqopi yachaq amorreokunam lloqsiramuspanku Seir orqopi vencerusurqankichik, hinaspam Horma llaqtakama wayliskuna hinaraq qatisurqankichik.

⁴⁵ Chaymi kutiramuspa Tayta Diospa qayllanpi waqarqankichik, ichaqa manam uyarisurqankichikchu, nitaqmi kaqpaqpas hapisurqankichikchu.

⁴⁶ Chaynapim Cades lawpi unay yacharqankichik.