Daniel 4 - CHUYA QELLQA La Biblia en Quechua de Ayacucho 2012

Rey Nabucodonosorpa locoyarusqanmanta

¹ Ñoqa rey Nabucodonosormi kay pachapi llapallan runakunaman, lliw nacionkunaman, tukuy rikchaq rimayniyuqkunaman qellqamuykichik: Hawkayay qamkunapi kachun.

² Ñoqam munachkani, tukuy imapa hawanpi munaychakuq Diospa admirakuypaq milagrokuna ruwapuwasqanmanta willaykuyta.

³ ¡Mayna allinmi paypa milagronkunaqa! ¡Hatu-hatunmi admirakuypaq ruwasqankunaqa! Munaychakuyninpas wiña-wiñaypaqmi takyan, payqa runakunapa mirayninpim munaychakun.

⁴ Ñoqa Nabucodonosormi palacioypi kusisqa hawkallaña kakuchkarqani.

⁵ Ichaqa camaypi puñuykuspaymi mancharikuypaqta mosqokururqani, chaymi pensamientopa intusqan hukmanyarurqani.

⁶ Chayraykum kamachikurqani Babilonia nacionpi llapallan yachayniyuq runakuna qayllayman hamunankupaq, chaynapi mosqorusqaypa imam ninanta willawanankupaq.

⁷ Chaymi hamurqaku layqakuna, qawaqkuna, Caldea lawpi yachayniyuqkuna hinaspa qatipaqkuna-pas. Paykunamanmi imam mosqorus-qayta willarqani, ichaqa manam chay mosqoypa imam ninan willawayta atirqakuchu.

⁸ Hamurqataqmi diosniypa sutinwan sutichasqa Beltsasar sutiyuq Danielpas, paypiqa chuya dioskunapa espiritunmi kawsakuchkan, paymanmi mosqorusqayta willarqani kaynata:

⁹ Yachayniyuqkunapa kamachiqnin Beltsasar, yachanim ñoqaqa chuya dioskunapa espiritun qampi kasqanta, yachanitaqmi pakasqa kaqkunatapas lliwta musyasqaykita, chaynaqa mosqorusqayta uyariykuspa imam ninanta willaykuway.

¹⁰ Waqtapachkaspaymi kay visionta rikurqani: Kay pachapa chawpinpim hatu-hatun sacha kachkasqa.

¹¹ Chay sacham wiñasqanman hina llumpayllataña rakuyarurqa, puntanpas cielokunakamam chayarurqa. Tukuy hinastinmantam rikukurqa.

¹² Mayna sumaqmi llaqenkunapas kasqa, rurunkunapas llumpaymi kasqa, chaypiqa llapallanpaqmi mikuykunapas kasqa. Purun animalkunapas ukunpim llantukusqaku, alton pawaq animalkunapas kallmankunapim qesachakusqaku, llapallan kawsaqkunapas chayllawanmi kawsasqaku.

¹³ Chayna camaypi waqtapaykuspa mosqokuchkaspaymi qonqayta rikururqani hanaq pachamanta huk ángel uraykamuchkaqta.

¹⁴ Paymi kallpawan qaparispan nirqa: Chay sachata kuchuruychik, kallmankunatapas qoruruychik, rapinkunatapas chutaparuychik, rurunkunatapas cheqerachiychik, llantuyninpi kaq purun animalkunapas ayqekuchunku, kallmanpi kaq alton pawaq animalkunapas pawakuchunku.

¹⁵ Ichaqa kulluntawan sapinta hina pampallapi saqeruychik, fierro cadenawan bronce cadenawan wataruychik, purun pasto ukupi saqeruychik, chaypi sulla nuyuchun, purun animalkunawan kuska pastota mikuchun.

¹⁶ Paypa yuyaynin tikrakuruchun, animal hinaña rikurichun, qanchis watapuni chayna kachun, nispa.

¹⁷ Kay sentenciataqa angelkunam qomurqaku, angelkunam chaynata tantearqaku, chaynapi llapa runakunapa kamachikuyninpiqa tukuy imapa hawanpi kaq Dioslla munaychakuq kasqanta yachanankupaq, chay kamachikuytaqa paymi munasqanman hina pimanpas qon, humilde runatapas huk nacionpa kamachiqnin kananpaqmi churan.

¹⁸ “Ñoqa rey Nabucodonosormi chaynata mosqokurqani, chaynaqa Beltsasar, qamyá chay mosqoyniypa imam ninanta niykuway. Kay munaychakuyniypi kaq yachayniyuq runakunaqa manam willawayta atinkuchu, qanmi ichaqa willaykuwankiman, qampiqa chuya dioskunapa espiritunmi kachkan”, nispa.

¹⁹ Chaymi Beltsasar sutiyuq Danielqa mancharikuspan yaqa huk horata hina pensamientonpa intusqan rikurirurqa. Ñoqa reyñataqmi nirqani: “Beltsasar, imam mosqorusqaywanqa chaynataq imam ninanwanpas ama mancharikuychu”, nispay. Chaymi Beltsasarñataq niwarqa: Señorlláy, imam mosqorusqaykiqa kachun cheqnisuqniki runakunapaqyá, imam ninanpas enemigoykikunapaqyá kachun.

²⁰ Qanmi rikurqanki hatu-hatun raku sachata, puntanpas cielokunakama chayaqta, chaymi tukuy hinastinmanta rikupasllaña karqa.

²¹ Chay sachapaqa llaqenkunapas sumaqllañam karqa, rurunkunapas llapallanku mikunankupaqmi achkallaña karqa, purun animalkunam chay sachapa ukunpi llantukurqaku, kallmankunapipas alton pawaq animalkunam qesachakurqaku.

²² Reynilláy, chay sachaqa qanmi kanki, wiñaruspam llumpay atiyniyuq rikurirunki, ancha reqsisqa kaynikipas cielokamam chayan, munaychakuynikipas tukuy hinastinmanmi mastarikurun.

²³ Reynilláy, qamqa rikurqankitaqmi huk ángel hanaq pachamanta uraykamuspan: “Chay sachata kuchuruspa chinkarachiychik, kulluntañataq sapintinta hina allpapi saqeruychik, fierro cadenawan bronce cadenawan hinallapi wataruychik hinaspa purun pasto ukupi saqeruychik. Paytaqa sulla nuyuchun, qanchis watapuni purun animalkunawan pastota mikuchun”, niqtapas.

²⁴ Chaynaqa reynilláy, musqokusqaykipa imam ninanqa kaymi: Tukuy imapa hawanpi Diosmi contraykipi decretaspa sentenciarun.

²⁵ Reynilláy, runakuna ukumanta wischusqa kaspam purun animalkunawanña kawsanki, torokuna hinam pastotaña mikunki, sullapas nuyusunkim. Qanchis watapunim chayna kawsanki, chaymantañam qamqa reqsikunki, tukuy imapa hawanpi munaychakuq Diosqa llapallan runakunapa kamachikuyninpi munaychakuq kasqanta, kamachikuq kananpaqqa paymi munasqanman hina pitapas churan.

²⁶ Reynilláy, qamqa uyarirqankitaqmi sapiyuq kulluntaqa hina allpallapi saqenankumanta, chaypa imam ninanqa kaymi: Tayta Dios kay pachapi munaychakusqanta reqsikuptikiñam kamachikuynikitaqa kutiykachisunki.

²⁷ Chaynaqa reynilláy, kay consejasqayta uyariykuway: Ama huchallikuspa allin kaqkunataña ruway, mana allinta amaña ruwaspa wakchakunamanta llakipayarikuy, ichapas qamqa hina hawkalla unayta kawsakuwaq, nispa.

Mosqoynin cumplikurusqanmanta

²⁸ Rey Nabucodonosorman willas-qanman hinam cumplikururqa.

²⁹ Huk watamantañam Babilonia nacionpi palacionpa altosninpi purichkaspan

³⁰ nirqa: “¡Mayna hatunmi kay Babilonia llaqtaqa! Ñoqapunim hatun atiyniywan kay llaqtataqa munaychakuyniypa chawpin kananpaq hatarichirqani, chaynapi ancha reqsisqa kasqaymanta alabakunaypaq”, nispa.

³¹ Chay rimasqanta manaraqpas tukuykuchkaptinmi hanaq pachamanta kaynata rimapayamurqa: “Rey Nabuco-donosor, contraykipim huk decreto kachkan. Munaychakuynikim qanmanta qechusqaña;

³² runakuna ukumanta wischusqa kaspam purun animalkunawanña kawsanki, torokuna hina pastota mikuspam qanchis watapuni kawsanki, chaymantañam reqsikunki tukuy imapa hawanpi munaychakuq Diosqa llapallan runakunapa kamachikuyninpi munaychakusqanta, payqa chay kamachikuytaqa munasqanmanmi pimanpas qon”, nispa.

³³ Chay ratollapim Nabucodonosorpa contranpi rimarisqan cumplikururqa, hinaptinmi paytaqa runakuna ukumanta wischururqaku. Payqa torokuna hinañam pastota mikurqa, cuerpontapas sullam nuyurqa. Paypaqqa pelonkunapas ankapa purankuna hinam wiñarurqa, sillunkunapas alton pawaq animalkunapa sillunkuna hinaraqmi wiñarurqa.

Rey Nabucodonosorpa sanoyarusqanmanta

³⁴ Chay sentenciawasqan tiempo cumplikuruptinmi ñoqa Nabucodonosor alto cielota qawarirqani, hinaptinmi yuyayniy huktawan kutiykuwarqa. Chaymi tukuy imapa hawanpi munaychakuq Diosta hatuncharqani, wiña-wiñaypaq kawsaq Diostam yupaycharqani, wiña-wiñaypaq Diosmanmi graciasta qorqani, paypa munaychakusqanqa wiña-wiñaypaqmi takyan, payqa runapa lliw mirayninkunapim munaychakun.

³⁵ Paypa qayllanpiqa kay pachapi runakunaqa mana kaq hinallam kanku, hanaq pachapi tropakunawanpas munasqanman hinam ruwan, kay pachapi yachaqkunawanpas munasqanman hinam ruwan, manam pipas sayarinmanchu paypa atiyninpa contranpiqa, manam pipas tapupayanmanchu paypa imam ruwasqantaqa.

³⁶ Chaypunillam yuyayniy ñoqaman kutiramuwarqa, chaymi munaycha-kuyniypas, ancha reqsisqa kayniy-pas, inti hina sumaqllaña kancha-riyniypas ñoqaman kutiykamuwarqa. Consejaqniykunapas chaynataq kama-chikuyniypi ancha reqsisqa runakunapas maskawaqniymi hamurqaku. Munaychakuyniyta kutiykachiwaptinkum ñawpaqmantapas aswan munayniyuqraq karqani.

³⁷ Chayraykum ñoqa Nabucodonosor hanaq pachapi Reyta alabaspay hatunchani, paytam yupaychanipas, paypaqqa tukuy ima ruwasqankunapas cheqapmi, payqa allinkuna ruwaqmi, hatun tukuqkunatapas payqa uchuychanmi.