Daniel 12 - CHUYA QELLQA La Biblia en Quechua de Ayacucho 2012

Tukupay tiempo chayamunanmanta

¹ Chay tiempopim, Israel llaqtaykita waqaychaq ángel Miguel hatarimunqa. Chay punchawkunaqa ñakariy tiempom kanqa nacionkunapa rikurisqanmantapas chayna ñakariyqa manam haykapipas karqachu; ichaqa chayna kachkaptinmi llaqtaykimanta kaqkuna salvasqa kanqaku, salvasqaqa kanqaku libropi qellqasqa kaqkunallam.

² Wañuqkunamantapas achkallañam kawsarimunqaku: Wakinmi wiñay kawsaypaq wakinñataqmi wiña-wiñay ñakariypaq.

³ Yachayniyuq runakunam, achkallaña runakunata allin ñanninta pusaqkunam, chuyay-chuyay kichasqa cielo hina kancharinqaku, chaskakuna hinam wiñaypaq kancharinqaku.

⁴ Ichaqa Daniel, kay willasqaykunata libropi wichqay hinaspa tukupay tiempo chayamunankama selloykita churaykuy. Llapa runakunam yachayta maskaspanku kayman chayman purinqaku, nispa.

⁵ Ñoqa Danielmi qawarispay iskay runakunata rikururqani, hukninmi mayupa waklaw chimpanpi, hukninñataqmi kaylaw chimpanpi sayachkasqa.

⁶ Huk runam chay mayupa hawanpi sayarqa linomanta pachayuq. Paytam huknin tapurqa: ¿Haykapitaq kay admirakuypaq kaqkuna cumplikunqa? nispa.

⁷ Hinaptinmi chay mayupa hawanpi sayaq linomanta pachayuq runa makinkunata altoman hoqarirqa, hinaspam kawsaq Diosrayku juraspan nirqa: Kaykunaqa cumplikunqa kimsa wata partenmantañam, Diospa chuya llaq-tanpa atiyninpa tuñichisqa kaynin tukuruptinñam, nispa.

⁸ Chay uyarisqayta mana entiendespaymi payta tapurqani: Señorlláy, ¿imapitaq tukuy kaykuna tukunqa? nispa.

⁹ Hinaptinmi payñataq niwarqa: Daniel, pasakuyña. Kay willasqayku-naqa wichqasqañam, tukupay tiempo-kamam sellasqaña kachkan.

¹⁰ Ach-kallañam kay willasqay ñakariykunataqa pasanqaku, paykunaqa chay ñakariykunawanmi chuyanchasqa kanqaku. Mana allin runakunam ichaqa hina mana allinllata ruwanqaku, paykunaqa manam imatapas entiendenqakuchu, entiendenqakuqa yachayniyuq runakunallam.

¹¹ Diosman sapa punchaw animalkuna ofreceyta tanichisqankumantam otaq Diospa templonpi millakuypaq kaqkunata ofrecesqankumantam pasan-qa waranqa iskay pachak isqon chunka punchawkuna.

¹² ¡Mayna kusis-qam kanqaku pacienciawan waranqa kimsa pachak kimsa chunka pichqayuq punchawkama chayaqkunaqa!

¹³ Daniel, qamqa wañukunayki punchawkamayá hawka kawsakuy, puchukay punchawkunapiñam tupaqnikita chaskinaykipaq hatarimunki, nispa.