Daniel 10 - CHUYA QELLQA La Biblia en Quechua de Ayacucho 2012

Visionta Daniel mayupa patanpi rikusqanmanta

¹ Persia nacionpi rey Ciro kimsa wataña munaychakuchkaptinmi, Beltsasarwan sutichasqa Daniel huk cheqap revelacionta chaskirqa, ichaqa sasa entiendeymi karqa. Danielmi ichaqa chay revelacionpa imam ninantapas allinta entiendeykurqa.

² Chay punchawkunapim ñoqa Da-niel, kimsa semanapuni llakisqallaña tarikurqani.

³ Manam miski mikuykuna-tapas nitaq aychatapas mikurqanichu. Vinotapas manam malliykurqanichu, nitaqmi miski asnaq aceitewanpas talli-kurqanichu, chay kimsa semana cumpli-kunankama.

⁴ Punta kaq killapa iskay chunka tawayuq punchawninpim, Tigris hatun mayupa patanpi kachkarqani.

⁵ Hinachkaspam rikururqani linomanta pachayuq runata, paypaqqa weqaw watanpas qorimantam kasqa.

⁶ Cuerponpas topacio rumi hinam kasqa, uyanpas llipya hina kancharichkaqmi kasqa, ñawinkunapas lenwachkaq nina hinam kasqa, brazonkunawan chakinkunañataqmi lluchkay-lluchkay bronce hina llipipipisqa, rimasqanpas nana-nanaq runakunapa rimasqan hinaraqmi uyarikurqa.

⁷ Chay visiontaqa ñoqallam rikurqani, manam ñoqawan kuska kaq runakunaqa rikurqakuchu, paykunamanqa hatun mancharikuy yaykuruptinmi pakakunankupaq ayqekurqaku.

⁸ Ñoqaqa chay hatun visionta chaskispayqa sapallaymi tarikurqani, uyaypas ayayaruptinmi manaña kallpayuq rikurirurqani.

⁹ Rimasqanta uyariruspaymi pampaman qonqoranpa wichiykurqani.

¹⁰ Hinaptinmi huk maki hapiykuwaspan katkatatachkaqta tawanpata qonqoraykachiwarqa.

¹¹ Paymi niwarqa: Diospa kuyasqan Daniel, hatarispayki kay nisqayta allinta uyariy. Ñoqam qanman kachamusqa karqani, nispa. Rimayta tukuykuptinmi katkatatastin sayarirurqani.

¹² Chaymi niwarqa: Daniel, ama manchakuychu, qanmi Diosnikipa ñawpaqninpi sasallaña kaqkunata entiendeyta munarqanki, paypa ñawpaqninpi uchuychakusqaykiraykum chay punta kaq punchawmantaraq mañakusqaykita uyarispan kachamuwarqa.

¹³ Ichaqa Persia nacionta waqaychaq angelmi iskay chunka hukniyuq punchaw harkaramuwarqa, ichaqa kamachikuq ángel Miguelmi yanapawananpaq hamurqa, payqa hamurqa Persia nacionpa reyninkunawan sapallay qeparusqayraykum.

¹⁴ Ñoqam hamurqani llaqtamasikikunata hamuq punchawkunapi imam pasananmanta willaqniki; chay visión qawasqaykiqa hamuq punchawkunapiraqmi cumplikunqa, nispa.

¹⁵ Chaykunata rimapayawaptinmi ñoqañataq mana rimarispay pampata qawarqani.

¹⁶ Hinaptinmi runapa churinman rikchakuqñataq simiyta llapchaykuwarqa, chaymi ñawpaqniypi sayaqta nirqani: Taytalláy, chay visionmi hukmanyarachiwaspan mana kallpayuqta ruwaruwan.

¹⁷ Taytalláy, ¿imaynataq kay eqo runallayki qanwan rimayman kaynaña mana kallpayuq kachkaspayqa chaynataq samayniypas chinkaruchkaptinñaqa? nispay.

¹⁸ Chaymi runapa churinman rikchakuq yapamanta llapchaykuwaspan kallpanchaykuwarqa,

¹⁹ hinaspanmi niwarqa: Diospa kuyasqan Daniel, ama manchakuychu nitaq hukmanyaychu, astawan kallpanchakuy, nispa. Chaynata niwachkaptinmi kallpanchakuruspay payta nirqani: Taytalláy, rimapayawayña ñam kallpanchaykuwankiña, nispa.

²⁰ Chaymi pay niwarqa: ¿Yachankichum imapaqmi qanman hamusqayta? Kunanmi Persia nacionta waqaychaq angelwan peleanaypaq kutisaq, paywan peleayta tukuruptiymi Grecia nacionta waqaychaq ángel hamunqa.

²¹ Kunanmi nisqayki cheqap kaqmanta rimaq libropi imam qellqasqa kasqanta. Paykunawan peleaptiyqa manam pipas yanapawarqachu. Aswanqa Israel nacionta waqaychaq ángel Miguelmi yanapaykuwarqa.